ရေဝ်၊ ဂျာန္နဝါရဳ ၂၂
တွဵုရးဍုၚ်မန် ပွိုၚ်ဍုၚ်ရေဝ် နူကဵုကွာန်ကြုၚ်လံၚ်မွဲကဆံၚ် အခေါၚ်ဖ္ဍိုက်ပလံင်ဗၞိက် ဇရေင်ကွာန်လ္ပာ်အပ္ဍဲတံဂှ် ကံၚ်ဇြဳပၞာန် ကၟာတ်လဒဵုလဝ်တုဲ ညးဍုၚ်ကွာန်တံ ဒးဂဗကၠုၚ်ကဵုဘဲကၞောဝ်ကၠောဝ်ဗျဵုမာန်ဂှ် မိသုတဇဝ် သ္ကိုပ်ဌာနပရေၚ်ဗ္စာရဏာမၞိဟ် ကေုာံ ပရေၚ်ဟံၚ်ပြာ် ကံၚ်ဇြဳဖေဝ်ဒရာဍုၚ်မန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒါဲကွာန်ကြုၚ်လံၚ်တြေံ ကြဴနူက္တဵုဒှ်ပေါဲဗ္တိုက်တုဲ စနူဂိတုဂျာန္နဝါရဳ ၁၂ တုဲဂှ် ကံၚ်ဇြဳပၞာန် ကၟာတ်လဒဵုလဝ် အခေါၚ်ဖ္ဍိုက်ပလံၚ်ကပေါတ် နူကဵုကွာန်ကြုၚ်လံၚ်တၟိ လ္ပာ်ကွာန်အပ္ဍဲတံဂှ်ရောၚ် သ္ဂးရ။
ပွမကၟာတ်လဒဵု၊ သီဂိုၚ်ကၠေံ ဇွောံမစၞစကောန်ကွာန်တံဂှ်ဝွံ ဟွံကိတ်ညဳကဵု အခေါၚ်အရာမၞိဟ်တုဲ ဒဒှ်ရဒှ်ပြဝပကီုပရာပ်ရဂှ် သ္ကိုပ်ဌာန မိသုတဇဝ် ဟီုဂးလဝ်ရ။
ဟိုတ်နူကၟာတ်လဒဵုလဝ် အခေါၚ်ဖ္ဍိုက်ပလံၚ်ဗၞိက်တံဂှ်တုဲ နူကဵုဂၠံၚ်ရပ်စပ်ဒၟံၚ်တွဵုတွဵုတံဂှ် ရပ်စပ်ဟွံဂွံရတုဲ ဒးဖ္ဍိုက်ပလံၚ်ဒၟံၚ် နူကဵုဒၞါဲဂၠံၚ်ဍာန်ဟွံခိုဟ်တံဂှ်တုဲ ၚုဟ်ဗၞိက်က္ဍၚ်ကီု၊ ဟွံဂွံအခေါၚ်ပၠောပ်ပ္တိုန် ဗွဲမလောဲသွာတုဲ ကပေါတ်ဗၞိက်ပိုတ်အိုတ်တံလေဝ် ဒးဂဗကၠုၚ်မာန်ဂှ် သ္ဂးရ။
ဟိုတ်နူလ္ပာ်ကံၚ်ဇြဳပၞာန် ကၟာတ်လဒဵုလဝ် သာ်ဏံဂှ်တုဲ ပ္ဍဲဒေသဒၞါဲညးဍုၚ်ကွာန်ပါဲဒဴဘဲပၞာန်တံ မံၚ်တန်တဴတံဂှ် တန်တဴကဵုဂကူသ္ၚုတုဲ မွဲရိုက်ဂှ် ၚုဟ်သၠုၚ်တိုန်အာလဝ် စဵုကဵု ၃၀၀၀၀ ဒ္ကေဝ်ပြၚ်ရ။ သ္အာၚ်နူဂှ်ပၠန် ကၠေၚ်စက်မွဲလဳတာ ၇၀၀၀ ဒ္ကေဝ်၊ ကၠေၚ်စတဆိပ်ၚ္ၚုဲၜါ မွဲလဳတာ မွဲဗူဂှ် ၉၀၀၀ ဒ္ကေဝ်၊ ၚုဟ်ဗၞိက်စသုၚ်သ္ဇိုၚ် မပ္တံကဵုၜဵု၊ (အချိုမှုန့်) ၊ မြေက်၊ ကသိုန်တံဂှ်လေဝ် တိုန်အာၜါဆအိုတ်တုဲ လှုဲနွံကီုလေဝ် ၜိုတ်နွံပၟိက်ရာန်ဟွံဂွံ ပြဒ္ဒညာသာ်ဏံတံလေဝ် နွံဒၟံၚ်ဂှ် ဂွံတီကေတ်ရ။
ဟိုတ်နူပေါဲဗ္တိုက်ဂမၠိုၚ်တုဲ ယဝ်ရလ္ပာ်ကံၚ်ဇြဳပၞာန်တံ ကၠောန်ကၠုၚ်ပရေၚ်ကၟာတ်လဒဵုသာ်ဏံ ဍာ်ဇမၠိၚ်မ္ဂး ညးပါဲဒဴဘဲပၞာန် ကေုာံ ညးဒေသ နူကဵုကွာန်လ္ပာ်အပ္ဍဲတံ ဒးဂဗကၠုၚ်ကဵုဘဲကၞောဝ်ကၠောဝ်ဗျဵုမာန်ဂှ် သ္ဂးရ။
ဟိုတ်နူပေါဲဗ္တိုက်ဂမၠိုၚ်တုဲ ညးဒေသ ၜိုတ် ၁၀၀၀ ပြၚ် နူကဵုကွာန်ကြုၚ်လံၚ်၊ ကွာန်အကျာံ၊ ကွာန်ဝါဗိုင်၊ ဝါအိုၚ်ယှေ၊ ကွာန်ကာန်နဳ၊ ကွာန်ယျေတ်ချံၚ်တံ ဒးပါဲဒၟံၚ်ဘဲပၞာန်တုဲ စဵုကဵုလအ်ကၠုၚ်ၜါသတ္တာဟပြၚ်ဂှ် ဟွံဂွံစဴဌာန်ဒၟံၚ်ဏီတုဲ နွံပၟိက်ဒၟံၚ်ကဵု သီုကဵုဇွောံမစၞစ၊ ပဠောံၜိုဟ်၊ ယာတ်၊ ဂဥုဲဇဗတံရ။
သွက်ညးပါဲဒဴဘဲပၞာန်လၟုဟ်တံဂှ် နကဵုကံၚ်ဇြဳဖေဝ်ဒရာဍုၚ်မန် ကေုာံ ဂကောံအဖဝ်မိတ်ဂမၠိုၚ် သွက်မဒါန်နူညးဍုၚ်ကွာန်ဂကူမန်တံဂှ် ရီုဗၚ်ကဵုဒၟံၚ်သ္ၚု၊ ကၠေၚ်၊ ဂဥုဲဇဗ၊ ယာတ်တံကီုလေဝ် သွက်ညးပါဲဒဴဘဲပၞာန်သီုဖအိုတ်ဂှ် ရီုဗၚ်ကဵုဟွံမာန်ဏီဂှ်တုဲ အရီုဗၚ်တံလေဝ် နွံပၟိက်ဒၟံၚ်ဏီဂှ် သ္ဂးရ။
ဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန် မန်၊ ကရေၚ် ဂကောံဇြဟတ်ပၠန်ဂတးတံဝွံ နူဂိတုဂျာန္နဝါရဳ ၈ စဵုကဵု ၁၁ ဂှ် ပေါဲဗ္တိုက်သ္ကာတ်မြဟ်လဝ် ဗ္ဒါဲကွာန်ကြုၚ်လံၚ် ခြာနူကဵု စကခ−၁၉ ပန်မိုၚ်တုဲ ပေါဲဗ္တိုက်သ္ကာတ်မြဟ်လဝ်တုဲ စဵုကဵု စၟတ်တ္ၚဲ ၁၄ ဂှ် ပေါဲဗ္တိုက်ဍောတ်တ်တံ ဆက်က္တဵုဒှ်ဒၟံၚ်ရ။
အပ္ဍဲကာလပေါဲဗ္တိုက်ဂှ် လ္ပာ်ကံၚ်ဇြဳပၞာန် ၇၀ တၠပြၚ် ချိုတ်အာတုဲ ၃၀ တၠပြၚ် ကလိဂွံလဝ်ဝပ်တုဲ လ္ပာ်ဒပ်ပံၚ်ကောံပၠန်ဂတးတံဂှ် ၃ တၠ ကလိဂွံလဝ်ဝပ်ဟွံဒးဂွိၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒပ်ပၠန်ဂတးဍုၚ်မန် MSRF ရ။
ဒဵုကဵုအခိၚ်လၟုဟ် လ္ပာ်ဒပ်ကံၚ်ဇြဳပၞာန်ဂှ်လေဝ် ဟွံဆုတ်ကလေၚ်နူကွာန်ကြုၚ်လံၚ်တြေံဂှ်ဏီတုဲ အကာဲအရာပေါဲဗ္တိုက်ထပ်က္တဵုဒှ် ကုဒပ်ပံၚ်ကောံပၠန်ဂတးတံ နွံဒၟံၚ်ဏီဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ