ထဝါဲ၊ ဂျာန္နဝါရဳ ၂၂
ရးတၞၚ်သဳ အရာပ်လ္တူဍုၚ်ထဝါဲတံဂှ် အပ္ဍဲတ္ၚဲအကြာတံဏံ အခိၚ်ဗ္တံဂှ်တှ်ေ ကံၚ်ဇြဳပၞာန် ထ္ၜးဟိုတ်ကဵုစရၚ်ကၟုဲတုဲ စၟဳတ်ကၠုၚ်ဒၟံၚ်တံ ဆက်ကၠုၚ်တုဲ ရပ်ဒက်ဏာလဝ် သၟတ်ဗၠာဲပၠိုၚ်ၚ်တံ နွံဒၟံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အရာပ်လ္တူဍုၚ်ထဝါဲ မပ္တံကဵု (အိမ်ရှေ့ပြင်၊ ကြက်စာပြင် ကေုာံ အရာပ်မြို့သစ်) တံ မပါလုပ် အရာပ်ဗွဲမဂၠိုၚ်ဂၠေၚ်ဂှ် စနူဂိတုဂျာန္နဝါရဳ သတ္တာဟဒုတိယတုဲ အခိၚ်ဗ္တံမ္ဂး ကံၚ်ဇြဳပၞာန် လုပ်စၟဳတ်စရၚ်ကၟုဲတံတုဲ ရပ်ဒက်ဒၟံၚ်သၟတ်ဗၠာဲတံရ။
အတိုၚ်ဂလာန်ညးဒေသတံဂှ်မ္ဂး အပ္ဍဲအကြာတ္ၚဲတံဏံ အရာပ်လ္တူဍုၚ်တံဂှ် ကံၚ်ဇြဳပၞာန် စၟဳတ်တေၚ်ဂြတ်ကၠုၚ်တုဲ အဟိန်စၟဳတ်စရၚ်ကၟုဲဂှ် ရပ်ဒက်တုဲ တ္ၚဲယးဂတ လၟေၚ်ဒဒှ်ဒးနုက်ပ္တိတ်ကဵုလှုဲလေဝ် နွံဂှ် သ္ဂးရ။
တုဲကၠုၚ် ပ္ဍဲဂိတုဂျာန္နဝါရဳ ၁၈ အခိၚ်ဗ္တံဂှ်လေဝ် ကၟုဲထဳတြုံတြုံဗြဴဗြဴ ဗၞတ် ၅၀ ကၠုၚ်ဇူဒီု ပ္ဍဲကဵုဒၞါဲဇူဒီု အရာပ်(အိမ်ရှေ့ပြင်) ဂှ် ကံင်ဇြဳပၞာန် စၟဳတ်စရၚ်ကၟုဲတုဲ ရပ်ဒက်ဏာလဝ်ဂှ် သ္ဂးရ။
မၞိဟ်တြုံ၊ မၞိဟ်ဗြဴ ဗၞတ် ၅၀ ဏံဝွံ ကၠုၚ်နူဒေသတၞဟ်ဟ်တုဲ နူကဵုရးတၞၚ်သဳမွဲကဆံၚ် လုပ်စိုပ်ဍုၚ်သေံ နကဵုဂၠံၚ်ဟွံလုပ်သၞောဝ်တုဲ ဒှ်ညးအာကၠောန်ကလောန်တံဏောၚ်ဂှ် ဂွံတီကေတ်ရ။
အခိၚ်လၟုဟ် ဒပ်ကံၚ်ဇြဳပၞာန် နွံပၟိက်ကဵုဇြဟတ်ကောန်ပၞာန်ကီု ဟိုတ်နူဟွံဂွံလၟိဟ်ညးယိုက်လျိုၚ်ပၞာန်တံဂှ်တုဲ ရပ်ဒက်ဒၟံၚ်ညးသၟတ်တံ လ္တူဍုၚ်ဂှ်ရောၚ် ညးဒေသတံ သ္ၚဳဂၠိပ်ဟီုဂးလဝ်ရ။
မွဲလ္ပာ်ဂှ်ပၠန် အရာပ်လ္တူဍုၚ်ထဝါဲတံဂှ် ကံၚ်ဇြဳပၞာန် ထ္ၜးဟိုတ်ကဵုစရၚ်ကၟုဲတုဲ ပတေၚ်ဂြတ်လဝ်ပရေၚ်စၟဳတ်တံကီုလေဝ် ပ္ဍဲကဵုဆေၚ်စသုၚ်ကဵု ကလာပ်တံဂှ်တှ်ေ ဒဵုကဵုဗ္တံဂၠု စဳဒၟံၚ်ရောၚ် သ္ဂးရ။
တုဲကၠုၚ်ပ္ဍဲဂိတုဒဳဇြေမ်ဗာတေံဂှ်လေဝ် ပ္ဍဲရးတၞၚ်သဳ ဒပ်ကံၚ်ဇြဳပၞာန် ထ္ၜးဟိုတ်နာနာသာ်တုဲ ညးဍုၚ်ကွာန်ကောန်အရာပ် မရပ်ဒက်လဝ် ဟွံအောန်နူကဵု ၃၄၀ တၠ နွံတုဲ ပ္ဍဲကဵုဏံ ၁၀၇ တၠဟေၚ် ကလေၚ်ဗလးကဵုလဝ်ဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−Social Media