သဓီု၊ သေပ်တေမ်ဗာ (၂၉)
ဟိုတ်ဒၟါနူဒးအာ ကမ်လွဟ်လက်နက်ဇၞော် နူသၞေဟ်ကၚ်စၟဳစၟတ် BGF ကံၚ်ဇြဳပၞာန် မလုပ်စိုပ်ဖျေံလဝ်ဒပ် ပ္ဍဲကွာန် (ညောၚ်ကုန်း) ၊ ပွိုၚ်ဍုၚ်ဘာအၚ်၊ ခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU တံ ပန်ပှော်လဝ်ဂှ်ရ ကောန်ၚာ်သၟတ်မွဲတၠ မပါလုပ် သီုကောန်အရာပ် (၃) တၠ ဇီုကပိုက်ဂွံလဝ်ဝပ်ဂှ် ခရိုၚ်သဓီု KNU လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၂၄) တေံ နူကဵုသၞေဟ်ကၚ်စၟဳစၟတ် BGF ကံၚ်ဇြဳပၞာန်ဂှ် ပေါဲဗ္တိုက်ဟွံမွဲမွဲသာ် ပန်ပှော်လဝ် လွဟ်လက်နက်ဇၞော် အပ္ဍဲကွာန် (ညောၚ်ကုန်း) ရ၊ ကမ်လွဟ်လက်နက်ဇၞော် မပန်ပှော်ကၠုၚ် နူကဵုသၞေဟ်ကၚ်စၟဳစၟတ် BGF ကံၚ်ဇြဳပၞာန်ဂှ်ဝွံ ဒတုံဗ္တိုဟ်ထ္ကးအာ ဂတမုက်သ္ၚိ နဝ်မညောအ် နူကဵုကွာန် (ညောၚ်ကုန်း) ဂှ်ရ။
ဟိုတ်နူကမ်လွဟ်လက်နက်ဇၞော် ဒတုံဗ္တိုဟ်ထ္ကးအာဂှ်ရ ကောန်ၚာ်သၟတ် အာယုက် (၈) သၞာံ ကေုာံ ညးဗြဴ (၂) တၠ ဒးအာ ကဝေက်ကမ်လွဟ်လက်နက်ဇၞော် ကလိဂွံဝပ်တုဲ တိရစ္ဆာန်ဝဳလဝ်သ္ၚိဌာန်လ္ၚဵုတံလေဝ် ဒးလဝ်ကီုဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ခရိုၚ်သဓီု KNU ရ။
ညးမၞုံအခေါၚ်ဟီုဂး ခရိုၚ်သဓီု KNU ဂှ် ဒပ် BGF ကံၚ်ဇြဳပၞာန်ဝွံ ဟွံဒှ်ပေါဲဗ္တိုက်မွဲသာ် လ္တူပွမစွံပွန် ဗ္တိုက်ကၠုၚ် ကုညးဍုၚ်ကွာန်ကောန်အရာပ်တံဂှ် ဒဒှ်ရဒုၚ်တဲဟွံမာန်ဂှ် ကဵု ဒဒှ်မဝးပ္ကဝ်ဒၟံၚ် အခေါၚ်အရာမၞိဟ် သာ်ဏံဂှ် နွံပၟိက် သ္ဂောံဒေါအ်ဒေၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ် BGF မၞုံသၞေဟ်ကၚ် (ညောၚ်ကုန်း) ကံၚ်ဇြဳပၞာန်ဂှ်ဝွံ မ္ၚးနူကော်ဘပဠ ညးဍုၚ်ကွာန်ဒေသတံ၊ ပန်ပှော်လွဟ်လက်နက်ဇၞော် လွဟ်လက်နက်ဍောတ်တံ ကြာန်န်တံဂှ် သီုကဵုလုလောန်ဒၟံၚ် ပွမဝးပ္ကဝ်အခေါၚ်အရာမၞိဟ်တံ မွဲဏှမွဲဏှရဂှ် ညးဟီုရ။
ပ္ဍဲကဵုပွိုၚ်ဍုၚ်ကျာ်ထဝ်၊ ဘာအၚ်၊ ၜဳကလေၚ် ကေုာံ ပွိုၚ်ဍုၚ်သဓီု မဒှ်တိဍာ်ထိၚ်ဒဝ် ဒပ်မဟာ (၁) KNU ဂှ် ဒပ်ကံၚ်ဇြဳပၞာန် ဝးပ္ကဝ်အခေါၚ်အရာမၞိဟ်တံကဵု စွံပွန်ဗ္တိုက်ကၠုၚ် လ္တူညးဍုၚ်ကွာန်ကောန်အရာပ်တံဂှ်ရ ညးဒေသ (၂၀၀၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဒဵုကဵုအခိၚ်လၟုဟ် စဴဌာန်ဒၟံၚ် ဟွံမာန်ဏီရ။
ပရိုၚ်−သြၚ်လောန်တိုၚ်(မ်)