မတ်မလီု၊ သေပ်တေမ်ဗာ (၂၉)
အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် အခေါၚ်အရာညးအဝဲဟွံခိုၚ်ကၠိုက်တံ ဗ္ဒါဲသီုဖအိုတ် ဆောံလေၚ်အာယျတုဲ စနူကဵုပရေၚ်ထတ်ယုက် ကေုာံ ပရေၚ်စသုၚ်မံၚ်စံၚ်တံ ဒှ်တမ် ဒးဆေၚ်ဒၟံၚ်မုက်ကဵု အကာဲအရာပရေံအိုတ်တံရဂှ် ညးအဝဲဟွံခိုၚ်ကၠိုက်တံ ကေုာံ ညးမရီုဗေၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးအဝဲဟွံခိုၚ်ကၠိုက်တံဝွံ ဗွဲကြဴဒပ်ပၞာန်သီအဝဵုတုဲဂှ် အခေါၚ်အရာမပါကၠုၚ် နူဂဝ်ဂၞဴဂမၠိုၚ် မပ္တံ အခေါၚ်ဗ္တောန်ပညာ၊ အခေါၚ်ဂွံဒုၚ်မၚ်မွဲရံၚ်စံၚ်ပရေၚ်ထတ်ယုက်၊ ပွမပ္ကတ်ပ္ကေၚ်တဵုပၠောမ်ကဵု လၟေၚ်ကမၠောန် စပ်ကဵုကွတ်ဂယိုၚ်လမျီုတံ၊ သ္ဂောံကလိဂွံကမၠောန်ကၟိတ်တံ မပါလုပ် စနူကဵုအခေါၚ်သ္ပဒတဴ ဂျိုၚ်လမျီုတံ ဒှ်တမ် ဆောံလေၚ်ကၠုၚ်အိုတ်ရ။
ညးအဝဲဟွံခိုၚ်ကၠိုက် မဒးဆောံလေၚ်ဒၟံၚ် အခေါၚ်အရာတံဝွံ ပ္ဍဲကာလသ္ကုတ်လက္ကရဴဏံ ညးမွဲကုညးမွဲ ဒးကလေၚ်ရီုဗၚ်ထ္ၜဘိုက် ရေၚ်သ္ကအ်အိုတ်တုဲ ဒဒှ်မ စဵုဒၞါနူသၞောဝ်ဥပဒေတံဂှ်လေဝ် စဵုကဵုဟွံမွဲ အောန်ကြဳကၠုၚ်ဂှ်ရ ဒးဆေၚ်ဒၟံၚ်မုက်ကဵု အကာဲအရာပရေံအိုတ်တံရ၊ စပ်ကဵုအကာဲအရာဏံတုဲ ညးမရေၚ်တၠုၚ်ရီုဗၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်မွဲတၠ ဟီုလဝ် သာ်ဏံရ။
“ဗၞတ်ၜိုတ်လဵု ဆောံလေၚ်အာရောဟီုဂှ် သွက်ပရေၚ်ပညာ၊ သီုပရေၚ်ထတ်ယုက်ပိုယ်တံဂှ် လၟုဟ်ဇကုဇကု အခေါၚ်အရာၜိုတ်ဂွံဂှ် ဂၠါဲချပ်တုဲ ပၞော်လဵုသက်သာညိရောဟီုဂှ် ၜိုတ်သ္ပမာန် မွဲကုမွဲ ဒးကဵုဒၟံၚ်ဇြဟတ်စိုတ်အိုတ်ရ၊ ညးမွဲမှ အဲလေဝ်ရီုဗၚ်ကုဍေံဟွံမာန်၊ ဍေံလေဝ် ရီုဗၚ်ကုအဲဟွံမာန် ဒှ်ဒၟံၚ်အေဗီုဏံရ၊ လၟုဟ် ဒှ်ကၠုၚ်သီုပရေၚ်ထတ်ယုက်တှ်ေ သာပရေံအာဟဂှ်ရ၊ ညးဟွံခိုၚ်ကၠိုၚ်တံဟီုဂှ် ပ္ဍဲကာလယဲကပ်ကဝ်ဝေဒ်ဏံ ၜိုတ်လဵုဒှ်ဒဒိုက်ရောဟီုဂှ်ကီု၊ မၞိဟ်ကၠောန်စကဵုတ္ၚဲတံလေဝ် ဟွံပြေပြံၚ်အိုတ်ရ၊ ညးဟွံခိုၚ်ကၠိုက် ကမၠောန်ညးကုညး မၞုံဒၟံၚ်တံရဂှ် အကာဲအရာပရေံကၠုၚ်ဒၟံၚ်ကီုရ၊ ၜိုတ်လဵု ပရေံအာရောဟီုတှ်ေ အတိုၚ်သၞောဝ်ဥပဒေ မစၞောန်ပျးလဝ်ဂှ် သၞောဝ်ဥပဒေကံၚ်ဇြဳပၞာန်ဒှ်ဒှ်၊ သၞောဝ်နူတမ်ပထမတေံဒှ်ဒှ် နူကဵုစစၞောန်ပျး သၞောဝ်တံဂှ် ချူဓဇက်လဝ် ပရေၚ်ညးအဝဲဟွံခိုၚ်ကၠိုက်တံ ချိုတ်တ်ပၠိုတ်တ်ဂှ် ဟွံမွဲရ အခိၚ်ဗီုလၟုဟ်တှ်ေ ပရေံဂၠိုၚ်က္ဍၚ်ရ” ရဴဝွံ သ္ဂးကၠုၚ်လဝ်ရ။
သ္အာၚ်နူဂှ်ပၠန် ပ္ဍဲဝေၚ်ကမၠောန်တံလေဝ် ဟိုတ်နူအကြေပ်ဂြတ်ပရေၚ်ပိုန်ဒြပ်တံတုဲ အခိၚ်ဖအောန်ဖျေံ ညးဒုၚ်ကာတံဂှ် ဟိုတ်နူဖအောန်ကၠုၚ်ဒၟံၚ် ညးဟွံခိုၚ်ကၠိုက်တံသၟးတံတုဲ အခေါၚ်အဝဵု ကမၠောန်ကၟိတ်တံ အောန်စှ်ေကၠုၚ်တုဲ ပ္ဍဲလ္ပာ်ကွတ်ပညာတံဂှ်လေဝ် ဗီုကၠာတေံ ဗ္တောန်ကဵုဒၟံၚ်တံ ဟွံမွဲဂှ်ရ ဒးဆောံလေၚ်ဒၟံၚ် သီုမဆေၚ်စပ်ကဵု လ္ပာ်ကွတ်ပညာတံရ။
ပ္ဍဲပွမမၚ်မွဲရံၚ်စံၚ်ပရေၚ်ထတ်ယုက်တံဂှ်လေဝ် ဗီုကၠာတေံ ညးရေၚ်တၠုၚ်ရီုဗၚ်ကဵုတံ ဟွံမွဲဂှ်ရ သီုစိုတ်သီုကာယ စှ်ေကၠုၚ်ဒၟံၚ်တုဲ ညးအဝဲဟွံခိုၚ်ကၠိုက် မကၠောန်ဒၟံၚ်ကမၠောန်ညးကုညး အပ္ဍဲသ္ၚိတံဂှ်လေဝ် ဒၟါနူၚုဟ်ဗွဝ်ဖျာ က္ဍၚ်တိုန်ကဵုဆဂှ်ရ ဆက်ကၠောန်ကမၠောန်ဟွံမာန်ရတုဲ ဒးဒေါအ်ဇူ သီုကမၠောန်ပရေၚ်ပိုန်ဒြပ်တံရ။
ညးအဝဲဟွံခိုၚ်ကၠိုက်တံဝွံ ညံၚ်ရဴမၞိဟ်ဓမ္မတာတံ အဝဲအၚ်္ဂဍိုက်က်ပေၚ်ၚ်ဟွံမွဲဂှ်တုဲ ဒးဒတူလိုၚ်ဒၟံၚ်ကဵု စိုတ်ဓာတ်သၟးဂှ်ရ ယဝ်ရဆက်ဒးဆေၚ်ဒၟံၚ်မုက်ကဵု အကာဲအရာသာ်ဏံရမ္ဂး ဒှ်ကၠုၚ်စဵုကဵု စဳရေၚ်ထောံဇကုဇကုမာန်ရောၚ်ဂှ် ညးအဝဲဟွံခိုၚ်ကၠိုက်မွဲတၠ ဟီုရ။
“ယဝ်ရ ဆက်အာအတိုၚ်ဏံရမ္ဂး ၜိုတ်လဵုခက်ခုဲမာန်ရောဟီုဂှ် နွံတၟာဂလိုၚ်ရ၊ အဓိကဂှ်တှ်ေ ပိုယ်တံဂှ် ဒှ်ညးဟွံခိုၚ်ကၠိုက်တံရ၊ ပိုယ်တံဂှ် ဗီုကဵုမၞိဟ်သာမညတံ အဝဲအၚ်္ဂဍိုက်က်ပေၚ်ၚ်ဂှ် ဟွံမွဲပုဟ်၊ တၚ်ဍိုန်လျနွံ၊ ပိုယ်တံဂှ် ဒှ်မၞိဟ်ဒးဒတူလိုၚ်ဒၟံၚ်ကဵု စိုတ်ဓာတ်၊ ညးဟွံခိုၚ်ကၠိုက် ဗွဲမဂၠိုၚ်ဂၠေၚ်ဂှ်တှ်ေ စိုတ်ဓာတ်ဇကုဂှ် ၜိုတ်သၟဟ်အစောံ ဒးသၠုၚ်ပ္တိုန်လဝ်တုဲ ဒးဆက်အာဒၟံၚ် နကဵုစိုတ်ဓာတ်မွဲဓဝ်ရ၊ အေဂှ်တှ်ေ ယဝ်ရဆက်ဒးဆေၚ်ဒၟံၚ်မုက်ကဵု အကာဲအရာသာ်ဏံရမ္ဂး ဗွဲစၟတ် စိုတ်ဓာတ်စှ်ေအာဗက် ဂွံစဳရေၚ်ထောံဇကုဇကုဂှ် ဟွံဇြိုၚ်စိုတ်ရပုဟ်၊ စိုပ်အာဒဵုကဆံၚ်ဏံမာန်ရောၚ်” သာ်ဝွံ သ္ဂးရ။
အခိၚ်လၟုဟ် အခေါၚ်အဝဵု ညးအဝဲဟွံခိုၚ်ကၠိုက်တံ ကြပ်သီုဖအိုတ် ဆောံလေၚ်အာယျတုဲ နကဵုညးဍုၚ်ကွာန်တံ ညးဟွံခိုၚ်ကၠိုက် ဗ္ဒါဲဗ္ဒါဲဇကုတံဂှ် နကဵုစိုတ်ကဵုဒှ် နကဵုကာယကဵုဒှ် လ္ပာ်သ္ပမာန် သွက်ဂွံကဵုအရီုအဗၚ်ဂှ် ညးရီုဗေၚ်ရေၚ်တၠုၚ် ပရေၚ်ညးအဝဲဟွံခိုၚ်ကၠိုက်တံ ဖ္တိုက်ဖ္အောဝ်လဝ်ရ။
ပ္ဍဲကၟိန်ဍုၚ်ဗၟာဂှ် အတိုၚ်စရၚ်လၟိဟ်မၞိဟ်အခိၚ်အကြာ သၞာံ ၂၀၁၉ တေံဂှ်မ္ဂး လၟိဟ်မၞိဟ်ကၟိန်ဍုၚ် (၁၂ ဒဿမ ၈) တၟံကၠံဂှ်ဝွံ ဒှ်ညးအဝဲဟွံခိုၚ်ကၠိုက်တံတုဲ ဒၟါနူပဋိပက္ခ မက္တဵုဒှ်ဒၟံၚ် လၟုဟ်တံဂှ်လေဝ် လၟိဟ်ဂၞန်ညးအဝဲဟွံခိုၚ်ကၠိုက်တံ ဂၠိုၚ်ကၠုၚ်မာန်ရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးဟွံခိုၚ်ကၠိုက်တံ ဟီုရ။
ပရိုၚ်−သြၚ်လောန်တိုၚ်(မ်)