လံၚ်လုၚ်၊ ဖေဖဝ်ဝါရဳ ၁၁
ပ္ဍဲပွိုၚ်ဍုၚ်လံၚ်လုၚ် ရးတၞၚ်သဳဂှ် ကောန်ဒပ်စှ်ေနူတန်ဗ္တောန်ကွတ်ပၞာန် မသုန်တၠ ကေတ်အဆက်လုပ်စိုပ်ဖျေံကၠုၚ်လွဟ်ဂှ် ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် (ပကဖ) လလောၚ်ပ္တိတ်လဝ်ပရိုၚ်ရ။
ကောန်ဒပ်ယိုက်ဝန်ပၞာန်တံဝွံ ဒှ်နူကဵုတမ်ဒပ်ကံၚ်ဇြဳပၞာန် ခလရ စၟတ် ၂၅ ဖျေံသ္ဇိုၚ်ထဝါဲတုဲ စနူဂိတုဂျာန္နဝါရဳ သတ္တာဟဒုတိယတုဲကၠုၚ်တေံတုဲ ကေတ်အဆက်ကဵု ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်တုဲ လုပ်စိုပ်ဖျေံကၠုၚ်လဝ်လွဟ်ရ။
ကောန်ဒပ်ယိုက်လျိုၚ်ပၞာန် မသုန်တၠဝွံ စနူဂိတုဂျာန္နဝါရဳ ၁၁ ကဵု ၁၂ ဂှ်တုဲ လုပ်စိုပ်ဖျေံကၠုၚ်လွဟ် မွဲတုဲမွဲတုဲ လက္ကရဴအိုတ် မွဲတၠဏံဂှ်တှ်ေ ကေတ်ကၠုၚ်အဆက်လုပ်ဖျေံလဝ်လွဟ် ပ္ဍဲဂိတုဖေဖဝ်ဝါရဳ ၆ တုဲကၠုၚ်တေံဂှ် ညးဒုၚ်တာလျိုၚ်လလောၚ်ပရိုၚ် လံၚ်လုၚ် (ပကဖ) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်မသုန်တၠ စှ်ေနူတန်ဗ္တောန်ကွတ်ပၞာန် လၟေၚ် ၁ ကဵု လၟေၚ် ၂ ဂှ် လံၚ်လုၚ် (ပကဖ) အာစိုပ်ဒုၚ်တၠုၚ်ကဵုလဝ် ပ္ဍဲဒၞါဲမဂီုကၠီုတံဂှ်တုဲ ပ္ဍဲကဵုဏံ ညးမကေတ်နၚ် လွဟ်လက်နက်မကမ်မွဲတၠ ပါလုပ်ဂှ် သ္ဂးရ။
ကောန်ဒပ်လုပ်စိုပ်ဖျေံကၠုၚ်လွဟ်ဂှ် လံၚ်လုၚ် (ပကဖ) ဖျေံလဝ်လာပ် ညးမွဲ မွဲကိုဋ်ဒ္ကေဝ်ပြၚ်တုဲ ညးမကေတ်နၚ်လွဟ်လက်နက်မကမ်တံဂှ်တှ်ေ ထပ်ပအပ်ကဵုအာ သြန်လာပ်မွဲကိုဋ်ဒ္ကေဝ်ပၠန်ဏောၚ်ဂှ် ဂွံတီကေတ်ရ။
ပ္ဍဲကဵုကောန်ဒပ် ဖျေံလဝ်လွဟ် ၅ တၠဂှ် လ္ၚဵုတံဂှ်ဝွံ လုပ်ကေတ်အာတာလျိုၚ် ပ္ဍဲဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် နဒဒှ်ကောန်သ္ဂံၚ်ဏောၚ်တုဲ လ္ၚဵုတံဂှ်တှ်ေ ညးမတိတ်စ္ဍးဍုၚ်သ္အာၚ်တံလေဝ် နွံဂှ် သ္ဂးရ။
နကဵုကောန်ဒပ်ကံၚ်ဇြဳပၞာန်သှ်ေဒၟံၚ်ဂမၠိုၚ် နူသၟဝ်တဲကံၚ်ဇြဳပၞာန်သီအဝဵုဏံဂှ် အခိၚ်ဟွံရုဲ ကေတ်အဆက်ပြံၚ်ကၠုၚ်မာန်တုဲ ညးမပြံၚ်ကၠုၚ်တံဂှ်လေဝ် ဒုၚ်တၠုၚ်ဒၟံၚ်လၟိုန်ရောၚ် ကဵုလဝ်သမ္တီရ။
အပ္ဍဲဂိတုဂျာန္နဝါရဳတုဲကၠုၚ်တေံဂှ်လေဝ် ကဆံၚ်သၞာဲဒဴကံၚ်ဇြဳပၞာန် သ္ကိုပ်ဗိုလ်မွဲတၠ မပါလုပ် ကောန်ဒပ်ကဵု ဗၠာဲသၟိၚ် ၁၃၆ တၠ ပါလုပ်ကၠုၚ် ပ္ဍဲချဳဒရာၚ်ဒစဵုဒစးအဝဵု နနဲဟွံပကီုပရာပ်ဂှ်တုဲ လုပ်စိုပ်ကၠုၚ်လ္ပာ်ညးဍုၚ်ကွာန်တံရောၚ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−LLPDF