မတ်မလီု၊ ဖေဖဝ်ဝါရဳ ၁၁
အလုံတွဵုရးဍုၚ်မန်မွဲ စနူသၞာံဏံမံက်တုဲ လ္ပာ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ သာဂၠိုၚ်ကၠုၚ်တုဲ နကဵုညးဍုၚ်ကွာန်ဂမၠိုၚ် သွက်ဂွံဒစးဒုၚ်ပလေဝ်ပလေတ်လဝ် အရာမနွံပၟိက်တံအိုတ်ဂှ် ဂကောံဇြဟတ်ပၠန်ဂတးတံ ကဵုလဝ်သတိရ။
ဒပ်ကံၚ်ဇြဳပၞာန်ဝွံ ပ္ဍဲကဵုဒေသဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂမၠိုၚ် မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ရေဝ် ကဵု ပွိုၚ်ဍုၚ်ဇြပ်ဗုတံဂှ် ကၠောန်သ္ပဗ္တိုက်ကၠုၚ်ကဵုပၞာန်ကျာတံ ဆက်ဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) မပကောံပကေဝ်လဝ် ၜိုတ်က္ဍစိုပ်ဂှ်မ္ဂး သၞာံဏံ ပ္ဍဲဂိတုဂျာန္နဝါရဳကဵု အပ္ဍဲဂိတုဖေဖဝ်ဝါရဳ သတ္တာဟဒုတိယဂှ် လ္ပာ်ကံၚ်ဇြဳပၞာန် ဗ္တိုက်ကၠုၚ်ပၞာန်ကျာ ဟွံအောန်နူကဵု ၃၀ ဝါရ။
ပ္ဍဲကဵုကံၚ်ဇြဳပၞာန် ဗ္တိုက်ကဵုပၞာန်ကျာတံဂှ် ထောံမခတိုဟ်ကဵုဒရုၚ်ကီု၊ ဗ္တိုက်ကဵုဒရုၚ်ဒုၚ်ချိုတ်တံသၟးဟွံက ကဵုမခတိုဟ် လျိုၚ် ၅၀၀ ပံၚ်တံဂှ်လေဝ် ဗ္တိုက်ကၠုၚ်လဝ် အပ္ဍဲကွာန် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴတံဂှ်ရ။
ကိုဝ်အေမေန်ထောန် ညးဒုၚ်တာလျိုၚ် ဒပ်စဵုဒၞါညးဍုၚ်ကွာန် PDF ခရိုၚ်သဓီုဂှ် ကံၚ်ဇြဳပၞာန်ဝွံ ပ္ဍဲဗလးတိဏံ ဟိုတ်နူထ္ပက်ပၞာန်ဟွံမာန်တုဲ နကဵုတၚ်ရန်တၟံနွံနွံ ကလိလောန်ဒၟံၚ် လ္တူကောန်အရာပ်တံရောၚ် ဟီုရ။
“ပ္ဍဲဗလးတိဏံဂှ် ဍေံတံ ထ္ပက်ပၞာန်ဟွံမာန်ပုဟ်။ ထ္ပက်ပၞာန်ဟွံမာန်တုဲ ဒးသ္ပပဓာန်ကဵု ပၞာန်ကျာ။ ပ္ဍဲကဵုဏံဂှ်လေဝ် နကဵုဗီုပြၚ် ကၠောန်ဂွံဟာဂှ် စမ်ရံၚ်ရဏောၚ်။ ဍေံတံ သ္ဇက်ဂွံယုတ်မာဂှ် ညအ်ရနွံ။ ပၞာန်ဂှ် ညံၚ်ဂွံတုပ်ကဵုပၞာန် ဍေံတံ ဟွံအာပုဟ်၊ ကျယျတှ်ေ ဗက်ထောံမခတိုဟ် ကုသ္ၚိဒၟံၚ်ညးဍုၚ်ကွာန်တံဏောၚ်။ တုဲတှ်ေ ဗက်ထောံမခတိုဟ်ကဵု စမြိုၚ်ဘာသာတံဏောၚ်။ ဗက်ထောံမခတိုဟ် ဘာဗ္တောန်လိက်တံ နကဵုက္ၜၚ်ကျာဏောၚ်။ အရာတံဏံရ ဍေံတံကၠောန်လေပ်” သာ်ဝွံ သ္ဂးရ။
အပ္ဍဲသၞာံဏံ ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ပ္ဍဲတွဵုရးဍုၚ်မန်ဂှ် ကျာ်စေတဳ၊ စမြိုၚ်ဘာသာ၊ ဘာလကျာ်၊ ဘာဗ္တောန်လိက်တံ မပါလုပ် သ္ၚိ ၅၀ ဟွံအောန် ဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ် ဟွံအောန်နူ ၁၀ တၠ ဇီုကပိုက်ကလိဂွံလဝ်ဝပ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ဍေံတံကျမ္ဂး ကံၚ်ဇြဳပၞာန် ဆက်ဆောံကၠုၚ် ညးဍုၚ်ကွာန်တံ ညံၚ်ရဴသၞတုဲ ထောံမံၚ်မခတိုဟ်တံ ကၠောန်ၜိုတ်ဒၟံၚ်ဂှ်ရ သွက်ဂွံဒစးဒုၚ်ပလေဝ်ပလေတ်လဝ် အရာမနွံပၟိက်တံဂှ် ဖ္တိုက်ဖ္အောဝ်လဝ်ရ။
“ကံၚ်ဇြဳပၞာန် ပကီုပရာပ်တံဂှ်တှ်ေ အကာဲအရာပၞာန်ဍေံတံ ဟွံခိုဟ် အခိၚ်ကျကၠုၚ်တံဂှ်တှ်ေ ၜိုန်ဒှ်ညးဍုၚ်ကွာန်ကီုလေဝ် ဍေံတံ ဆက်ဆောံကၠုၚ်ညံၚ်ရဴသၞတုဲ ထောံကၠုၚ်မခတိုဟ် ဒၞါဲပြးဇးဂှ်နွံ။ ပ္ဍဲဒေသလ္ၚဵု ပ္ဍဲဒေသပေါဲဗ္တိုက်ဟွံဒှ်ရဂှ် ချိၚ်ကေတ်တုဲ ထောံမံၚ်မခတိုဟ်။ ဗ္တိုက်ဒၟံၚ်တံ နွံတုဲ နကဵုညးဍုၚ်ကွာန်တံ ၜိုတ်သ္ပမာန် သွက်ဂွံမံၚ် ပ္ဍဲဒၞါဲမသ္ၚောဲကဵု ကံၚ်ဇြဳပၞာန် မနွံတံဂှ်ကီု၊ ဒပ်ကံၚ်ဇြဳပၞာန်တံ လုပ်ကၠုၚ်မ္ဂး သွက်ဂွံပါဲမံၚ် နူကဵုဒေသဇကုတံဂှ်ကီု၊ တုဲတှ်ေ ပေါဲဗ္တိုက်က္တဵုဒှ်မ္ဂးလေဝ် သွက်ဂွံပါဲဒလေတ်ဂှ်ကီု၊ ယဝ်ပါဲဒလေတ်ဟွံမာန်မ္ဂး နူလၟုဟ် သွက်ဂွံဒစးဒုၚ် ၜံက်ခါဲလဝ်ကတိုၚ်ပါဲမခတိုဟ်တံအိုတ်ဂှ် နကဵုအဲ မိက်ဂွံကဵုကသပ်ရ” သာ်ဝွံ ဟီုရ။
ကံၚ်ဇြဳပၞာန်ဝွံ ဗွဲကြဴဏံ ပ္ဍဲကဵုပရေၚ်ပၞာန်ဗလးတိတံဂှ် ဒးကျကၠုၚ်ဒၟံၚ် ဇၞော်ကဵုဇြဟတ်တုဲ ဒးသ္ပပဓာန်ဒၟံၚ် ပၞာန်ကျာအဓိကတုဲ ဒၞါဲဒေသအပ္ဍဲဍုၚ် ဗွဲမဂၠိုၚ်ဂှ် ထောံမံၚ်မခတိုဟ်လၟေၚ်ဒဒှ်တ္ၚဲဂှ် ကၠောန်ဒၟံၚ်အဆက်က်ရ။
ပရေၚ်ဗ္တိုက်ပၞာန်ကျာ ကံၚ်ဇြဳပၞာန်တံဝွံ မ္ၚးနူလ္တူဒပ်ပၠန်ဂတးတံဂှ် စွံပွန်ဗ္တိုက်ကၠုၚ်ဒၟံၚ် သ္ၚိဌာန်ညးဍုၚ်ကွာန်တံ အဓိကဂှ်တုဲ ညးဍုၚ်ကွာန်တံလေဝ် ဇီုကပိုက်ကလိဂွံဝပ်တံ နွံကၠုၚ်ဒၟံၚ် ကြပ်အရိုဟ်ဒဒှ်တ္ၚဲရ။
အတိုၚ်ဂကောံချဳဒရာၚ် ထပိုတ်သြန်ဆီဍေက် BMC လ္ၚတ်ဂွံဆဵုကေတ်ဂှ်မ္ဂး ပ္ဍဲပရေၚ်ဗ္တိုက်ပၞာန်ကျာတံဂှ် ဗ္တိုက်ဒၟံၚ်ဒၞါဲညးဍုၚ်ကွာန်ကောံကလောံဂမၠိုၚ် မပ္တံကဵုဖျာ၊ ဒၞါဲကဵုဒါန်ဖာပ်သၚ်၊ ပေါဲသ္ဘၚ်၊ သ္ဘၚ်ပရေၚ်ဘာသာ၊ ရုၚ်ဂဥုဲဗ္ဒမ်ဂဥုဲ ကေုာံ သီုကဵုဘာဗ္တောန်လိက်တံ ဒှ်တမ်ရ။
နူသၞာံ ၂၀၂၁ စဵုကဵုသၞာံ ၂၀၂၄ ဂိတုနဝ်ဝေမ်ဗာဂှ် အလုံဍုၚ်မွဲ ပရေၚ်ဗ္တိုက်ပၞာန်ကျာ နွံကၠုၚ်လဝ် ၄၀၂၀ ဝါပြၚ်တုဲ ညးဇီုကပိုက်ကလိဂွံဝပ် ၃၄၀၀ ပြၚ်၊ ညးမချိုတ်အာ ၂၂၅၀ ပြၚ် နွံလဝ်ရောၚ် BMC လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၁၀ တေံရ။
ပရိုၚ်−သြၚ်လောန်တိုၚ်(မ်)
ဗီု−CJ