ကျာ်မြဟ်၊ ဖေဖဝ်ဝါရဳ ၁၃
ပ္ဍဲကွာန်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ဟိုတ်နူဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကဵုကွာန်ဏံ ပလှ်သွံစဒၟံၚ်ကပေါတ်နွံအပ္ဍဲသ္ၚိတံဂှ်တုဲ သ္ၚိဗ္ဒါဲ ၂၀၀ ဂှ် ဗီုပြၚ်မူလပကတိဂှ် ဟွံမွဲရတုဲ လီုအာယျဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ပံၚ်ကောံ ကံၚ်ဇြဳပၞာန် မဖျေံလဝ်ဒပ် ပ္ဍဲဗ္ဒိုပ်ဗၠာဲသၟိၚ်ၜါသွာၚ်ဂှ်ဝွံ ပံၚ်တောဲကဵု ရဲသွံကပေါတ်တြေံတြဟ်တံဂှ်တုဲ ကပေါတ်နူကဵုသ္ၚိဂမၠိုၚ် စနူကဵုကၟဳသောတ်၊ တြၚ်သ္ၚိ၊ ဗ္တၚ်၊ တမ်ဒယိုၚ်တံ ဒှ်တမ် ၜှ်သွံပလှ်ဒၟံၚ်အိုတ်ရ။
စပ်ကဵုဂကောံပံၚ်တောဲကံၚ်ဇြဳပၞာန်တံ ပလှ်သွံစဒၟံၚ် ကပေါတ်ပ္ဍဲသ္ၚိဒၟံၚ်တံဏံ ဗီုကြိုက်စိုတ်ဂှ်တုဲ ဂကောံအုပ်ဓုပ်ကွာန်တံဂှ်လေဝ် ဟွံဂံၚ်ဟီု၊ ညးဍုၚ်ကွာန်တံဂှ်လေဝ် ၜိုန်ရဂွံဆဵုဂွံညာတ်ဒၟံၚ်ကီုလေဝ် ဒှ်ဒၟံၚ်အကာဲအရာဟွံဂံၚ်ဟီုမွဲသာ်ဂှ် သ္ဂးရ။
ပ္ဍဲကဵုဒေသၜါသွာၚ် ပေါဲဗ္တိုက်ၜါလ္ပာ်တံ မကလေၚ်ညိၚ်စှ်ေအာဂှ် စနူသၞာံတုဲကၠုၚ် ဂိတုဂျူလာၚ် ၂၁ တေံဂှ်တုဲ ဒဒှ်ရစဴမံၚ်ဂွံယျဂှ် လ္ပာ်ကံၚ်ဇြဳပၞာန် ကဵုကၠုၚ်လဝ်သမ္တီ ကုညးဍုၚ်ကွာန်ဒေသတံရ။
ဆ္ဂး ညးဒေသဗွဲမဂၠိုၚ်ဝွံ ဆၜိုတ်စဴကျောဝ်သ္ၚိ သှ်ေဒၟံၚ်အပ္ဍဲကွာန်ဂှ်ကီု၊ သွက်ဂွံၚးတးသ္အးဇ္ၚး ၜိုတ်ဏံသၟးရ စဴကၠုၚ်ဒၟံၚ်အိုတ်တုဲ ဆက်မံၚ်ဒၟံၚ်ညးသ္ကအ် ပ္ဍဲဒၞါဲပါဲဒဴဘဲပၞာန်တြေံဂှ်တုဲ သ္ၚိကလေၚ်စဴမံၚ် ပ္ဍဲကွာန်တံဂှ်တှ်ေ ၜိုတ် ၅၀ ပြၚ်ရ နွံဂှ် ဂွံတီကေတ်ရ။
အခိၚ်လၟုဟ် ပ္ဍဲကဵုဗ္ဒိုပ်ဗၠာဲသၟိၚ်ၜါသွာၚ်ကဵု ပွဳပွူဗ္ဒါဲဗ္ဒါဲတံဂှ် ဒပ်ကံၚ်ဇြဳပၞာန် ကေုာံ ဇြဟတ်ဗၠာဲသၟိၚ် ၁၀၀ ပြၚ် ဖျေံလဝ်ဒပ်တုဲ အရိုဟ်ဒဒှ်တ္ၚဲ ပရေၚ်ပန်ပှော်လွဟ်ဇၞော်ကြာန်န်တံ နွံဒၟံၚ်ရ။
စနူသၞာံ ၂၀၂၃ ဂိတုနဝ်ဝေမ်ဗာတုဲကၠုၚ်တေံဂှ်တုဲ ဟိုတ်နူပေါဲဗ္တိုက်ၜါသွာၚ် လအ်ကၠုၚ်လဝ်ပွိုၚ်မွဲဂိတုပြၚ်ဂှ်တုဲ သ္ၚိဒၟံၚ်ညးဒေသ ၁၀၀ ပြၚ် ပၟတ်တူလီုလာ်အာလဝ်တုဲ လၟိဟ်မၞိဟ် ၃၀၀၀၀ ပြၚ် ဒးပါဲဒဴလဝ်ဘဲပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ