မတ်မလီု၊ ဖေဖဝ်ဝါရဳ ၁၄
ပတွဵုနူအခိၚ်ဍုၚ်ဟံသာဝတဳလီုတုဲ ဒဵုကဵုတ္ၚဲဏံ ဂကူမန် မဒးဆောံကၠုၚ်အဝဵုစၟိန်ပြမာန်ဂှ် အခေါၚ်ကံကုသိုလ်ဇကု ဇကုဂွံဖန်ဖက်ကေတ်မာန် ကဏ္ဍညးကဵုညး သွက်ဂွံလုပ်အာပေါဲဗ္တိုက်ဂှ် ဂကောံပၠန်ဂတးမန်တံ ဖ္တိုက်ဖ္အောဝ်ကၠုၚ်ရ။
ပ္ဍဲတ္ၚဲကောန်ဂကူမန် မရနုက်ကဵု ၇၈ ဝါ ပ္ဍဲဂိတုဖေဖဝ်ဝါရဳ ၁၃ ဏံဂှ် ဂကောံပၠန်ဂတးရပ်လွဟ်မန် မပါလုပ်ဒၟံၚ် အပ္ဍဲပၠန်ဂတးလၟုဟ်တံ လလောၚ်ပ္တိတ်ကၠုၚ် လစွံစိုတ်ဂမၠိုၚ်ရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD မလုပ်ဒၟံၚ်ပေါဲဗ္တိုက် ကုတၠအဝဵုပၞာန်ဂှ်လေဝ် ပံၚ်တောဲအာ ကုဂကောံပၠန်ဂတးမန် ဂကောံပၠန်ဂတးမဟာမိတ်တံတုဲ သၠုၚ်ပ္တိုန်အာအသိၚ်ပၠန်ဂတးတံဏောၚ်ဂှ် သ္ဂးရ။
သွက်ဂွံဒက်ပ္တန်ဍုၚ်မန် မဍိုက်ပေၚ်ကုအခေါၚ်စၞောန်ပျးအပိုၚ် မဍိုက်ပေၚ်ကဵုအဝဵုပိတန်ဂှ် ပံၚ်တောဲကဵု ဂကောံဇြဟတ်ပၠန်ဂတး အပ္ဍဲတွဵုရး၊ ဂကူကောန်ဍုၚ်အရေၚ် ဘဝတုပ်တံဂှ်တုဲ လုပ်အာပေါဲဗ္တိုက်ဏောၚ် ဟီုရ။
ဟိုတ်ဂှ်ရ ညးဍုၚ်ကွာန်ဆာန်ဂကူမန် မနွံအပ္ဍဲဍုၚ်၊ မ္ၚးဍုၚ်တအ်သီုဖအိုတ် နစိုတ်ဓါတ်ဆာန်ဂကူနွံနွံ ၜိုတ်အခန်ဇကုသ္ပမာန် ဘိုၚ်လုပ်အာပေါဲဗ္တိုက်၊ ဘိုၚ်ပူဗိုၚ်အာ သွက်ဗၠးၜးဂကူပိုယ်အိုတ်ဂှ် ဆဝ်မ္ၚုဟ်ဏာလဝ် ပ္ဍဲတင်လလောင်တြးဂှ်ရ။
နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ် ဂွံအာဒဵုကဵုစိုပ် ကဆံၚ်ပေါဲဗ္တိုက်အလုံကောန်ဂကူဂှ် နွံပၟိက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ထ္မံက်ကၠုၚ်ပေါဲဗ္တိုက် အလုံဂကူမန်ပိုယ်တံပါလုပ်ဂှ်မာန်မှ တိုၚ်ပ္ကဴပိုယ်တံမၞုံပၟိက်ဂှ် ကလိဂွံဏောၚ် ညာတ်ကေတ်ရ။ ညအ်ဂှ်လေဝ် မွဲဗော် မွဲဂကောံဓဝ် ခိုဟ်မံၚ်ဂှ် ကလိဂွံမာန်ဟွံသေၚ်ပုဟ်ဂှ် ပိုယ်တံညာတ်ကေတ်ရ။ ဟိုတ်ဂှ်ရ ညံၚ်ဂွံစိုပ်ကဆံၚ်ပေါဲဗ္တိုက်အလုံဂကူမွဲဂှ် ဒးအာဏောၚ်။ ပိုယ်တံလေဝ် ညံၚ်ဂွံစိုပ်ကဆံၚ်ဏံဂှ် လုပ်အာပေါဲဗ္တိုက်ဏောၚ်ဂှ် မိက်ဂွံဟီုရ” သာ်ဝွံ သ္ဂးရ။
အခေါၚ်ကံကုသိုလ်မန် မန်ဖန်ဖက်ကေတ်ဂှ် ဂကူမန်တံ လုပ်ပေါဲဗ္တိုက်မှဟေၚ် ကလိဂွံမာန်ဏောၚ်ဂှ်ရ အလုံကောန်ဂကူမန် ပံၚ်ကောံပါလုပ်ကၠုၚ်မာန်မှဟေၚ် ၜှ်ပလံၚ်ကေတ်အာပေါဲအံၚ်ဇၞးမာန်ဏောၚ်ဂှ် ပတှ်ေစှ်ေစိုတ်ပေၚ်ၚ်ရ။
နကဵုဗော်ဍုၚ်မန်တၟိ AD ဇြဟတ်ပၠန်ဂတးမန်ဂွံဇၞော်တိုန်၊ ဇြဟတ်ပၠန်ဂတးမန် ညံၚ်ဂွံဒှ်မွဲမာန်ဂှ် ပံၚ်တောဲဆက်ဂစာန်ရေၚ်တၠုၚ်ဒၟံၚ်ဖိုဟ်ရောၚ် ကဵုလဝ်သမ္တီရ။
ဂကောံမန် ၆ ဂကောံဂှ်လေဝ် ညံၚ်အလဵုအသဳဍုၚ်မန် ဂွံမံက်ဂတဝ်ကၠုၚ် ဗွဲမပြဟ်ကီု ပံၚ်တောဲကဵုညးဍုၚ်ကွာန်မန်တံတုဲ သွက်ဂွံပၠန်ဂတးလုပ်အာပေါဲဗ္တိုက် ကုသၞောတ်တၠအဝဵုပၞာန် ကဏ္ဍညးကဵုညးဂှ် ပံၚ်တောဲဖ္တိုက်ဖ္အောဝ်လဝ်ရ။
ပေါဲဗ္တိုက်ရပ်လွဟ်ကဵု ပေါဲဗ္တိုက်ညးဍုၚ်ကွာန်တံဂှ် တဲညဳကသုညဳ ဗၟံက်အာရုပ်ရဴမှ ဍုၚ်မန်မၞုံကဵုအခေါၚ်ဇကုစၞောန်ပျးပေၚ်ၚ် ကလိဂွံတုဲ ဂကူမန်ပိုယ်တံ နကဵုဂုဏ်စရာဲနွံနွံ မံၚ်တန်တဴဗၠးၜး၊ သီုကံကုသဵုဇကု ဇကုဖန်ဗဒှ်ကေတ်မာန်ဏောၚ်ဂှ် သ္ဂးရ။
မာံတာန်လွေန် ညးဒုၚ်လျိုၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်တှ်ေ အခေါၚ်ကံကုသဵုဇကု ဇကုဖန်ဖက်ကေတ်ဂှ် ပါဲနူကဵုပၠန်ဂတး ကုသၞောတ်တၠအဝဵုပၞာန်ဂှ်တုဲ ဂၠံၚ်တၞဟ်ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခေါၚ်ကံကုသဵုဇကု ဖကုဖန်ဖက်ကေတ်ဂှ်ကဵု ဍုၚ်မန် ဂကူမန်ဂမၠိုၚ် မနွံပၟိက်ဂှ် သွက်အရာတံဏံဂှ် ပရေၚ်ဆဵုဂဗပ္ညဳပ္ညပ်ဂှ်တှ်ေ အခိၚ်တ္ၚဲဏံ ဟွံစှ်ေကဵုနတဲပုဟ်။ သွက်အခေါၚ်ဖန်ဖက်ကံကုသိုလ်မန်ဂှ် ဂကူမန်တံ ပါဲနူပၠန်ဂတး ကုသၞောတ်တၠအဝဵုပၞာန်တုဲ ဂၠံၚ်တၞဟ်ဟွံမွဲရပုဟ်။ ဟိုတ်ဂှ်ရ နကဵုသၟတ်မန်ဂမၠိုၚ် ပါလုပ်ပ္ဍဲပၠန်ဂတးဏောၚ်။ မၞိဟ်ဇၞော်ဇၞော်တံ ထံက်ပၚ်ရီုဗၚ် ပၠန်ဂတးတံဏောၚ်မ္ဂး ဍုၚ်မန် မန်တံမနွံပၟိက်ဂှ် မံက်ဂတဝ်ကၠုၚ်တုဲ ကလိဂွံအာ အခေါၚ်ကံကုသိုလ်ဇကု ဇကုဖန်ဖက်ကေတ်တံဂှ်ဏောၚ်” သာ်ဝွံ သ္ဂးရ။
ကောန်ဂကူမန် မၞုံအပ္ဍဲဍုၚ်၊ မ္ၚးဍုၚ်တံဂမၠိုၚ် သွက်ဂွံလုပ်စိုပ်ဘိုၚ်ဗပေၚ်ကဵုဇြဟတ် သ္ဂောံထံက်ပၚ်ရီုဗၚ်ကဵုဇြဟတ် ကုညးမလုပ်မံၚ်ပေါဲဗ္တိုက် သွက်ဍုၚ်မန်ဗၠးၜး ကဵု အခေါၚ်ဖန်ဖက်ကံကုသိုလ်မန်တံဂှ် အာတ်မိက်လဝ် ပ္ဍဲတၚ်လလောၚ်တြးပံၚ်တောဲဂှ်ရ။
ကံၚ်ဇြဳဖေဝ်ဒရာဍုၚ်မန် MSFC ဂှ်တှ်ေ ပ္ဍဲအရာကေတ်အဝဵုပရေၚ်ဍုၚ်ကွာန် မၞုံကဵုအခေါၚ်ဂကူကဆံၚ်တုပ်သၟဟ် အခေါၚ်စၞောန်ပျးအပိုၚ် ဂကူမန်တံဂှ် ပါဲနူဂၠံၚ်ရပ်လွဟ်ပၠန်ဂတးတုဲ တၞဟ်ဟွံမွဲပုဟ်ဂှ် သ္ဂးရ။
ဟိုတ်ဂှ်ရ ဂကူမန် မၞုံအပ္ဍဲဍုၚ်၊ မ္ၚးဍုၚ်ဂမၠိုၚ် သွက်ဂွံပံၚ်တောဲကဵု ဂကောံပၠန်ဂတးနာနာ သီုကဵုကံၚ်ဇြဳဖေဝ်ဒရာဍုၚ်မန်ဂှ် ဖ္တိုက်ဖ္အောဝ်လဝ်ရ။
နူပရေၚ်သၞောတ်တၠအဝဵုပၞာန်ရိုဟ်ကၞက်ဂွံပိုတ်ဏံ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ အနာဂတ်တေံဂှ် ဂကောံမန်ပၠန်ဂတးဂမၠိုၚ် ပ္ဍဲပရေၚ်ပၞာန်၊ ပရေၚ်ဍုၚ်ကွာန်တံဂှ် ဆက်အာဒၟံၚ် အသိၚ်ညးကုညးရ။
တုဲကၠုၚ်ပ္ဍဲဂိတုဂျာန္နဝါရဳတေံဂှ် နကဵုတၚ်ရန်တၟံ သ္ဂောံဝေၚ်ပရေၚ်ပၞာန် မစှ်ေကဵုဗျူဟာမာန် နူဒပ်ပၠန်ဂတးရပ်လွဟ်မန် ပန်ဒပ် စဒက်ပ္တန်လဝ် ကရောၚ်ပၞာန်ပံၚ်တောဲရာမညရ။
မွဲလ္ပာ်ဂှ်ပၠန် ပ္ဍဲကဵုစချူခၞံဒၟံၚ် သၞောဝ်သ္ဇိုၚ်ကိုန်စဳမာန်ပရေၚ်ပြံၚ်လှာဲလွေဟ်ဖေဝ်ဒရာ သွက်ဂွံဒက်ပ္တန်ဍုၚ် မဒုၚ်သ္ဇိုၚ်ကဵုနူသၟဝ်ဏံ နူတွဵုရးတံဂှ် ဗော်ဍုၚ်မန်တၟိ AD ကဵု ကံၚ်ဇြဳဖေဝ်ဒရာဍုၚ်မန် MSFC တံလေဝ် ပါလုပ်ဒၟံၚ်ကီုရ။
ပရိုၚ်−သြၚ်လောန်တိုၚ်(မ်)
ဗီု−CJ