မတ်မလီု၊ ဖေဖဝ်ဝါရဳ ၁၄
အပ္ဍဲတွဵုရးဍုၚ်မန် ၚုဟ်ကပေါတ်ဗၞိက်သေံ လုပ်စိုပ်ကၠုၚ် နူကဵုပယျဵုသေံ−ဗၟာဂှ်ဝွံ ပ္ဍဲပယျဵုတံဂှ် ဟိုတ်နူအခက်အခုဲ မ္ဒးရာန်ကၠေၚ်စက်တံဂှ်တုဲ ၚုဟ်သၠုၚ်တိုန်ကၠုၚ်ဒၟံၚ် ညိညဂှ် သၟာဗၞိက်ဂမၠိုၚ် ဟီုရ။
သွက်ဂွံဗ္တိုက်သ္အး ကမၠောန်ကျာဖျ နွံမွဲဒမြိပ်ပယျဵုၜါဍုၚ်ဂှ် စနူဂိတုဖေဖဝ်ဝါရဳ ၅ ဂှ်တုဲ လ္ပာ်ဍုၚ်သေံ ကၟာတ်ထောံ အခေါၚ်ပလံၚ်ပ္တိတ် ကၠေၚ်စက် ကေုာံ ဇြဟတ်ဓာတ်လလဳ လ္ပာ်ဍုၚ်ပယျဵုတံဂှ်တုဲဂှ် က္တဵုဒှ်ဒၟံၚ်အခက်အခုဲ ပ္ဍဲအရာမ္ဒးရာန်ကၠေၚ်စက်တံရ။
ဟိုတ်နူအခက်အခုဲ ဒးရာန်ကၠေၚ်စက် မက္တဵုဒှ်ဒၟံၚ်ပ္ဍဲပယျဵုသာ်ဏံဂှ်တုဲ ပ္ဍဲဒၞါဲယိုက်ပလံၚ်ကပေါတ်ဗၞိက်တံဂှ် ခရိတ်ပလံၚ်ဗစိုပ်တံ အိုတ်ဂၠိုၚ်ကၠုၚ်ဂှ်ရ ကပေါတ်ဗၞိက်သေံတံဝွံ တန်တဴကဵုလ္တူဂကူဍေံတုဲ ၚုဟ်သၠုၚ်တိုန်ကၠုၚ်ဒၟံၚ် နူ ၃၀၀၀ စိုပ် ၈၀၀၀ ဂှ် ဂွံတီကေတ်ရ။
သၟာဗၞိက်မွဲတၠဂှ်တှ်ေ နူကဵုပယျဵုမွဲကဆံၚ် ပ္ဍဲဒၞါဲဖ္ဍိုက်ဏာနၚ် ကပေါတ်ဗၞိက်သေံတံဂှ် ဂွံဂွံကၠေၚ်စက်ဂှ် ဒးရာန်ကေတ်ဒၟံၚ် ဗွဲမဝါတ်ဂါတ်တုဲ ၚုဟ်ကၠေၚ်စက်ဂှ်လေဝ် သၠုၚ်တိုန်ကၠုၚ်ဒၟံၚ် ကြပ် ၁၀ ဆဂှ်ရ ခရိတ်ကွဳစက်တံ ဒှ်ကၠုၚ် ၂ ဆဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကၠေၚ်ဂှ် ဒးရာန်ဒၟံၚ်တၟာလှ်ေ၊ ဂွံဂွံကၠေၚ်ဂှ် ဒးဂ္စါန်ဒၟံၚ်ဟွံသာ၊ ကၠေၚ်မွဲလဳတာဂှ် နူ ၃ လ္ၚီ ဒှ်အာ ၃ဠက်။ လၟုဟ် ကဵု ၇ ဠက်၊ ၈ ဠက်တုဲ ဒးရာန်ဒၟံၚ်ရ။ ကၠေၚ်မွဲလဳတာဂှ် ဒှ်အာ ၈ ဠက်တှ်ေ ကဝက်ဟွံကရပုဟ်၊ တိုန်အာ ၁၀ ဆရ။ ၚုဟ်ခရိတ်ကွဳစက်တံဂှ်လေဝ် ဒှ်အာ ၂ ဆယျ။ အကာဲအရာဂွံပရေံစှ်ေကၠုၚ်ရနွံ” သာ်ဝွံ ဟီုရ။
သ္အာၚ်နူဂှ်ပၠန် ကပေါတ်ဗၞိက်သေံလၟုဟ်ဂှ် ဖ္ဍိုက်ဏာနၚ် အတိုၚ်တြေံဂွံကီုလေဝ် ယဝ်သောၚ်ကလး ပြဒ္ဒညာကၠေၚ်စက် မကျာတ်ဝါတ်ဒၟံၚ်တံဏံ ဟွံမာန်မ္ဂး ၚုဟ်ထပ်တိုန်ကၠုၚ်မာန်တုဲ ညးမရပ်စပ်စသုၚ်တံရ ဒးအိုတ်ဂၠိုၚ်ကၠုၚ်ဏောၚ်ဂှ် ညးဆက်ဟီုရ။
သၟာဗၞိက်မွဲတၠပၠန်ဂှ်လေဝ် ကပေါတ်ဗၞိက်သေံလၟုဟ်တံဂှ် ကၟာတ်လဒဵုလဝ်ဟွံမွဲကီုလေဝ် ဟိုတ်နူအခက်အခုဲကၠေၚ်စက်တုဲ ၚုဟ်ကွဳစက်တံ တိုန်ကၠုၚ်ဂှ်ရ ၚုဟ်ကပေါတ်ဗၞိက်တံလေဝ် သၠုၚ်တိုန်ကၠုၚ်ဂှ် ဟီုရ။
“ဍေံတံ ကၟာတ်ကၠေၚ်သၟးရဏောၚ်။ သှ်ေ ဂှ် မုဟွံကၟာတ်ပုဟ်။ သှ်ေတံဂှ်တှ်ေ တတ်ကၠောံဒဒန် ကၠုၚ်ဂှ်ကၠုၚ်ဒၟံၚ်ရ။ ထပိုတ်ဒၟံၚ် ကၠေၚ်ကဵု ပၟတ်သၟးရဏောၚ်။ ကပေါတ်ဗၞိက်စၞစသုၚ်သှ်ေတံဂှ်တှ်ေ မုဟွံထပိုတ်ပုဟ်လေဝ်။ ခရိတ်ကွဳစက်တံ ၚုဟ်တိုန်အာ။ ကၠေၚ်ဂှ်ဟွံဂွံတုဲ ခရိတ်ၚုဟ်ကွဳစက််တံဂှ်တှ်ေ ၚုဟ်တိုန်အာရ။ ခရိတ်ကွဳစက်တံဂှ်တှ်ေ ၚုဟ်ပဵုတိုန်အာ နူကဵုတြေံတေံညိည။ ကပေါတ်ဗၞိက်တံဂှ်တှ်ေ မွဲဂကူဓဝ်ဂှ် ဟီုဟွံဂွံပုဟ်။ ဆ္ဂး တိုန်ဂှ် တိုန်ဒၟံၚ်ဖိုဟ်ရ” သာ်ဝွံ သ္ဂးရ။
ပ္ဍဲဒၞါဲဖ္ဍိုက်ဏာနၚ် ကပေါတ်ဗၞိက်သေံတံဂှ် ဒးကဵုဒၟံၚ်အခေါန် ကုသၞေဟ်ကၚ်သၟဝ်တဲကံၚ်ဇြဳပၞာန်တံကဵု သၞေဟ်ကၚ်ဂကောံရပ်လွဟ်ကောန်ဍုၚ်အရၚ်တံ ဂၠိုၚ်ကဵုဆတုဲ ဟိုတ်နူအခက်အခုဲကၠေၚ်စက်သာ်ဏံတုဲလေဝ် ၚုဟ်ဗၞိက်ခရိတ်အိုတ်တံ ဂၠိုၚ်နူကဵုကၠာတေံမာန်ဂှ် ညးဆက်ဟီုရ။
မွဲလ္ပာ်ဂှ်ပၠန်လေဝ် ဂကောံသၟဝ်တဲကံၚ်ဇြဳပၞာန်တံဝွံ ကပေါတ်ဗၞိက်လုပ်စိုပ်ကၠုၚ် နူဍုၚ်သေံတံဂှ် ထ္ၜးဟိုတ် ဒဒှ်ရပၠောပ်ပ္တိုန်နၚ် ဗွဲမလုပ်သၞောဝ်ဟွံသေၚ် သာ်ဏံတုဲ ပါဲနူကဵုပ္ဍဲသၞေဟ်ကၚ်တံဂှ် ပ္ဍဲဗွဝ်ဖျာတံဂှ်လေဝ် လုပ်ရပ်ဒၟံၚ်တံ နွံဒၟံၚ်တုဲ ဒၞါဲဖ္ဍိုက်ကပေါတ်ဗၞိက်သေံတံဂှ်လေဝ် တၚ်အခက်အခုဲဂမၠိုၚ် ထပ်က္တဵုဒှ်ဒၟံၚ်ရ။
ပ္ဍဲတွဵုရးဍုၚ်မန်ဂှ်တှ်ေ ဗၞိက်စၞစသုၚ်သ္ဇိုၚ်၊ ဗၞိက်မၞိဟ်အရပ်စပ်၊ ဂဥုဲဇဗ၊ ဗၞိက်ပယျေဝ်၊ ကပေါတ်ဗၞိက်အရပ်စပ်သွက်ပရေၚ်သိုၚ်ခၞံတံ မပါလုပ် ကပေါတ်ဗၞိက်နာနာသာ် မလုပ်စိုပ်ကၠုၚ် နူဍုၚ်သေံတံဂှ်တှ်ေ စွံအဓိကတုဲ ဒးရပ်စပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ