တၞၚ်သဳ၊ ဖေဖဝ်ဝါရဳ ၁၅
ပ္ဍဲရးတၞၚ်သဳ ပွိုၚ်ဍုၚ်တၞၚ်သဳဂှ် ဟိုတ်နူပေါဲဗ္တိုက်ဂမၠိုၚ်တုဲ ပ္ဍဲကဵုညးပါဲဒဴဘဲပၞာန်ဂမၠိုၚ် လၟိဟ်မၞိဟ် ၂၀၀ ပြၚ်ဂှ်ဝွံ ဒှ်ဒၟံၚ်ယဲခၞော်စော်ကဵု ယဲဂၞဴ နွံဒၟံၚ်ဂှ် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးမက္တဵုဒှ်ဒၟံၚ်ယဲဂမၠိုၚ်ဝွံ ညးဒးပါဲဒဴဘဲပၞာန် ပ္ဍဲဒဵုဂြိုပ်တံကဵု ပ္ဍဲကဵုကၠအ်ဂူယာတံ ပါလုပ် ဗွဲမဂၠိုၚ်တုဲ ဟိုတ်နူဍာ်သုၚ်ဍာ်ရပ် ဟွံရုမ်ဂပ်ကီု၊ သ္ၚိဍာ်ဟွံမွဲ ကေုာံ ဟိုတ်နူဒးမံင်ဒၟံၚ် ဗီုဒှ်ဗီုပြေပြံၚ်တံဂှ်တုဲ က္တဵုဒှ်ဒၟံၚ်ယဲအိုတ်ရ။
ပ္ဍဲကဵုညးမက္တဵုဒှ်ဒၟံၚ်ယဲဂမၠိုၚ်ဂှ် ကောန်ၚာ်သၟတ်ကဵု ညးအာယုက်ဇၞော်တံလေဝ် ပါလုပ်တုဲ ၜိုန်ဒးလွဳဒၟံၚ် နကဵုဂဥုဲဇဗ မနွံတံဂှ်ကီုလေဝ် ဒၟါနူဟွံရုမ်ဂပ်တုဲ ဒှ်ဒၟံၚ်အကာဲအရာထိၚ်ဒက် ယဲဘဲဟွံမာန်ဂှ်ရောၚ် သ္ဂးရ။
သ္အာၚ်နူဂှ်ပၠန် လ္ပာ်ကံၚ်ဇြဳပၞာန်ဂှ်လေဝ် ဟိုတ်နူကၟာတ်လဒဵုလဝ် ဗၞိက်စၞစသုၚ်၊ ကၠေၚ်စက် ကေုာံ အခေါၚ်ဖ္ဍိုက်ဏာနၚ် ဂဥုဲဇဗ ကုဒေသဂကောံပၠန်ဂတးတံ မထိၚ်ဒက်လဝ်ဂှ်တုဲ ဂဥုဲဇဗပိုတ်အိုတ်ဒၟံၚ်တံ နွံဒၟံၚ်ရ။
သၞာံတုဲကၠုၚ် ဂိတုဒဳဇြေမ်ဗာ ၁၈ တေံ ပ္ဍဲဂၠံၚ်တၞၚ်သဳ−မဝ်ဒံၚ်ဂှ် ပေါဲဗ္တိုက် စက္တဵုဒှ်လဝ်တုဲ စဵုကဵုဂိတုဖေဖဝ်ဝါရဳ ၁၃ ဂှ် ပေါဲဗ္တိုက်ၜါလ္ပာ် က္တဵုဒှ်တ္ၚဲဆက်ဒၟံၚ်ရ။
ဟိုတ်နူပေါဲဗ္တိုက်တုဲ ၜါလ္ပာ်ဇီုကပိုက်ချိုတ်တံ ဂၠိုၚ်ဒၟံၚ်တုဲ ဒးဒုၚ်ထောံမခတိုဟ် နကဵုပၞာန်ကျာကီု၊ ဟိုတ်နူပန်ပှော်ကဵုလွဟ်ဇၞော်ကီုတံဂှ်တုဲ ညးဒေသ ဟွံအောန်နူ ၅ တၠ ချိုတ်အာတုဲ ၂၀ ဟွံအောန် ဇီုကပိုက်ကလိဂွံလဝ်ဝပ်ရ။
ဟိုတ်နူပေါဲဗ္တိုက်ၜါလ္ပာ်ဂှ်တုဲ ညးဒေသဗ္ဒါဲ ၂၀၀၀ နူကဵုကွာန်ဍာ်ဗု၊ ထုံမခါ၊ ချောင်းနှစ်ပေါက်၊ သိန္နောတံ ဒးပါဲဒလေတ်ဒၟံၚ်ဘဲပၞာန် လအ်ကၠုၚ်ၜါဂိတုပြၚ်ရ။
ပ္ဍဲကဵုပွိုၚ်ဍုၚ်တၞၚ်သဳဂှ် ကွာန် ၁၇၀ ပြၚ် နွံတုဲ လ္ပာ်ဒပ်ပံၚ်ကောံပၠန်ဂတးတံဂှ်တှ်ေ ထိၚ်ဒက်လဝ် ကွာန် ၁၂၀ ပြၚ် ပါလုပ်သီုကဵု ဂကောံကွာန်တကူ၊ ပဝ၊ ကွာန်ဗာန်လမွတ်တံရ။
ပရိုၚ်−သြၚ်လောန်တိုၚ်(မ်)
ဗီု− နွေဥ◌ီးမေတ္တာ