ယှိုဲကုက္ကိုဝ်၊ ဖေဖဝ်ဝါရဳ ၁၅
သွက်ဂွံဗ္တိုက်သ္အးကမၠောန်ကျာဖျဂးတုဲ ကြဴနူဒက်ပ္တန်လဝ် ဂကောံတၟေၚ်တုဲဂှ် ဒပ်မၚ်ပယျဵု BGF စရပ်ဒက်ဒၟံၚ် ကမၠောန်ကျာဖျ နွံပ္ဍဲဍုၚ်ယှိုဲကုက္ကိုဝ်ဂှ်ရောၚ် တမ်ရိုဟ်ပရိုၚ် BGF တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံဗ္တိုက်သရိုဟ် ကမၠောန်ရာဇဝတ်ကျာဖျာ လီဠာန်လ္တူလပှ်ကျာဂှ်တုဲ ဍုၚ်သေံ ကြဴနူထပိုတ်ထောံ ကၠေၚ်စက်၊ ပၟတ် မသွံတြးကဵုဒၟံၚ် ပ္ဍဲပွိုၚ်ဍုၚ်မြဝတဳ ဍုၚ်ဗၟာတုဲဂှ် ဂွံမွဲသတ္တာဟ ပ္ဍဲဂိတုဖေဖဝ်ဝါ၇ဳ ၁၂ ဂှ် သွက်ဂွံဗ္တိုက်သရိုဟ် ကမၠောန်ကျဖျမသွံရာန်မၞိဟ်တံဂှ်တုဲ ဒက်ပ္တန်လဝ် ဂကောံတၟေၚ်ရ။
ဂကောံတၟေၚ် ပရေၚ်ဗ္တိုက်သရိုဟ်ကျာဖျ ကောန်ဒပ် BGF ဗွဲမဂၠိုၚ် မပါလုပ်ဂှ်ဝွံ စနူဂိတုဖေဖဝ်ဝါ၇ဳ ၁၄ တုဲ လုပ်စိုပ်စၟဳတ်ဒၟံၚ် ဒၞါဲဂကူကြုက်တံနွံ ပ္ဍဲကဵုယှိုဲကုက္ကိုဝ်တၟိဍုၚ်တၟိ ညးတံမထိၚ်ဒက်လဝ်ဂှ်တုဲ ကော်ဏာ ကောန်ဍုၚ်သ္အာၚ်မဂၠိုၚ်ဂၠေၚ် ပါလုပ်သီုကဵုဂကူကြုက်တံဂှ်တုဲ ရပ်ထိၚ်လဝ်ဂှ် တမ်ရိုဟ်ပရိုၚ်ဂမၠိုၚ် သ္ဂးအိုတ်ရ။
အတိုၚ်ဂလာန် တမ်ရိုဟ်ပရိုၚ်ယှိုဲကုက္ကိုဝ်မွဲတၠဂှ်မ္ဂး ကောန်ဍုၚ်သ္အာၚ် ၁၀၀ ပြၚ် ဂကူကြုက်ဗွဲမဂၠိုၚ်မပါလုပ်ဂှ် စွံလဝ်ဒၞါဲတၞဟ်ခြာမွဲတုဲ ရပ်ထိၚ်လဝ် နကဵုဂီုကၠီုမတေၚ်ဂြတ်ဂှ်လေဝ် သ္ဂးရ။
BGF ဂှ်တှ်ေ ညံၚ်ကမၠောန်လီဠာန်သြန် ကမၠောန်ရာဇဝတ်ကျာဖျ မဟွံလုပ်သၞောဝ် အပ္ဍဲဍုၚ်၊မ္ၚးဍုၚ်မြဝတဳတံ ဂွံကၠေံအိုတ်အးအာဂှ် ဗ္တိုက်သရိုဟ်အာဏောၚ်ဂှ် ဟီုကြီုလဝ်တုဲ သွက်ဂွံကလေၚ်လှဲပြံၚ်အာ ညးမပါလုပ်ဆက်စပ်ဒၟံၚ် ပ္ဍဲကျာဖျ၊ ညးဒးဒုၚ်ဍဵုဍိုက်ပျဲပျာံတံဂှ် ဟီုလဝ်ရ။
ပ္ဍဲကဵု ပွိုၚ်ဍုၚ်ကျာ်ပိ တွဵုရးကရေၚ် နူကဵုဍုၚ်သေံ မထပိုတ်လဝ်ပၟတ်ဂှ်လေဝ် ဆေၚ်ကြုက်ပိုၚ်သီုဖအိုတ် ပါလုပ်သီုကဵု KTV ကာသဳနဝ် ဂကူကြုက်ပိုၚ်တံဂှ် ကၟာတ်လဝ်ဖအိုတ်တုဲ ဒပ်ပၞာန်ဒတုဲဖဵုဒဳမဝ်ကရေဇြဳ DKBA မဒှ်ဂကောံဂွံလဝ်အဝဵုအပ္ဍဲဒေသဂှ် ဗက်စၟဳတ်ဒၟံၚ် ဒၞါဲဂကူကြုက်တံ မံၚ်တန်တဴတံဂှ်လေဝ် ညးဒေသတံ ဟီုရ။
ညံၚ်ရဴ BGF ကီု DKBA လေဝ် ကြဴနူဟီုပ္တိတ်ကၠုၚ် ဟွံဒုၚ်တဲ ကမၠောန်ကျာဖျ ဗ္တိုက်သရိုဟ်အာဏောၚ်တုဲဂှ် ကောန်ဍုၚ်သ္အာၚ် ၂၆၁ တၠ မဒးဒုၚ်သွံစလဝ် နဒးဒုၚ်ပျဲပျာံဒၟံၚ် မစိုပ်ဒၟံၚ်ပ္ဍဲကွာန်ကျံက်ခက် ပွိုၚ်ဍုၚ်မြဝတဳ တိဍာ်ညးတံဂှ် တုဲကၠုၚ်ပ္ဍဲဂိတုဖေဖဝ်ဝါရဳ ၁၂ တေံ လှဲပြံၚ်ကဵုလဝ် ဇရေၚ်သၟိၚ်တၠအဝဵုသေံတံရ။
ပရိုၚ်−သြၚ်လောန်တိုၚ်(မ်)
ဗီု−BGF