နေဗျဳဒဝ်၊ ဖေဖဝ်ဝါရဳ ၁၅
ဟိုတ်နူမၞိဟ်ကၠုၚ်စိုပ်လ္ၚတ် ပေါဲထ္ၜးပျးကပေါတ်ဗၞိက် MSME ကဆံၚ်ကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ်ဂှ် ဂၠိုၚ်တုဲ ပပဵုပ္တိုန်တ္ၚဲကၠောန်ဗဒှ်အာဏောၚ်ဂှ် ဂွံတီကေတ် အတိုၚ်လိက်ပရိုၚ်တြးဝါဒတံ ထ္မံက်ထ္ၜးလဝ်ရ။
နဒဒှ်စၟတ်သမ္တီတ္ၚဲကၟိန်ဍုၚ်ပံၚ်ကောံ မရနုက်ကဵု ၇၈ ဝါတုဲ ပ္ဍဲဂိတုဖေဖဝါရဳ နူစၟတ်တ္ၚဲ ၁၀ စဵုကဵု စၟတ်တ္ၚဲ ၁၄ ဂှ် ကၠောန်ဗဒှ်ကၠုၚ်လဝ် ပေါဲထ္ၜးပျးဗၞိက် MSME ကဵု ပေါဲပြိုၚ်ဂမၠိုၚ် ပ္ဍဲကဵုဗ္ဒါဲခဠာတ်(တပေါၚ်း) ဗ္ဒါဲကျာ်စေတဳ ဥပ္ပါတသန္တိဂှ်တုဲ ပပဵုပ္တိုန်အာၜါတ္ၚဲ ကၠောန်အာစဵုကဵုဂိတုဖေဖဝ်ဝါရဳ ၁၆ ဏောၚ်ဂှ် သ္ဂးရ။
ဂွံပပဵုပ္တိုန်တ္ၚဲ ကၠောန်ဗဒှ်ဂှ်ဝွံ ပပ္တံနူတ္ၚဲပေါဲထ္ၜးပျးဗၞိက်စဂှ် လၟေၚ်တ္ၚဲ ကွးဘာ၊ သ္ဇိုၚ်ဝန် ကေုာံ ဂြောဝ်ဂတာညးတံဂမၠိုၚ်၊ ညးဍုၚ်ကွာန်တံကဵု တၠကမၠောန် MSME တံ ကၠုၚ်စိုပ်ကဵုဇြဟတ် ဂြုဂြုဂြီုဂြီုအိုတ်တုဲ ဟိုတ်နူပါလုပ်လဝ်ညးသ္ကအ် သီုကဵုစိုတ်မလုပ်စ ဗွဲတၟေၚ်ဂှ်ရောၚ် လ္ပာ်ကံၚ်ဇြဳပၞာန် တြးလဝ်ဝါဒရ။
အတိုၚ်ဂလာန် တမ်ရိုဟ်ပရိုၚ်နေပျဳဒဝ်မွဲတၠဂှ်မ္ဂး ပေါဲထ္ၜးပျး MSME ဂှ် သ္ဇိုၚ်ဝန်တံသၟးဟွံက သီုကဵုဂြောဝ်ဂတာညးတံဂှ် ဟွံဒေါအ်ဟွံဂွံ ကဵုအာဗဵုဂှ်ကီု၊ ဌာနဝန်ဇၞော်တံကဵု တၠကမၠောန်မဆေၚ်စပ်တံဂှ် ကဵုကၠောန်ကၠုၚ်ပေါဲထ္ၜးပျးတံဂှ်ကီု၊ ကွးဘာတံဂှ်လေဝ် ဘာညးကဵုညး ကဵုကၠုၚ်ဗဵုလဝ်ရ။
တၠကမၠောန် MSME မွဲတၠဂှ်တှ်ေ သွက်ပေါဲထ္ၜးပျးဗၞိက် MSME ဂှ် လ္ပာ်ကံၚ်ဇြဳပၞာန် ဒုၚ်ကဵုခရိတ်မံၚ် ခရိတ်စတုဲ ကဵုတၠကမၠောန်ဂမၠိုၚ် အာထ္ၜးပျးလဝ်တုဲ ပေါဲထ္ၜးပျးဂှ်လေဝ် မုဟွံတၟေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မၞိဟ်အာဂှ်တှ်ေ အာဂှ်အာမံၚ်ရဏောၚ်။ အလဵုအသဳတွဵုရးညးတံ ထံက်ပၚ်ကဵုလဝ်။ အဲဂွံမိၚ်ကေတ်ဂှ်တှ်ေ လ္ပာ်တေံ ထံက်ပၚ်ကဵုတုဲ စဳဇန်ကဵုဒၞါဲဂွံမံၚ်တံရ။ တုဲပၠန် ဍေံတံကဵုဒၟံၚ်သီုခရိတ်စ အရိုဟ်တ္ၚဲ ဟွံတီပုဟ်၊ ကဵုဒၟံၚ်ဗီုဏံဂှ် ဂွံမိၚ်ကေတ်ရ။ SME ဏံဂှ်တှ်ေ ဒးဟီုမ္ဂး တၟေၚ်ၚ်တၟဟ်ဟ်ဟွံသေၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကမၠောန် MSME တံဂှ် ၜိုတ်ဆကၠောန်ကၠုၚ် နဒဒှ်ပေါဲထ္ၜးပျးဗၞိက်သာ်ဏံသၟးဂှ် ကမၠောန်ဂမၠိုၚ် တောတက်ကၠုၚ်မာန်ဟွံသေၚ်တုဲ ညံၚ်ကမၠောန်ဂွံတောတက်ဂှ် ဒးရီုဗၚ်ကဵုအာ ညံၚ်ခရိတ်အိုတ် ပ္ဍဲပရေၚ်ကၠောန်ပ္တိတ်ဗၞိက်တံ ဂွံစှ်ေဂှ်မှ တောတက်ကၠုၚ်ဏောၚ်ဂှ် ညးဆက်ဟီုရ။
မွဲလ္ပာ်ဂှ်တှ်ေ ကံၚ်ဇြဳပၞာန်ဝွံ ကမၠောန် MSME တံ ဂွံသၠဲကမၠောန်မာန်ဂှ် ပ္ဍဲကဵုတိုက်သြန်ပရေၚ်ပိုန်ဒြပ်ဍုၚ်ဗၟာ၊ တိုက်သြန်ဖောအ်ဗြေဝ်ဝါဗ္ၚဍုၚ်ဗၟာ ကေုာံ ပ္ဍဲကဵုတိုက်သြန်ပုဂ္ဂလိက ၁၆ တံ အာတ်ပ္တိုန်သြန်ဂလေံမာန်ရောၚ် လလောၚ်တြးလဝ်ကီုလေဝ် ဂွံဂွံသြန်ဓလေံဂှ် အခက်အခုဲနွံဒၟံၚ်တၟာဂလိုၚ်ရောၚ် တၠကမၠောန် MSME တံ သ္ဂးအိုတ်ရ။
ဍုၚ်ဗၟာဝွံ ကြဴနူပၞာန်သီအဝဵုတုဲဂှ် ကဵုပၟတ်ဓာတ်လလဳ ပေၚ်ၚ်ဟွံမာန်ကီု၊ ခရိတ်ကၠောန်ပ္တိတ် ကေုာံ ခရိတ်ကပေါတ်ဗၞိက်အပြောံတံ သၠုၚ်တိုန်ကၠုၚ် ကဵုဆကီု၊ ဟိုတ်နူသၞောဝ်ယိုက်လျိုၚ်ပၞာန်တံဂှ်တုဲ ကောန်ကလောန်စိုန်သကီုဂမၠိုၚ် အောန်စှ်ေကၠုၚ်တုဲ ကမၠောန် MSME ဗွဲမဂၠိုၚ် ဒးဒေါအ်ဇူကၠုၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI