မတ်မလီု၊ ဖေဖဝ်ဝါရဳ ၁၈
ပ္ဍဲတွဵုရးဍုၚ်မန် ပွိုၚ်ဍုၚ်ဗွဲမဂၠိုၚ်ဂှ် ဟိုတ်နူဂကောံရပ်လွဟ်ကရေၚ်ၜါဂကောံ ရာန်ပကောံကၠုၚ်ဒၟံၚ်ကၠေၚ်စက် ဗွဲမဂၠိုၚ်ဂၠေၚ်ဂှ်တုဲ ကၠေၚ်စက်ပိုတ်တံ ကလေၚ်ဒှ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ရပ်လွဟ်ကရေၚ်ၜါ ဒပ်မၚ်ပယျဵုကရေၚ် BGF ကဵု ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA တံဝွံ အပ္ဍဲတ္ၚဲအကြာတံဏံဂှ် ဂွံအခေါၚ်နူကံၚ်ဇြဳပၞာန်တုဲ ရာန်ပကောံကၠုၚ်ဒၟံၚ် ကၠေၚ်ဒဳဇြေဝ် ပ္ဍဲကဵုဆေၚ်ကၠေၚ် မၞုံအပ္ဍဲတွဵုရးတံဂှ်ရ။
ကြဴနူဂှ်တုဲ ပ္ဍဲကဵုဆေၚ်ကၠေၚ်စက် မၞုံအပ္ဍဲတွဵုရးတံဂှ် မ္ၚးနူကဵုကၠေၚ်ဒဳဇြေဝ်ဂှ် ဂကူကၠေၚ်စက်တၞဟ်ဟ်တံလေဝ် ပိုတ်အိုတ်ကၠုၚ်ဒၟံၚ်တုဲ အကာဲအရာဒးမၚ်ရာန်တံ ထပ်က္တဵုဒှ်ဒၟံၚ်ရ။
“လၟုဟ်ဂှ် လျိုၚ်ပရေၚ်ပိုန်ဒြပ် ဂကောံရပ်လွဟ်တံဂှ်ဂးတုဲ ကျိုၚ်လဝ်ယူနဳဝှမ်တုဲ ကၠုၚ်ရာန်ဒၟံၚ်။ ရာန်ဒၟံၚ်ကၠေၚ်ဒဳဇြေဝ်ဂှ်ဂၠိုၚ်။ ကၠေၚ်ဓာတ်ဂှ်အောန်။ ပ္ဍဲကဵုဆေၚ်ကၠေၚ်တံဂှ် ရာန်ကေတ်ကဵုစေဝ်တုဲ ဖ္ဍိုက်ဏာဒၟံၚ်ရ။ ပ္ဍဲကဵုဆေၚ်ကၠေၚ်တံဂှ် ဒဳဇြေဝ်ဂှ်တှ်ေ ရာန်ဟွံဂွံဟဂှ်ရ။ ကၠေၚ်ဓာတ်ဂှ် ဂွံ။ တိုန်အာသီုၚုဟ်ဍေံရ” သာ်ဝွံ ညးဒေသမန် ဟွံမိက်ထ္မံက်ယၟုမွဲတၠ ဟီုရ။
သွက်ဂွံဗ္တိုက်သ္အး ကမၠောန်ကျာဖျတံဂှ်ဂးတုဲ စနူဂိတုဖေဖဝ်ဝါရဳ ၅ တုဲကၠုၚ်တေံတုဲ လ္ပာ်ဍုၚ်သေံ စထပိုတ်ကၠုၚ်လဝ် ကၠေၚ်စက်ကဵု ပၟတ်ဓာတ်လလဳ မသွံတြးကဵုဒၟံၚ် ဍုၚ်မၞုံပယျဵု လ္ပာ်ဍုၚ်ဗၟာ နွံမွဲဒမြိပ်ပယျဵုသေံ−ဗၟာတံဂှ်ရ။
ကြဴနူဂှ်တုဲ BGF ကေုာံ DKBA တံဝွံ ဂွံဂွံကၠေၚ်စက်ဂှ် မ္ၚးနူကဵုတွဵုရးကရေၚ် ပွိုၚ်ဍုၚ်ဘာအၚ်၊ ပွိုၚ်ဍုၚ်လိုၚ်ဗၠဲဂှ် ပ္ဍဲကဵုတွဵုရးဍုၚ်မန် ပွိုၚ်ဍုၚ်ဗွဲမဂၠိုၚ်ဂှ်လေဝ် ရာန်ကေတ်ကၠေၚ်စက် ဗွဲအဓမ္မတုဲ ပလံၚ်ပ္တိုန်သွံတြးဒၟံၚ် ဍုၚ်မြဝတဳ၊ ဍုၚ်ယှိုဲကုက္ကိုဝ် ကေုာံ ဍုၚ်ကျာ်ပိတံရ။
မွဲလ္ပာ်ဂှ်ပၠန် ကောန်အရာပ်တံ ဖ္ဍိုက်ပ္တိုန်ကၠေၚ်စက် နကဵုကွဳစက်သ္ၚိ၊ ကွဳစက်အာတရဴ ယာန်ဖ္ဍိုက်ဗၞိက်တံဂှ်မ္ဂး လ္ပာ်ကံၚ်ဇြဳပၞာန် ရပ်စပ်သီကၠုၚ်လဝ်တံနွံကီုလေဝ် ယဝ်ဒှ်ဂကောံ BGF, DKBA တံမ္ဂး ပရေၚ်ရပ်ဒက်သီဂိုၚ်ကၠုၚ်တံ ဟွံမွဲမွဲသာ်တုဲ ကဵုလဝ်အခေါၚ်ရ။
ဟိုတ်နူကၠေၚ်စက်ပိုတ်အိုတ်ကၠုၚ်ဂှ်တုဲ တိုၚ်တာဝါ ဖုၚ်အဝ်ပရေတာ အပ္ဍဲဒေသတံ၊ ကွဳစက်ဖ္ဍိုက်ဗၞိက်ဇၞော်ဇၞော်တံ၊ ယာန်ဖ္ဍိုက်မၞိဟ်အာတရဴတံ ကမၠောန်ပရေၚ်ပိုန်ဒြပ်တံဒှ်တမ် ကမၠောန်ဂွံဂေတ်ဂြိပ်ဂှ် ဒှ်ကၠုၚ်အခက်အခုဲရ။
အပ္ဍဲဒေသဂှ် ကၠေၚ်စက်ပိုတ်ဒၟံၚ်ကီုလေဝ် လ္ပာ်ကံၚ်ဇြဳပၞာန် တွဵုရးဍုၚ်မန်ဂှ်တှ်ေ ဒဵုကဵုအခိၚ်လၟုဟ် သောၚ်ကလးကၠုၚ်လဝ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ