ကမမံၚ်၊ ဖေဖဝ်ဝါရဳ ၁၉
တွဵုရးကရေၚ် ခရိုၚ်ဘာပန် ပ္ဍဲဍုၚ်ကမမံၚ် ဒၞါဲအကြာဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ ၅ ကဵု ဒပ်ကံၚ်ဇြဳပၞာန်တံ ပရေၚ်ပၞာန်ကြံၚ်မ္ၚိုဟ်ဒၟံၚ်ဂှ် လ္ပာ်ကံၚ်ဇြဳပၞာန် ထပ်ဗပေၚ်ကၠုၚ်ဒၟံၚ်ဇြဟတ်ဒပ်ရောၚ် ညးမၞုံအခေါၚ်ဟီုဂး ဒပ်မဟာ ၅ KNLA သ္ကိုပ်ဗိုလ်ဇၞော် သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ ၁၄ တုဲ ဒပ်ကံၚ်ဇြဳပၞာန် ကၠောန်ကၠုၚ်လဝ် ပရေၚ်ပန်ပှော်လွဟ်ဇၞော် ကေုာံ ပၞာန်ကျာ လ္တူဍုၚ်ကမမံၚ်ကဵု ကွာန်နွံဗ္ဒါဲဗ္ဒါဲတံဂှ်တုဲ သ္ၚိညးဒေသ နွံပ္ဍဲကွာန်ဂမၠိုၚ် ဇီုကပိုက်လီုလာ်အာလဝ် တၟာဂလိုၚ်ရ။
ဒပ်မဟာ ၅ KNLA တံ ကၠုၚ်စိုပ်ဗ္တိုက် ဍုၚ်ကမမံၚ်ဂှ် ဒပ်ကံၚ်ဇြဳပၞာန် ဂွိၚ်တုဲ ဗ္တိုက်ကၠုၚ်လဝ်ကွာန်တံဏံ နကဵုလွဟ်ဇၞော်၊ နကဵုပၞာန်ကျာ သာ်ဏံရောၚ်တုဲ ထပ်ပပဵုပ္တိုန်ဇြဟတ်ဒပ်လေဝ် နွံဒၟံၚ်ဂှ် သ္ကိုပ်ဗိုလ်ဇၞော်သဝ်ကလာဒိုဝ် သ္ဂးရ။
ကောန်ကွာန်ညးဒေသတံဂှ်တှ်ေ ဂွိၚ်ဒၟံၚ်ကဵု ပရေၚ်ဒပ်ကံၚ်ဇြဳပၞာန် ထောံမခတိုဟ်ဗ္တိုက်ကဵုပၞာန်ကျာတံကဵု ပေါဲဗ္တိုက်ၜါလ္ပာ် ဒှ်ကၠုၚ်တံဂှ်တုဲ ပါဲဒၟံၚ်ပၞာန် လ္ပာ်ဒေသမျာၚ်ကျဳၚူ လ္ပာ်ဍုၚ်ကမမံၚ်တေံ နွံဒၟံၚ်ရ။
မ္ၚးနူကဵုညးဒေသ လ္တူဍုၚ်ကမမံၚ်တံဂှ် ညးဒေသဗွဲမဂၠိုၚ် နူကဵုကွာန် (ဖားဘောၚ်၊ ကပ်ကျော်၊ မဲသနပ်ခီး) နွံဗ္ဒါဲဍုၚ်တံဂှ်ဝွံ ပါဲဒလေတ်ဂြိပ်တိတ်ကၠုၚ် အပ္ဍဲဒေသမျာၚ်ကျဳၚူတုဲ ညးဍုၚ်ကွာန်ဒေသလ္ၚဵုတံဂှ်တှ်ေ ဒးပါဲဒလေတ်ဒၟံၚ်ဘဲပၞာန် ပ္ဍဲကွာန်မၞုံဗ္ဒါဲဍုၚ်ကမမံၚ်တံကဵု ဍုၚ်ဘာအၚ်တံဂှ်ရောၚ် ဂွံတီကေတ် နူကဵုတမ်ရိုဟ်ပရိုၚ်ဒေသတံရ။
လ္တူဍုၚ်ကမမံၚ် နွံပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် ဗျူဟာပၞာန် ဒပ်ကံၚ်ဇြဳပၞာန် ဖျေံလဝ်သ္ဇိုၚ် နွံမွဲတုဲ ဂၠံၚ်တိတ်ဍုၚ်ကမမံၚ်ဂှ် ဌာန်ဂအုပ်တမ်ဒပ် ဒပ်မၚ်ပယျဵုကရေၚ် BGF မွဲလေဝ် နွံဒၟံၚ်ရ။
ဒပ်မဟာ ၅ KNLA ဂှ်တှ်ေ စနူကၞောတ်သၞာံတုဲကၠုၚ်တေံတုဲ ဗ္ဒိုပ်ဒပ်ကံၚ်ဇြဳပၞာန် နွံလ္တူဂၠံၚ် ကမမံၚ်−ဘာပန် ခရိုၚ်ဘာပန်ဂှ် သီကၠုၚ်လဝ် မွဲတုဲမွဲတုဲ အခိၚ်လၟုဟ် စိုပ်ကၠုၚ်ဒၟံၚ် ဗ္ဒါဲဍုၚ်ကမမံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media