တၞၚ်သဳ၊ ဖေဖဝ်ဝါရဳ ၁၉
ဟိုတ်နူဒပ်ကံၚ်ဇြဳပၞာန် ထောံကၠုၚ်မခတိုဟ် နကဵုက္ၜၚ်ကျာ ပ္ဍဲကွာန်ညံၚ်ပေန်ကွေန် ပွိုၚ်ဍုၚ်တၞၚ်သဳ ရးတၞၚ်သဳဂှ်တုဲ သ္ၚိ ၂၀ မပြၚ် ပၟတ်တူလီုလာ်အာလဝ်ဂှ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်ပွိုၚ်ဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဖေဖဝ်ဝါရဳ ၁၇ ဇိုၚ်သဝ်တ္ၚဲ ၜိုတ် ၅ နာဍဳဂှ် ထောံကၠုၚ်လဝ်ခတိုဟ် ဗ္တိုက်လဝ် ကွာန်ညံၚ်ပေန်ကွေန် နကဵုက္ၜၚ်ကျာ ပန်ဝါရ။
ဟိုတ်နူပရေၚ်ထောံမခတိုဟ်ဂှ်တုဲ တိုက်ရံၚ်လိက်မွဲမ မပါလုပ်၊ သ္ၚိညးဒေသ ၂၀ ပြၚ် ပၟတ်တူဒှ်အာလဝ်ဆောံကီုလေဝ် မၞိဟ်ဇီုကပိုက်ဂွံဝပ် ဟွံမွဲပုဟ်ဂှ် သ္ဂးရ။
ကၠာဒပ်ကံၚ်ဇြဳပၞာန် ဟွံဂွံထောံမခတိုဟ် ကုကွာန်ညံၚ်ပေန်ကွေန်ဂှ် ပ္ဍဲကဵုတ္ၚဲဂှ် အခိၚ်နူဂယးဂှ် ဗ္ဒါဲကွာန်ညံၚ်ပေန်ကွေန်ကဵု တုၚ်ဃောန်ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ပေါဲဗ္တိုက်သ္ကာတ်မြဟ်လဝ်ရ။
ညးဒေသ ကွာန်ညံၚ်ပေန်ကွေန်ဂမၠိုၚ်ဝွံ မ္ၚးနူကဵုပေါဲဗ္တိုက်ၜါလ္ပာ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတံဂှ်တုဲ ကြပ်အလုံကွာန်မွဲ ဒးပါဲဒၟံၚ်ဘဲပၞာန်ရ။
ဒပ်ကံၚ်ဇြဳပၞာန်ဝွံ စနူဂိတုဒဳဇြေမ်ဗာ ၁၈ တုဲကၠုၚ်တေံတုဲ သွက်ဂွံကလေၚ်ထိၚ်ဒက် သ္ကုတ်ဂၠံၚ်မဝ်ဒံၚ်−တၞၚ်သဳဂှ် ပ္တိတ်ကၠုၚ်ဇြဟတ်ဂှ်ရ ပေါဲဗ္တိုက်တံ က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ