မတ်မလီု၊ ဖေဖဝ်ဝါရဳ ၁၉
ဒပ်ကံၚ်ဇြဳပၞာန် ကျဒၟံၚ်ပၞာန် ဇၟာပ်ပေါဲဗ္တိုက်အလုံဍုၚ်မွဲဂှ်ဝွံ သွက်ဂွံဗပေၚ်ဇြဟတ်ဂှ် ဂယိုၚ်ပ္တိုန်သၞောဝ်ယိုက်လျိုၚ်ပၞာန်တုဲ အပ္ဍဲပွိုၚ်မွဲသၞာံဂှ် ပံက်ကၠုၚ်လဝ် တန်ဗ္တောန်ကွတ်ပၞာန် စဵုကဵုလၟေၚ် ၁၀ ရ။
သၞောဝ်ယိုက်လျိုၚ်ပၞာန်ဂှ် ဥူတာန်ယှိုဲ တၠအဝဵုပၞာန်တြေံ စၞောန်ပျးကၠုၚ်လဝ် ပ္ဍဲသၞာံ ၂၀၁၀ တေံတုဲ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ဂယိုၚ်ပ္တိုန်လဝ်လမျီု တုဲကၠုၚ်သၞာံ ၂၀၂၄ ဂိတုဖေဖဝ်ဝါရဳ ၁၀ ဂှ်ရ။
အတိုၚ်သၞောဝ်ယိုက်လျိုၚ်ပၞာန်ဂှ်မ္ဂး တန်ဗ္တောန်ကွတ်ပၞာန်လၟေၚ် ၁၀ ဂှ် ပ္ဍဲဂိတုဖေဖဝ်ဝါရဳ ၁၇ တေံ ပံက်လဝ် ပ္ဍဲကဵုဌာန်ဂအုပ်ပၞာန်ရး ၆ ဒၞါဲဂှ် လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်လဝ်ပရိုၚ် မွဲဟာန်ကေုာံဗီုဓာတ်ဂမၠိုၚ်ရ။
ပ္ဍဲအရာပကောံကောန်ပၞာန်တံဂှ် ကၠာတေံမ္ဂး စန်ဒက်ကၠုၚ် သၟာကမၠောန်ဆုဲပြံၚ်တံ၊ ညးဒိုက်ဝါတ်တံ နကဵုသြန်ကီု၊ ရပ်ဒက်တံၚ်ပပဝ်တာ ဗွဲအဓမ္မတံ နွံလဝ်တုဲ ဗွဲကြဴဏံဂှ် ပလံၚ်ဗစိုပ်လိက်ဘိက် ပ္ဍဲသ္ၚိတံတုဲ ရပ်ကော်ဏာ မွဲတဲဓဝ် ဒှ်ကၠုၚ်ဒဵုကဵုကဆံၚ်ဏံရ။
“လၟုဟ်ဂှ်တှ်ေ ဍေံတံ ကဵုကံက်မာဲဂှ် ဟွံမွဲရပုဟ်။ ချူနၚ် လိက်မွဲတၞး။ နူရုၚ်အုပ်ဓုပ် ပလံၚ်နၚ်လိက် ဒဒှ်ရသ္ၚိဏံ ကောန်ညးတံ ဒးအလန် ဒးလုပ်ပၞာန်။ ကၠောန်ကၠုၚ်သာ်ဏံရ။ ကၠောန်ထောံဗီုပြၚ် ကော်ဘိက်ကေတ်” သာ်ဝွံ ညးဍုၚ်ကွာန်မွဲတၠ ဟီုရ။
သ္အာၚ်နူဂှ်ပၠန် သွက်တန်ဗ္တောန်ကွတ်ပၞာန်လၟေၚ် ၁၀ ဂှ် ဟိုတ်နူတၚ်အခက်အခုဲ ကော်စုတ်မၞိဟ်စၞး လိၚ်ကေတ်မၞိဟ်ဝါတ်ဂါတ်တံဂှ်တုဲ ရပ်ဒက်ကေတ်သၟတ် အာကၠုၚ်ဒၟံၚ် အခိၚ်ဗ္တံတံဂှ်တုဲ ပကောံကၠုၚ်ဒၟံၚ်ကောန်ပၞာန်တံ နွံတုဲ ပ္ဍဲပေါဲသ္ဘၚ်တံဂှ်လေဝ် ရပ်ပကောံပကၠုၚ်ဒၟံၚ်ကောန်ပၞာန်တံဂှ် ကၠောန်သ္ပဒၟံၚ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ကံၚ်ဇြဳပၞာန် ကျဒၟံၚ်ပရေၚ်ပၞာန်ဂှ်ဝွံ သွက်ဂွံပကောံကောန်ပၞာန်တၟိဂှ် ကၠာတေံမ္ဂး ရပ်ပကောံကၠုၚ်ဒၟံၚ် မၞိဟ်ဖံက်ပ္ကဝ်အမိၚ်ဒေသန္တရတံသၟးရတုဲ ဗွဲကြဴဏံဂှ် ရပ်ဒက်ကၠုၚ်ဒၟံၚ် အခိၚ်ဟွံရုဲရောၚ် ဟီုရ။
“ဗီုအဲဟီုကၠုၚ်လဝ်ကၠာတေံဂှ်ရဏောၚ်။ ဖံက်ပ္ကဝ်သၞောဝ်ဒေသန္တရ ဥပမာ သုၚ်စောဲဂဥုဲၜူမာဲ၊ မၞိဟ်တြုံၜါတၠ ဍိုက်ကွဳလိုန်ဓာတ်မွဲစွံ ဗီုတံဏံတှ်ေ ရပ်ကၠုၚ်ဂှ်နွံ။ တုဲတှ်ေ ဒဳကွဳစက်လာၚ်ဇြေန်ဟွံမွဲ ကွဳလိုန်ဓာတ်လာၚ်ဇြေန်ဟွံမွဲတံဂှ်တှ်ေ ရပ်ဒက်ကၠုၚ်ဒၟံၚ်ဂှ်နွံ။ ဗွဲကြဴဏံ ဟွံဒးကဵုအခိုက်တှ်ေ ရပ်ဏာဟဂှ်ရ။ ကလေၚ်နုက်ကဵုလှုဲလေဝ်ဂွံ၊ ကဵုလှုဲတုဲ ပ္တိတ်ဟွံဂွံတံလေဝ် နွံဒၟံၚ် တၟာဂလိုၚ်ဂှ် ဂွံမိၚ်ကေတ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ကောန်ဒပ်ဍေံတံ ဇီုကပိုက်ချိုတ်ဂၠိုၚ်ကၠုၚ်ဗက် ပကောံကၠုၚ်သၟတ်အပ္ဍဲဒေသတံ နဒဒှ်ကောန်ဒပ်တၟိတၟိတွဵုဏောၚ်ဂှ်ရ နကဵုညးဍုၚ်ကွာန်ဂမၠိုၚ် စွံသတိတုဲ သ္ဂောံမံၚ်စံၚ်အိုတ်ဂှ်ကီု၊ သွက်ဂွံပံၚ်တောဲကဵု ဂကောံပၠန်ဂတးရပ်လွဟ်တံဂှ် ညးဖ္တိုက်ဖ္အောဝ်လဝ်ရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး ကြဴနူပၠောပ်ကၠုၚ်လမျီု သၞောဝ်ယိုက်လျိုၚ်ပၞာန်ဂှ်တုဲ နူသၞာံ ၂၀၂၄ ဂိတုဨပရဴ စဵုကဵုသၞာံ ၂၀၂၅ ဂိတုဂျာန္နဝါရဳဂှ် သွက်ဂွံယိုက်လျိုၚ်ပၞာန်ဂှ် ညးသၟတ်ဗ္ဒါဲ ၂၄၀၀၀ ဒးဒုၚ်ရပ်လဝ် ဗွဲအဓမ္မရ။
ပရိုၚ်−သြၚ်လောန်တိုၚ်(မ်)
ဗီု−MOI