ဒပ်ကံၚ်ဇြဳပၞာန် တြးလဝ်ဒပ် လ္ပာ်ကွာန်(အောက်ကွင်း) ပွိုၚ်ဍုၚ်ၜဳကလေၚ်

ၜဳကလေၚ်၊ ဖေဖဝ်ဝါရဳ ၂၀

ဟိုတ်နူပရိုၚ် ဒပ်ပၠန်ဂတးတံ လုပ်စိုပ်ဗ္တိုက် ဗ္ဒိုပ်ဒပ်၊ တမ်ဒပ် မဖျေံလဝ်သ္ဇိုၚ်ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ လ္ပာ်ကံၚ်ဇြဳပၞာန် တြးလဝ်ဒပ် ပ္ဍဲကဵုလ္ပာ်ကွာန်(အောက်ကွင်း)တံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ စနူဂိတုဖေဖဝ်ဝါရဳ ၁၃ တုဲ ပ္ဍဲပွိုၚ်ဍုၚ်ၜဳကလေၚ် ကွာန်(အောက်ကွင်း)ဂမၠိုၚ် မပါလုပ်သီုကဵုကွာန် (သစ်တိုကျွန်း၊ ဇုတ်သုတ်၊ အနိုင်းပွန်)တံ ၜိုတ်ထပှ်ကွာန်ဂှ် တြးလဝ်ဒပ်တုဲ လ္ပာ်ဂၠံၚ်ၜဳကလေၚ်−တောင်စွန်းဂှ်လေဝ် မၚ်တောပ်ဗ္တိုက်ဒၟံၚ်၊ လုပ်စၟဳတ်ဒၟံၚ်တံ နွံဒၟံၚ်ရ။

မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုတမ်ဒပ်ဖျေံသ္ဇိုၚ်ၜဳကလေၚ်ဂှ် ဗ္ဂပ်စွံလဝ် သီုကွဳစက်ခြပ်ပသဲ၊ လွဟ်ဇၞော်ဟံၚ်ဝေတ်ဇြာတံတုဲ မွဲမွဲတမ်ဒပ် ဗပေၚ်လဝ်ဇြဟတ် ဂၠိုၚ်ကဵုကၠံရ။

ဒပ်ကံၚ်ဇြဳပၞာန် မလုပ်စၟဳတ်ဒၟံၚ် ပ္ဍဲကဵုဂၠံၚ်ၜဳကလေၚ်−တောင်စွန်းတံဂှ်ဝွံ ရပ်ဒက်ညးသၟတ်ဒေသတံတုဲ ပလံၚ်ဗစိုပ်ဏာဒၟံၚ် ဇရေၚ်တန်ဗ္တောန်ကွတ်ပၞာန်တံ နွံဒၟံၚ်ရောၚ် သ္ဂးရ။

လ္ပာ်ဒပ်ကံၚ်ဇြဳပၞာန်တံ ဟိုတ်နူတြးလဝ်ဒပ်ဂှ်ကီု၊ သီုမၚ်တောပ်ဗ္တိုက်၊ ဂေတ်ဒၟံၚ်ကၚ် သီုဗ္တံသီုတ္ၚဲတံဂှ်တုဲ အပ္ဍဲဒေသ မၞိဟ်တိတ်မ္ၚးအာကၠုၚ် အောန်ကြဳစှ်ေကၠုၚ်ဂှ် ဂွံတီကေတ် အတိုၚ်ဂလာန်ညးဒေသတံရ။

ညးအုပ်ဓုပ်ဂမၠိုၚ် ကေုာံ ကောန်ဂကောံပျူသဝ်ထဳတံ ဒုၚ်ကေတ်ဒါန်ဇရေၚ်ညးဍုၚ်ကွာန်အပ္ဍဲကွာန်တံဂှ်တုဲ ပလံၚ်ကဵုဒၟံၚ်ပုၚ်ဂွဳ ကုကောန်ဒပ်ကံၚ်ဇြဳပၞာန် တြးလဝ်ဒပ် ပ္ဍဲကွာန်တံရောၚ် သ္ဂးရ။

ဗ္ဒိုပ်ဒပ်ကံၚ်ဇြဳပၞာန် အပ္ဍဲပွိုၚ်ဍုၚ်ၜဳကလေၚ်ဂှ် ဟိုတ်နူပရိုၚ်ဒပ်ပၠန်ဂတးတံ လုပ်စိုပ်ဗ္တိုက်ဏောၚ်ဂှ်တုဲ ညးဒေသနူကဵုကွာန် နာတ်ကျဳ၊ ကျာကွေန်၊ မေဝ်လာန်တံ ၜိုတ်တြဴကွာန်ဂှ် ဒစးဒုၚ်ဂြိပ်ဒဴပါဲဒလေတ်ဒၟံၚ်အိုတ်ရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ