ဘာအၚ်၊ ဖေဖဝ်ဝါရဳ ၂၀
တွဵုရးကရေၚ် ပ္ဍဲပွိုၚ်ဍုၚ်ဘာအၚ်ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်ကဵုလွဟ်ဇၞော်တုဲ ညးဒေသ ၇၀၀၀ ပြၚ် နူကဵု ၁၁ ကွာန်ဂှ် ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ခရိုၚ်သဓီု KNU ရ။
စနူဂိတုဖေဖဝ်ဝါရဳ ၁၄ တုဲကၠုၚ်တေံတုဲ နူကဵုတမ်ဒပ်ကံၚ်ဇြဳပၞာန် ခမရ စၟတ် ၄၀၈ ဂှ် ပန်ပှော်ကၠုၚ်ဒၟံၚ်လွဟ်ဇၞော် ပ္ဍဲကွာန်ဒၞါဲညးဍုၚ်ကွာန်ကောန်အရာပ်တံ မမံၚ်တန်တဴဒၟံၚ်ဂှ် သီုဗ္တံသီုတ္ၚဲရ။
ဟိုတ်နူပန်ပှော်ကဵုလွဟ်ဇၞော်တုဲ ညးဍုၚ်ကွာန်ဒေသဂမၠိုၚ်ဝွံ ဖေက်လကိုတ်တုဲ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ဟိုတ်နူလွဟ်ဇၞော်တုဲ ကွာန် ၁၁ ကွာန် ပါလုပ်သီုကဵု (ကျို့ပင်ဆိပ်၊ ဘရားဆိပ်၊ တုတ်ကြီး၊ ဝဲပျံ၊ ဖားပေါင်ရွာကြီး၊ ရွာလေး၊ မီးဇိုင်း၊ ကပ်ကျော်) ဂှ် ဂြောဝ်ဂတာ ၁၂၃၀ ၊ လၟိဟ်မၞိဟ် ၇၀၀၀ ပြၚ် ဒးပါဲဒလေတ်ဒၟံၚ်ရ။
ညးဒေသ ဒးဂြိပ်ပါဲဒလေတ်ဒၟံၚ်တံဝွံ မံၚ်ဒၟံၚ် အပ္ဍဲကၠအ်ဂူဝါတံကဵု အပ္ဍဲထီုတၟအ်တံဂှ်တုဲ နွံပၟိက်ဒၟံၚ်ကဵု အရီုဗၚ်ဂၠိက်ယာတ်၊ ဇွောံမစၞစ၊ ဂဥုဲဇဗ ကေုာံ ကၟဳဒဒၚ်တံဂှ် ညးအုပ်ကာ ခရိုၚ်သဓီု KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်တၚ်နၚ် ဗော်သွးကောန်ဂကူကရေၚ် KNU ခရိုၚ်သဓီုဂှ်မ္ဂး အပ္ဍဲဂိတုဖေဖဝ်ဝါရဳဏံ ပ္ဍဲကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပ္ဍဲပွိုၚ်ဍုၚ်ဘာအၚ်တံဂှ် ဟိုတ်နူပရေၚ်ဒပ်ကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဒေသမွဲဠက်ပြၚ် ဒးပါဲဒၟံၚ်ဘဲပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ