မတ်မလီု၊ မေ ၂
ပ္ဍဲတွဵုရးဍုၚ်မန် လ္တူဍုၚ်မတ်မလီုဂှ် ထ္ၜးဟိုတ်ကဵုမံၚ်ဒးပ္ဍဲတိ ဟွံဂွံလဝ်အခေါၚ်ဂှ်တုဲ ကံၚ်ဇြဳပၞာန်တွဵုရး သီကေတ်လဝ် တိညးဍုၚ်ကွာန်တံပိုၚ် ဗွဲအဓမ္မတုဲ ထ္မံက်ဒၟံၚ်အရာပ်တၟိရောၚ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်တွဵုရးဝွံ စနူဂိတုမာတ်တုဲကၠုၚ်တေံတုဲ နကဵုတၚ်ထ္ၜးဟိုတ်မံၚ်ၜက်ဒးဂှ် ရိုဟ်ပလီုလဝ် သ္ၚိညးဍုၚ်ကွာန်ပိုၚ် ပ္ဍဲကဵုအရာပ်လှိုၚ် ကဵု အရာပ်သာယာအေ ဍုၚ်မတ်မလီုဂှ်တုဲ သီကေတ်လဝ်ရ။
အခိၚ်လၟုဟ် ကံၚ်ဇြဳပၞာန်တွဵုရးဝွံ လ္တူအရာပ်တၟိ မသီကေတ်လဝ် ဇရေၚ်ညးဍုၚ်ကွာန်တံဂှ် ဂးကၠုၚ် ကိုန်စဳမာန်လှိုၚ်ရတနာတုဲ ဗဝ်တိ၊ ဖံက်ဂၠံၚ်၊ ဖံက်ဂအာၚ်တိသၟးဟွံက ပစူကၠုၚ်ဒၟံၚ် သီုတိုၚ်ပၟတ်ရ။
ညးဒေသမတ်မလီု ဟွံမိက်ထ္မံက်ယၟုမွဲတၠဂှ်တှ်ေ အခိၚ်သီကေတ်လဝ်တိညးဒေသဂမၠိုၚ် နကဵုဟိုတ်မံၚ်ၜက်ၜေတ်ဒးဂှ် ဟိုတ်နူဒှ်တိဗ္ၚတုဲ သိုၚ်စမြိုၚ်ဟွံဂွံပုဟ်ဂးတုဲ ထ္ၜးလဝ်ဟိုတ်ကီုလေဝ် အခိၚ်လၟုဟ် အလဵုကံၚ်ဇြဳပၞာန် သီတုဲ သွံစဒၟံၚ်ဂအာၚ်တိရောၚ် ဟီုရ။
“ဍေံတံဂှ် ထ္ၜးဟိုတ်ကဵုသၞောဝ်ဥပဒေတုဲ ကလေၚ်သီကေတ် တိညးဍုၚ်ကွာန်တံရ။ သီတုဲ ထ္ၜးဟိုတ်ကဵု ကိုန်စဳမာန်ဏံပၠန်။ ပစူအလာံတုဲ ဓဇက်ထောံလဝ်ဂၠံၚ်မွဲတၞုၚ်။ တိဟွံဗၠးအဏံ သီုဖအိုတ်ဂှ် သီထောံလဝ်ရ။ သီတုဲ ဖံက်ဂၠံၚ်ဏောၚ် ရန်လဝ်။ ရန်လဝ်တုဲမှ တိသှ်ေဒၟံၚ်ဗ္ဒါဲဗ္ဒါဲတံဂှ် သွံစဒၟံၚ် ၁၄၀၀ ကိုဋ်၊ ၁၅၀၀ ကိုဋ်ရောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ညးမမံၚ်ကၠုၚ်လဝ်နူတမ်မူလ ညးဒးဒုၚ်ပါဲကဵုလဝ် နကဵုဟိုတ်မံၚ်ဒးပ္ဍဲတိ ဟွံဂွံလဝ်အခေါၚ်တံဂှ် သောၚ်ကလးကဵု ပရေၚ်ညးတံဒးဂိဂှ် ဟွံမွဲမွဲသာ် ကၠောန်ကၠုၚ်ဒၟံၚ်အရာပ်တၟိသာ်ဏံဂှ်ဝွံ ဒှ်ဟွံထေက်တုဲ ကံၚ်ဇြဳပၞာန်ဝွံ ရံၚ်သွက်ဖဵုဍေံတံသၟးရတုဲ ရပ်စပ်ကၠုၚ်ဒၟံၚ်ညးဍုၚ်ကွာန်တံရောၚ် ညးပါ်ပါဲလဝ်ရ။
ညးဒေသမွဲတၠ ဒးဒုၚ်ပါဲကဵုလဝ် နကဵုဟိုတ်မံၚ်ဒးပ္ဍဲတိတံဏံဂှ်တှ်ေ လ္ပာ်ကံၚ်ဇြဳပၞာန် ဟိုတ်နူကဵုဆုဲပြံၚ်ကၠုၚ် ဗွဲအဓမ္မ တုဲ ညးဍုၚ်ကွာန်လ္ၚဵုတံဝွံ ဒၞါဲမံၚ်ဟွံမွဲရတုဲ ဒးအာမံၚ်ဒၟံၚ် ပ္ဍဲဘာကျာ် ကေုာံ ပ္ဍဲဘာလကျာ်ဂမၠိုၚ်ရောၚ် ဟီုရ။
“ (ကျူးကျော်) ဏံဟီုဂှ် ညံၚ်ရဴတိဒပ်ပၞာန်ပိုၚ်ကီုရဏောၚ်။ ဒးမံၚ်ဗီုလဵုရောဟီုတှ်ေ လ္ၚဵုဂှ် လိၚ်မံၚ်သ္ၚိ။ ရဲတိနွံဂှ်ပၠန်လေဝ် ဒးဒုၚ်ပလီုလဝ်တံ သ္ၚိဆုမ္ဂး ဒးကလေၚ်သိုၚ်ဒၟံၚ်။ ဒၞါဲလ္ၚဵုတံဂှ်တှ်ေ လ္ၚဵုဂှ်ပၠန်လေဝ် လိၚ်တိတုဲ ကလေၚ်သိုၚ်ဒၟံၚ်။ လ္ၚဵုဂှ်ပၠန်လေဝ် မံၚ်ဒၟံၚ်ပ္ဍဲဘာကျာ်၊ ဘာလကျာ်တံရ” သာ်ဝွံ သ္ဂးရ။
ကိုန်စဳမာန် ကၠောန်အရာပ်တၟိ လှိုၚ်ရတနာဏံဂှ် ကံၚ်ဇြဳပၞာန် ကေုာံ ဥူမိုဝ်ကျဝ် မဒှ်တၠရုၚ်ဂဥုဲၚိုဲမိုဝ် ကဵု တၠဟဝ်တေဝ်ၚိုဲမိုဝ်တံ ပံၚ်တောဲကၠောန်လဝ်ဏောၚ် ညးမစုက်လုက်ကဵုကံၚ်ဇြဳပၞာန်ဂမၠိုၚ် ဟီုရ။
ဂအာၚ်တိ တိတ်ကၠုၚ် နူကဵုကိုန်စဳမာန်အရာပ်တၟိ လှိုၚ်ရတနာဂှ် သွံတြးကဵုအာ ညးမဒးယိုက်လျိုၚ်ပၞာန်တအ်တုဲ ဒးလေဲသြန် မွဲတဲဓဝ်ဟွံသေၚ် သာ်ဝွံ ပရိုၚ်တိတ်ဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်ဟွံမာန်ရ။
ကံၚ်ဇြဳပၞာန်တွဵုရးဝွံ သွက်ဂွံထ္မံက်ရုပ်ရဴ ကိုန်စဳမာန်အရာပ်တၟိ လှိုၚ်ရတနာဂှ် ဖာဲပ္တိတ်လဝ် သ္ၚိဂၠိုၚ်ကဵုကၠံ နူအပ္ဍဲတိ ဨကဍေံမၞုံ ၁၁ ဒဿမ ၂၃၉ မဂွံလဝ်အမိၚ် လန/၃၉ နကဵုယၟုသ္ကိုပ်အုပ်ဓုပ် ဂကောံဖောအ်ဗြေဝ်ပွိုၚ်ဍုၚ် မၞုံအပ္ဍဲအရာပ်လှိုၚ် ကဵု အရာပ်သာယာအေရ။
ပ္ဍဲဍုၚ်မတ်မလီုဂှ် ကိုန်စဳမာန်အရာပ်တၟိ လှိုၚ်ရတနာ ကံၚ်ဇြဳပၞာန် မထ္မံက်ဒၟံၚ်ဂှ် ကၠောန်ဗီုပြၚ်လဵုတုဲ သွံတြးအာဗီုပြၚ်သာ်လဵုရောဟီုဂှ် ကံၚ်ဇြဳပၞာန် သောၚ်ထ္ၜးကဵုလဝ် ဗွဲမကၠးမှးဟွံမွဲပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− CJ