တၞၚ်သဳ၊ ဖေဖဝ်ဝါရဳ ၂၀
ပ္ဍဲရးတၞၚ်သဳဂှ် ဟိုတ်နူပေါဲဗ္တိုက်ၜါလ္ပာ်၊ သီုကဵုပရေၚ်ဗ္တိုက်ပၞာန်ကျာတံဂှ်တုဲ ညးမ္ဒးထောံလသာဌာန်ဒၟံၚ် ဒးပါဲဒလေတ်ဒၟံၚ်တံ ဂၠိုၚ်တိုန်ကၠုၚ် စဵုကဵုထပှ်ဠက်ဘာ်ပြၚ်ဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ရ။
အပ္ဍဲဂိတုဂျာန္နဝါရဳတုဲကၠုၚ်တေံ သွက်ဂွံၚးတးတိဍာ်ဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်လဝ် လ္ပာ်ဂၠံၚ်ပျဳထံၚ်သု ဂၠံၚ်ဇၞော်သွံရာန်ဗၞိက်ဂှ်ကဵု လ္ပာ်ဒေသသၞေဟ်ဍာ်ဒမျိုဟ်တုဲ ဟိုတ်နူပရေၚ်ပန်ပှော်ဗ္တိုက် နူက္ၜၚ်ကျာ ကေုာံ နူပၞာန်ဍာ်တံဂှ်တုဲ ညးဒးထောံလသာဌာန်ဒၟံၚ် ဒးဂြိပ်ဒဴတံ ဂၠိုၚ်တိုန်ကၠုၚ်လဝ်ရ။
အပ္ဍဲခရိုၚ်ထဝါဲ ပွိုၚ်ဍုၚ်ထဝါဲ၊ လံၚ်လုၚ်၊ ဍာ်ဗု ကေုာံ ပွိုၚ်ဍုၚ်တယိတ်ချံၚ်တံဂှ် ဟိုတ်နူပေါဲဗ္တိုက်ၜါလ္ပာ် ကဵု ဟိုတ်နူထ္ပက်ကၠုၚ်ဒၟံၚ်ပၞာန်တံဂှ်တုဲ ညးဍုၚ်ကွာန် ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တံ သဝ်အိုတ် ၃၇၃၀၀ ပြၚ် နွံရောၚ် သ္ဂးရ။
သ္အာၚ်နူဂှ်ပၠန် ဒဵုကဵုအခိၚ်လၟုဟ် ပွိုၚ်ဍုၚ်တၞၚ်သဳ ဒၞါဲပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ်ကီု ဟိုတ်နူပရေၚ်ဗ္တိုက်ထောံမခတိုဟ် နကဵုပၞာန်ကျာတံဂှ်တုဲ အပ္ဍဲခရိုၚ်ဗိက် နူပန်ပွိုၚ်ဍုၚ်ဂှ် ညးဒေသ ၃၉၉၀၀ ပြၚ် နွံရောၚ် ထ္မံက်ထ္ၜးလဝ်ရ။
သွက်ဂွံထိၚ်ဒက်ဂၠံၚ်ပယျဵု တၞၚ်သဳ−မဝ်ဒံၚ်ဂှ်တုဲ ပပ္တံနူသၞာံတုဲကၠုၚ် ဂိတုဒဳဇြေမ်ဗာဂှ်တုဲ အကြာဒပ်ပံၚ်ကောံ ဇြဟတ်ပၠန်ဂတးတံကဵု ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတုဲ ညးဒေသ ဒးပါဲဘဲပၞာန် အပ္ဍဲပွိုၚ်ဍုၚ်တၞၚ်သဳမွဲဓဝ်ဂှ် နွံကၠုၚ် ဗ္ဒါဲၜါဠက်ရ။
ပ္ဍဲကဵုဏံ ညးမံၚ်တန်တဴဒၟံၚ် ပ္ဍဲဗ္ဒိုပ်ပါဲဘဲပၞာန်ပဠဝ်ဂှ် နွံဒၟံၚ်ပွဳပွူ ၃၀၀၀ ရတုဲ ညးမသှ်ေဒၟံၚ်တံဂှ်တှ်ေ ပါဲဒလေတ်အာ လ္ပာ်လ္တူဍုၚ်တံကဵု ပ္ဍဲဒဵုဂြိုပ်၊ ကၠအ်ဂူဝါ ဒၞါဲမကြပ်တံဂှ်ရ။
ဗွဲတၟေၚ် ဒၟါနူအရီုဗၚ်အမေရိကာန် USAID ဒေါအ်ဒေၚ်အာဂှ်တုဲ ဒးဇီုကပိုက်အာလဝ် ကမၠောန်ကဵုရီုဗၚ် ဂကောံပါဲဘဲပၞာန် အပ္ဍဲရးတၞၚ်သဳဂှ်တုဲ ကပေါတ်သ္ဂောံထံက်ပၚ်ညးပါဲဘဲပၞာန်တံလေဝ် သာခက်ခုဲကၠုၚ်လဝ်တုဲ ညးပါဲဘဲပၞာန်လ္ၚဵုတံဝွံ ဟွံဂွံအရီုဗၚ် ဂၠိုၚ်ကဵုဂိတုတုဲ ဒှ်ဒၟံၚ်အခက်အခုဲရောၚ် သ္ဂးရ။
ပ္ဍဲရးတၞၚ်သဳဂှ်တှ်ေ စိုပ်ကၠုၚ်ရာသဳဗြဲကျာတၟးဏံဗက် ပရေၚ်ဒပ်ကံၚ်ဇြဳပၞာန်ထ္ပက်ကရောၚ်ပၞာန် လုပ်စိုပ်ကၠုၚ်ဂှ်ဝွံ က္တဵုဒှ်ဒၟံၚ်ကြပ်စၟအ်ပွိုၚ်ဍုၚ်တုဲ လၟိဟ်ညးပါဲဘဲပၞာန်တံလေဝ် သၠုၚ်တိုန်ကၠုၚ်ဒၟံၚ် မွဲဂိတုတုဲမွဲဂိတုရ။
သၞာံတုဲကၠုၚ် ဂိတုဒဳဇြေမ်ဗာတေံ ပ္ဍဲရးတၞၚ်သဳဂှ် ဟိုတ်နူပေါဲဗ္တိုက်အကြာဒပ်ကံၚ်ဇြဳပၞာန်ကဵု ဇြဟတ်ပၠန်ဂတးတံဂှ်တုဲ ညးဒးထောံလသာဌာန်ဒၟံၚ် ဒးဂြိပ်ပါဲဒဴဘဲပၞာန်တံ ၆၅၈၀၀ တၠ နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− ဂကောံကဵုအရီုဗၚ်ညးပါဲဘဲပၞာန် ပွိုၚ်တိုက် (တောၚ်ပျောက်)