ပ္ဍဲပေါဲဗ္တိုက်ကအ်ကြိက်ဂှ် ဂကောံ DKBA ပါ်တိတ် ဘိုၚ်ဗ္တိုက်ကဵုလဝ် လ္ပာ်ကံၚ်ဇြဳပၞာန်

ကအ်ကြိက်၊ မေ ၂

ပ္ဍဲပေါဲဗ္တိုက်ပွိုၚ်ဍုၚ်ကအ်ကြိက် တွဵုရးကရေၚ်ဂှ် ဂကောံ DKBA ပါ်တိတ် သၟဝ်တဲဗိုလ်ဘိဂှ် ဘိုၚ်ဗ္တိုက်ကဵုဒၟံၚ် လ္ပာ်ကံၚ်ဇြဳပၞာန်တုဲ ကံၚ်ဇြဳပၞာန်ဂှ်လေဝ် ရီုဗၚ်ထံက်ပၚ်ကဵုဒၟံၚ် မကမ်လွဟ်လက်နက်ပၞာန် ဗွဲမဂၠိုၚ်ဂၠေၚ်ရောၚ် ညးမစုက်လုက်ကဵု ဂကောံ DKBA ပါ်တိတ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

နူစဂကောံဇြဟတ်ပၠန်ဂတး သၟဝ်က္ဍိုက်ပ် ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် နွံမွဲဒမြိပ်ဂၠံၚ်အာယှ ကအ်ကြိက်−ကြုၚ်ဒဵု ပ္ဍဲဂိတုဨပရဴတုဲကၠုၚ်တေံတုဲဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ် စဵုကဵုဂိတုမေ ၁ ရ။

အပ္ဍဲပေါဲဗ္တိုက် ဂၠံၚ်ကအ်ကြိက်−ကြုၚ်ဒဵုဂှ် ဂကောံ DKBA ပါ်တိတ် သၟဝ်တဲဗိုလ်ဘိ ဘိုၚ်ဗ္တိုက်ကဵုဒၟံၚ် လ္ပာ်ဒပ်ကံၚ်ဇြဳပၞာန်တုဲ လ္ပာ် KNLA ကဵုလဝ်သမ္တီ သွက်ဂွံတိတ်စ္ဍးအာ နူကဵုဗ္ဒိုပ် နွံပ္ဍဲဂၠံၚ်တံဏံကီုလေဝ် ဗိုလ်ဘိ ဟွံဒ္ဂေတ်ဗက်မွဲသာ် ဆက်ဖျေံလဝ်ဗ္ဒိုပ်ရ။

ဒပ်ကံၚ်ဇြဳပၞာန်ဂှ်တှ်ေ ထံက်ပၚ်ကဵုလဝ် ဂကောံ DKBA ပါ်တိတ် ဂကောံဗိုလ်ဘ် မကမ်လွဟ်လက်နက်ပၞာန်ဗွဲမဂၠိုၚ်တုဲ သွက်ပရေၚ်ပိုန်ဒြပ်ဂှ်လေဝ် ကဵုလဝ်အခေါၚ်အရာ ကဵုပံက်လဝ်ဗ္ဒိုပ်သၞေဟ်ကၚ်ဂမၠိုၚ်ရောၚ် တမ်ရိုဟ်ပရိုၚ် မစုက်လုက်ကဵု ဂကောံ DKBA ပါ်တိတ်ဂှ် သ္ဂးရ။

ပ္ဍဲပေါဲဗ္တိုက် ပရေၚ်ပၞာန်မသ္ကာတ်မြဟ်ဒၟံၚ်ဖိုဟ်ဂှ် က္ဍိုပ်သ္ကိုပ်ဗိုလ်ဘိ ဂကောံ DKBA ပါ်တိတ်ဂှ် ထပ်ပလံၚ်ဗစိုပ်ကဵုလဝ် ကောန်ဒပ်ညးတံ အပ္ဍဲပရေၚ်ပၞာန်ကအ်ကြိက် ကြုၚ်ဒဵု ဗွဲမဂၠိုၚ်ဂၠေၚ်ဂှ်လေဝ် ဂွံတီကေတ်ရ။

ဂကောံ DKBA ပါ်တိတ် မဒှ်ဂကောံဗိုလ်ဘိက္ဍိုက်ပ်ဂှ်ဝွံ အခိၚ်လၟုဟ် ဖျေံဒၟံၚ်ဒပ် ဗ္ဒါဲ(ကျောက်တလုံး ဝၚ်းဒရယ်) ပွိုၚ်ဍုၚ်ဘာအၚ် တွဵုရးကရေၚ် နဒဒှ်ဌာန်ဂအုပ်တုဲ လ္ပာ်ဂၠံၚ်ကအ်ကြိက်−ကြုၚ်ဒဵုဂှ်လေဝ် ဖျေံဒပ်မံၚ်ဒၟံၚ် ကရောံဒပ်ကံၚ်ဇြဳပၞာန်တံရ။

ဗိုလ်ဘိဝွံ ကၠာတေံ ဒှ်သ္ကိုပ်တမ်ဒပ်မွဲတၠ နူကဵုတမ်ဒပ် ၁၀၂၂ ဒပ်မၚ်ပယျဵုကရေၚ် BGF တုဲ ကြဴနူဂှ်တုဲ နုက်တိတ်နူ BGF တုဲ ကလေၚ်စိုပ်ကၠုၚ် ဇရေၚ်ဒပ်ပၞာန်ကောန်ဂကူကရေၚ်ဗုဒ္ဓဘာသာ  DKBA တုဲ ဒှ်ညးကလေၚ်ဗ္တိုက်လဝ်ဒပ်ပၞာန်ဗၟာမွဲတၠရ။

ကြဴနူဒပ်ပၞာန်သီအဝဵုတုဲ ပ္ဍဲသၞာံ ၂၀၂၃ ဂှ် ဂကောံ DKBA ပါ်တိတ် မဒှ်ဂကောံဗိုလ်ဘိဂှ်ဝွံ ကလေၚ်စိုပ်ကၠုၚ် ဇရေၚ်ကျာ်ဇၞော် (ကြာအၚ်းပေါ်တော်မူ) ပွိုၚ်ဍုၚ်ဘာအၚ် နကဵုဇြဟတ်လၟိဟ်ညိညတုဲ ကေတ်လဝ်ပရေၚ်ၜိုဟ်လလမ် ကုဒပ်ပၞာန်ရ။

ပရိုၚ်−သြၚ်လောန်တိုၚ်(မ်)

ဗီု−CJ