ယှိုဲကျေန်၊ မေ ၂
ပ္ဍဲရးဗဂေါ ပွိုၚ်ဍုၚ်ယှိုဲကျေန် ကွာန်ကွေန်သုက်ဂှ် အပ္ဍဲပေါဲဗ္တိုက် မက္တဵုဒှ်ဒၟံၚ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် သီုၜါလ္ပာ် ဇီုကပိုက်ချိုတ်အာတံ နွံရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
ပ္ဍဲဂိတုဨပရဴ ၂၀ တုဲကၠုၚ်တေံ ပ္ဍဲကဵုကွာန်ကွေန်သုက်ဂှ် အခိၚ်ဒပ်ပၠန်ဂတး သၟဝ်သ္ကိုပ်သ္က ဒပ်ပၞာန်ဗၠးၜးကောန်ဂကူကရေၚ် KNLA ၚးတးဒၟံၚ်တိဍာ်ဂှ် ဒှ်လဝ်ပေါဲဗ္တိုက်ဆေၚ်မုက် ကုဒပ်ကံၚ်ဇြဳပၞာန်ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ်ဘာ်နာဍဳဂှ် လ္ပာ်ကံၚ်ဇြဳပၞာန် ၜါလ္ပာ်ချိုတ်တုဲ ဗွဲမဂၠိုၚ်ဂၠေၚ် ကလိဂွံလဝ်ဝပ် နွံတုဲ လ္ပာ်ဒပ်ပၠန်ဂတးတံဂှ်လေဝ် ကောန်သ္ဂံၚ်ပိတၠ ဇီုကပိုက်ကလိဂွံလဝ်ဝပ်ရ။
အခိၚ်ဒှ်ပေါဲဗ္တိုက်ဂှ် နူတမ်ဒပ်ကံၚ်ဇြဳပၞာန် ဖျေံသ္ဇိုၚ်ယှိုဲကျေန်ဂှ် ဘိုၚ်ပန်ကဵုလဝ်လွဟ်ဇၞော် ဟွံပိုတ်သ္ကုတ်ဂှ်ရ လ္ပာ်ဒပ်ပံၚ်ကောံပၠန်ဂတးတံ ဒးကလေၚ်ဆုတ်အာလဝ်တုဲ ဒပ်ကံၚ်ဇြဳပၞာန်လေဝ် ဒးဆုတ်ကလေၚ်အာလဝ် လ္ပာ်ဍုၚ်ဝဝ် ရးဗဂေါရောၚ် သ္ဂးရ။
ပ္ဍဲပွိုၚ်ဍုၚ်ယှိုဲကျေန် ပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ် စနူဂိတုဨပရဴ သတ္တာဟတတိယဂှ်တုဲ ဒှ်ဒၟံၚ်ပေါဲဗ္တိုက်တုဲ လ္ပာ်ဒပ်ပၠန်ဂတး သၟဝ်သ္ကိုပ်သ္က KNLA တံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ညိညရ။
ဟိုတ်နူပေါဲဗ္တိုက်ယှိုဲကျေန်တုဲ ညးပါဲကၠုၚ်ဘဲပၞာန် လ္ပာ်တွဵုရးဍုၚ်မန် ဍုၚ်ဒုၚ်သယိတ်ဂှ် မၞိဟ် ၁၀၀၀ ပြၚ် နွံဒၟံၚ်တုဲ နွံပၟိက်ဒၟံၚ်ကဵု ဇွောံမစၞစ၊ အရီုဗၚ်ပရေၚ်ဗ္စာရဏာမၞိဟ်တံဂှ် ဂွံတီကေတ် ဇရေၚ်ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ