နေဗျဳဒဝ်၊ ဖေဖဝ်ဝါရဳ ၂၀
သၞောဝ်ဂီုကၠီုပူဂဵု ကမ္ပဏဳပရေၚ်ဂီုကၠီုအပ္ဍဲဍုၚ်၊ မ္ၚးဍုၚ်ဂမၠိုၚ် မဂွံအခေါၚ်ရပ်လွဟ်တံဂှ် ပ္ဍဲဂိတုဖေဖဝ်ဝါရဳ ၁၈ ဏံ စၞောန်ပျးကၠုၚ်လဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
စၞောန်ပျးကၠုၚ်လဝ် အတိုၚ်သၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ နကဵုစၟတ်တဲ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ရောၚ် ထ္မံက်ထ္ၜးလဝ်ရ။
ညံၚ်ဂွံဒှ်အထံက်အရီု သွက်ဂီုကၠီုကၟိန်ဍုၚ်၊ သွက်ပရေၚ်သၞောဝ်အုပ်လဒံကီု၊ ပရေၚ်ဒုၚ်ကာပရေၚ်ဂီုကၠီုပူဂဵုဂှ် မ္ၚးနူကဵုဂကောံဂီုကၠီုကၟိန်ဍုၚ်တံဂှ် သွက်ဂွံပံၚ်တောဲရေၚ်တၠုၚ်အာ ကုဂကောံမ္ၚးဂမၠိုၚ်မာန်ဂှ် ရန်တၟံလဝ်ရောၚ် သ္ဂးရ။
အပ္ဍဲလၟေၚ်ကမၠောန်ပရေၚ်ဒုၚ်ကာဂီုကၠီုပူဂဵုဂှ် ယဝ်ရကလိဂွံပရိုၚ် မဇီုကပိုက်ကဵု ဂီုကၠီုကၟိန်ဍုၚ်၊ ပရေၚ်သၞောဝ်အုပ်လဒံကၟိန်ဍုၚ်တံဂှ်မ္ဂး ဒးပလံၚ်ပရိုၚ် ဇရေၚ်ဗ္ဒိုပ်ဗၠာဲသၟိၚ်တံဏောၚ်ဂှ် စၞောန်ပျးလဝ်ရ။
ညးရေၚ်တၠုၚ်ဂဗုတ် ဥူကျဳမျေတ်ဂှ်တှ်ေ နကဵုကံၚ်ဇြဳပၞာန် သ္ပဒတန်စၞောန်ပျးကၠုၚ်သာ်ဏံဂှ်ဝွံ ဒဒှ်ရဍေံထ္ၜးဒၟံၚ်သက်သဳ ကဵုဂီုကၠီုပေၚ်ၚ် ကုပရေၚ်ဓလိုက်တမ်ရိုဟ်ဍုၚ်သ္အာၚ်တံ ဟွံမာန်ရပုဟ်ဂှ် သ္ၚဳဂၠိပ်လဝ်ရ။
“ ဒှ်သၞောဝ် ကဵုထောံအခေါၚ် ကုရဲညးမရပ်လဝ်လွဟ် ဍုၚ်သ္အာၚ်တံ လုပ်ပထုဲရဏောၚ်။ ဍေံတံ (စကစ) ဂှ်တှ်ေ အလဵုညးတံ ထိၚ်ဒက်ဂီုကၠီုဟွံမာန်ရပုဟ်။ ဗွဲတၟေၚ် လ္တူပရေၚ်ဓလိုက်တမ်ရိုဟ်ဍုၚ်သ္အာၚ်တံဂှ် ဒဒှ်ရကဵုဂီုကၠီုပေၚ်ၚ်ဟွံမာန်ရပုဟ်ဟီုဂှ် ထ္ၜးလဝ်သက်သဳရ။ ဟိုတ်ဂှ်ရ ပ္တိတ်လဝ်သၞောဝ်ဏံ” သာ်ဝွံ သ္ဂးရ။
နကဵုကမ္ပဏဳပရေၚ်ဂီုကၠီု အပ္ဍဲဍုၚ်၊ မ္ၚးဍုၚ်ဂမၠိုၚ် နွံပၟိက်မ္ဂး သွက်ဂွံဂွံအခေါၚ်ရပ်လွဟ်လက်နက်မကမ် ကေုာံ ကပေါတ်မဆက်စပ်ဂမၠိုၚ်ဂှ် ဒးရေၚ်တၠုၚ်အာ ဗွဲမဗဗွဲကဵုသၞောဝ်ရပ်လွဟ်လက်နက် နကဵုအခေါၚ် နူကမ္မတဳဗဟဵုဏောၚ်ဂှ် စၞောန်ပျးလဝ်ရ။
ဆ္ဂး ကဵုအာအခေါၚ်ရပ် ဂကူလွဟ်လက်နက်မကမ်သာ်လဵုရောဟီုဂှ် စုတ်ထ္ၜုတ်ဏာလဝ်ပ္ဍဲသၞောဝ် ချိုတ်တ်ပၠိုတ်တ်ဂှ် ဟွံဂွံဆဵုကေတ်ရ။
ဟိုတ်ဂှ်ရ ဍေံဒှ်အာ ညံၚ်ရဴဝးပ္ကဝ်ကၠုၚ် အရာမတာဒၞါလဝ် ပ္ဍဲကဵုသၞောဝ်သ္ဇိုၚ် ၂၀၀၈ ဒဒှ်မဂကောံရပ်လွဟ်ဍုၚ်သ္အာၚ်လဵုမွဲမှ ကဵုအခေါၚ်ဒုၚ်တဲဟွံဂွံဂှ်ရောၚ် ဥူကျဳမျေတ် ထံက်ထ္ၜးလဝ်ရ။
ပ္ဍဲကဵုလိက်ပၟိၚ်ကၟိန်ဍုၚ် မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၈ သၞာံတုဲတေံ အလဵုအသဳကြုက် ပ္တိုန်ကၠုၚ်လဝ်ဂလာန် သွက်ဂွံဒက်ပ္တန်ကမ္ပဏဳဂီုကၠီုပံၚ်တောဲ အကြာကြုက်ကဵု ကံၚ်ဇြဳပၞာန် ရန်ကဵုသ္ဂောံစဵုဒၞါ ကုကမၠောန်ပရေၚ်ဓလိုက်တမ်ရိုဟ်ကြုက် မၞုံဍုၚ်ဗၟာဂှ်ရောၚ် ထ္မံက်ထ္ၜးလဝ်ရ။
ဟိုတ်ဂှ်ရ သွက်ဂွံထ္ပက်စၟတ်တဲလိက်တုပ်စိုတ် MOU မာန်ဂှ် သၞာံတုဲကၠုၚ် ဂိတုအံက်တဝ်ဗာ ၂၂ တေံ ဒက်ပ္တန်လဝ် ကမ္မတဳကမၠောန်သ္ဂောံစၟဳတ် ပရေၚ်ဒဒှ်ဒၟါနူကမ္ပဏဳဂီုကၠီုဏံတုဲ ဒဒှ်မဇီုကပိုက်ကဵုအဝဵုစၟိန်ပြမာန်ကၟိန်ဍုၚ် နွံ ဟွံမွဲ၊ ဒစဵုဒစးကဵုသၞောဝ်သ္ဇိုၚ် နွံ ဟွံမွဲဂှ်ရ။
နကဵုညးမကၠောန်ၜိုတ်ဒၟံၚ် ကမၠောန်ပရေၚ်ဒုၚ်ကာဂီုကၠီုပူဂဵုလၟုဟ်တံ ကေုာံ ညးမခါန်ပ္တိုန်လဝ်ဂီုကၠီု လ္တူ ၁၀ တၠ သွက်ကမၠောန်ပူဂဵု ဟွံသေၚ်မ္ဂး သွက်ကမၠောန်ပါ်တံဂှ်ဝွံ စၞောန်ပျးသၞောဝ်ဏံတုဲ အပ္ဍဲပွိုၚ် ၆ ဂိတုဂှ် ဒးအာတ်ပ္တိုန်အာ လာၚ်ဇြေန် ကေုာံ သွက်အခေါၚ်အဝဵု ဗွဲမဗဗွဲကဵုစေဝ်ပၞောန်တံဏောၚ် မဒှ်ရ။
အာယုက်လာၚ်ဇြေန် ကေုာံ အခေါၚ်အဝဵုဂှ်တှ်ေ ပပ္တံနူတ္ၚဲပ္တိတ်ကဵုဂှ်တုဲ လအ်ပွိုၚ်ပိသၞာံ မဒှ်ရ။ ပ္ဍဲအရာအာတ်ပ္တိုန်လာၚ်ဇြေန်ဂှ် နကဵုကမ္ပဏဳအပ္ဍဲဍုၚ်၊ မ္ၚးဍုၚ်ဂမၠိုၚ် ဒှ်ကမ္ပဏဳပရိုၚ်တိတ်ဒၟံၚ် ဇီုကပိုက်ကၠုၚ်ကဵုဂီုကၠီုကၟိန်ဍုၚ်၊ သၞောဝ်လဒံကၟိန်ဍုၚ် ဟွံဂွံပုဟ်ဂှ် သ္ဂးရ။
ပွမဒုၚ်လျိုၚ်ဂှ်တှ်ေ ဒးစုတ်အာသြန် ပ္ဍဲတိုက်သြန်ပရေၚ်ပိုန်ဒြပ်ဍုၚ်ဗၟာ ကဆံၚ်သဝ်အိုဝ် သြန်မွဲလ္ၚီကိုဋ်ဒ္ကေဝ်၊ ယဝ်ဒှ်ကမ္ပဏဳဍုၚ်သ္အာၚ်မ္ဂး သြန်ဍုၚ်သ္အာၚ်လၟိဟ်တုပ်သၟဟ်ဂှ် ဒးပအပ်အာ နဒဒှ်သြန်စအိက် သွက်အပိုင်အခြာကာလမွဲမွဲရောင် စၞောန်ပျးလဝ်ရ။
သ္အာၚ်နူဂှ်ပၠန် ယဝ်ဒှ်ကမ္ပဏဳဍုၚ်သ္အာၚ်မ္ဂး ဒးခါန်ကၞက်ပ္တိုန်လဝ် သ္ဇိုၚ်ဝန်ဂီုကၠီုဏောၚ်တုဲ ဒးလိၚ်ခါန်ကၞက်အာ ကောန်ဍုၚ်ဗၟာ အောန်အိုတ် ၇၅ တၟံကၠံဏောၚ် ထ္မံက်ထ္ၜးလဝ် ပ္ဍဲသၞောဝ်ဝွံရ။ ဆ္ဂး လၟိဟ်ဍေံဂှ်တှ်ေ သၞောတ်ဗ္ၜတ်လဝ် သွက်ကမ္ပဏဳအပ္ဍဲဍုၚ်၊ မ္ၚးဍုၚ်ဂှ် ဟွံဂွံဆဵုကေတ်ရ။
ညးရေၚ်တၠုၚ်ဂဗုတ် ဥူကျဳမျေတ်ဂှ်တှ်ေ ကောန်ပၞာန်ကံၚ်ဇြဳပၞာန် ကောန်ပၞာန်ရာံတိတ်တံကဵု ပၞာန်မၚ်ကွာန်တံ ပါလုပ်ဏောၚ်တုဲ သွက်ကိုန်စဳမာန်တံဂှ် ယဝ်ဂကောံရပ်လွဟ်ကြုက်တံ လုပ်ကၠုၚ်မ္ဂး ဒှ်ပရေၚ်ဍုၚ်သ္ဘာၚ် လုပ်ပလာပ်ပထုဲရဏောၚ်ဂှ် ဟီုလဝ်ရ။
“နူအပ္ဍဲဍုၚ်ဟီုဂှ်လေဝ် ကောန်ပၞာန်ညးတံတြေံတြေံတံ ပါဏောၚ်၊ ပၞာန်မၚ်ကွာန်တံလေဝ် ပါဏောၚ်။ ပ္ဍဲကျံက်ဖျူတေံဂှ်တှ်ေ လုပ်ဒၟံၚ် နူလၟုဟ်ယျ။ ယဝ်ရဖံက်ကၠုၚ်ဂၠံၚ်ကွဳပၟတ် မူဇြေဝ်ကဵု ကျံက်ဖျူဂှ်ဏောၚ်မ္ဂး ယဝ်လုပ်ကၠုၚ် နကဵုဂကောံရပ်လွဟ်ကြုက်တံဂှ်ဏောၚ်မ္ဂး ဒှ်ပၞာန်အပ္ဍဲဍုၚ်ရဏောၚ်၊ ဒှ်ပရေၚ်ဍုၚ်သ္အာၚ် လုပ်ပလာပ်ပထုဲရဏောၚ်။ ဒှ်ပွဖံက်ပ္ကဝ်သၞောဝ်သ္ဇိုၚ်ရဏောၚ်။ ညာတ်ကေတ်သာ်ဏံရ” သာ်ဝွံ သ္ဂးရ။
ပ္ဍဲသၞောဝ်ဂှ်တှ်ေ ယဝ်ခါန်ပ္တိုန်သ္ဇိုၚ်ဝန်တံဂှ်မ္ဂး ဒးဒှ်ညးအာယုက်ပေၚ် ၁၈ တုဲ၊ ပရေၚ်ထတ်ယုက်ခိုဟ်၊ ဒှ်ညးဒုဟ်ဒဏ်ဟွံမွဲတံဏောၚ်တုဲ ယဝ်ဒှ်ကောန်ဍုၚ်သ္အာၚ်မ္ဂး ဒှ်ကောန်ဂကောံရပ်လွဟ်နူဍုၚ်သ္အာၚ်မွဲမွဲ ဟွံဂွံပုဟ်ဂှ် စၞောန်ပျးလဝ်ရ။
ကမ္မတဳကောပ်ကာဲ ပရေၚ်ဒုၚ်ကာဂီုကၠီုပူဂဵု ကဆံၚ်ဗဟဵုဂှ်တှ်ေ ဒက်ပ္တန်အာ နကဵုဂကောံသၟဝ်တဲ ဌာနဝန်ဇၞော်ကာအပ္ဍဲဍုၚ်ဂမၠိုၚ် မပ္တံကဵု ဂကောံဒပ်ဗၠာဲသၟိၚ်ဍုၚ်ဗၟာ၊ ဌာနက္ဍိုက်ပ်ဂၠိုက်ဂၠါဲစၟဳတ်ဗွဲတၟေၚ်၊ ဌာနကာအုပ်ဓုပ်နာနာ၊ ဌာနသိုဟ်ပၠိုတ်ပၟတ် ကေုာံ ဌာနဝန်ဇၞော်တၞဟ်သ္အာၚ်ဂမၠိုၚ်ရ။
ပ္ဍဲကမ္မတဳဗဟဵုဂှ် ဝန်ဇၞော်ကာအပ္ဍဲဍုၚ် ကေတ်အာလျိုၚ် နဒဒှ်ဥက္ကဌဏောၚ်တုဲ ဂအုပ်ဗၠာဲသၟိၚ်ဂှ်တှ်ေ နဒဒှ် ဒုဥက္ကဌ၊ ဒုဂအုပ်ဗၠာဲသၟိၚ်ဂှ်တှ်ေ နဒဒှ်ညးအုပ်ကာ၊ ဂအုပ်သၞာဲဒဴဗၠာဲသၟိၚ်ဂှ်တှ်ေ နဒဒှ်ဖက်ဆောညးအုပ်ကာ မပ္တံသာ်ဏံ ဒးကေတ်အာလျိုၚ် ကရောံကောန်ဂကောံ ၁၂ တၠရောၚ် စၞောန်ပျးလဝ်ရ။
သၟဝ်ဂှ်တှ်ေ ဒက်ပ္တန်အာ ကမ္မတဳကောပ်ကာဲ ပရေၚ်ဒုၚ်ကာဂီုကၠီုပူဂဵု ရးဒေသ ကေုာံ တွဵုရးတံဂှ်ဏောၚ်တုဲ ဝန်ဇၞော်ဂီုကၠီု ကေုာံ ကေၚ်ကာပယျဵုဂှ်တှ်ေ ကေတ်အာလျိုၚ် နဒဒှ်ဥက္ကဌဏောၚ်ဂှ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ