ထဝါဲ၊ မေ ၁
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ် ပ္ဍဲကဵုဒေသ (အရှေ့တော) ထဝါဲ ပွိုၚ်ဍုၚ်ထဝါဲ ရးတၞၚ်သဳဂှ်တုဲ ညးဒေသ ၃၀၀၀ ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ကရောၚ်ပၞာန်ကံၚ်ဇြဳပၞာန် ဇြဟတ် ၂၀၀ ပြၚ်ပါဂှ်ဝွံ စနူဂိတုဨပရဴ ၂၉ တုဲ နူဍုၚ်ထဝါဲဂှ် ထ္ပက်ကရောၚ်ပၞာန် လုပ်စိုပ်ကၠုၚ် လ္ပာ်ဒေသထဳခဳ မဒှ်ဒေသ(အရှေ့တော) ထဝါဲဂှ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ဂှ်တုဲ ညးဒေသနူကဵု(အရှေ့တော) ထဝါဲ နူကွာန်(သရက်ၚုတ်၊ သၚ်္ကန်းတုန်း၊ ဝကုန်း) ပါလုပ်သီုကဵုကွာန်ဗ္ဒါဲဗ္ဒါဲတံဂှ် ဒးဂြိပ်ဒဴပါဲဒလေတ်ဒၟံၚ်ရ။
အတိုၚ်ဂလာန်ညးဒေသ(အရှေ့တော) ထဝါဲဂှ်မ္ဂး ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ်တုဲ ယဝ်ဟွံပါဲဒလေတ်မ္ဂး ဒးဒုၚ်ရပ်ဒက်ပြိုက်ဂစိုတ်ကီု ဒးဒုၚ်ရပ် နဒဒှ်ဇွောံစဵုဒၞါပၞာန်တံကီု နွံဒၟံၚ်ရောၚ် ဟီုရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဨပရဴ ၃၀ အခိၚ်နူဂယးဂှ် စိုပ်ကၠုၚ်ဗ္ဒါဲကွာန်(ဝကုန်း) တုဲ ဒှ်လဝ်ပေါဲဗ္တိုက် ကုဒပ်ပၠန်ဂတးတံ ဟွံမွဲပုဟ်ဂှ် သ္ဂးရ။
တုဲကၠုၚ်ဂိတုဨပရဴ ၁၉ တေံ ဒပ်ပၠန်ဂတးတံ သီဂွံ ဗ္ဒိုပ်ဗျူဟာကံၚ်ဇြဳပၞာန် ဗ္ဒိုပ်ထဳထ ဗ္ဒါဲပယျဵုထဳခဳဂှ်တုဲ ဒပ်ကံၚ်ဇြဳပၞာန် ထောံမခတိုဟ်ဗ္တိုက်ကၠုၚ်လဝ် ပယျဵုထဳခဳကဵု ကွာန်(တောၚ်သုံးလုံး) နူကဵုပၞာန်ကျာရ။
လ္ပာ်ကံၚ်ဇြဳပၞာန် ဟိုတ်နူထောံလဝ်မခတိုဟ် နူကဵုပၞာန်ကျာ၊ ဟိုတ်နူပန်ပှော်ဒၟံၚ် နကဵုလွဟ်ဇၞော်ဂှ်တုဲ စနူဂိတုဨပရဴ ၂၀ တုဲ ညးဒေသ ၁၀၀၀ ပြၚ် နူကဵုဍုၚ်မေတ္တာ၊ ဒေသပယျဵုထဳခဳ၊ ကွာန်(တောၚ်သုံးလုံး) ကေုာံ ကွာန်ကျံက်မေဝ်ဒံၚ်တံဂှ် ဒဂြိပ်ဒဴပါဲဒလေတ်လဝ်ရ။
အတိုၚ်ဂလာန် ဒပ်ပၠန်ဂတးတံဂှ်မ္ဂး ဒပ်ကံၚ်ဇြဳပၞာန်ဝွံ ဂွံကလေၚ်ကေတ် ဗ္ဒိုပ်ဗျူဟာထဳထဂှ် ဗပေၚ်ဒၟံၚ်ဇြဟတ် ပယျဵုထဳခဳဂှ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ