မတ်မလီု၊ ဖေဖဝ်ဝါရဳ ၂၁
နကဵုဂကောံကောန်ဍုၚ်အရၚ် ကၠောန်ကၠုၚ်ပၠန်ဂတးဂမၠိုၚ်၊ နကဵုဂကောံဇြဟတ်လုပ်ကၠုၚ်ပေါဲဗ္တိုက် သွက်အခေါၚ်အရာမၞိဟ် ကေုာံ ဒဳမဝ်ကရေဇြဳတံ အလန်ဏံ စၟတ်ကေတ် အခိၚ်ဒးထပိုတ်ရိုဟ်ကၞက်သၞောတ်တၠအဝဵုပၞာန်တုဲ လ္ပပၠအ်အခိၚ် သွက်ဂွံရုန်ဂ္စါန်အာညးသ္ကအ်တုပ်ပ်အိုတ်ဂှ် သ္ကိုပ်ဝန်ဇၞော် NUG ဟီုရ။
သ္ကိုပ်ဝန်ဇၞော် မာန်ဝေန်ခိုၚ်တာန် ဟီုဏာလဝ် ပ္ဍဲကောံဓရီုဂကောံအလဵုအသဳညဳသၟဟ်ဂကူ NUG မကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ ၁၉ တေံရ။
ယဝ်ဇကုတံ ဟွံညဳသာမ္ဂး ဗီုအခိၚ်ကၠာတေံရ ညံၚ်ပရေၚ်ပၠန်ဂတး ဇြဟတ်ဂွံဍိုန်လျစှ်ေကၠုၚ်ဂှ် မွဲဂကောံတုဲမွဲဂကောံ ပါ်တိတ်တုဲ နကဵုဂၠံၚ်တရဴပါ်ထ္ကးဆီဂှ် ကၠောန်ကၠုၚ်ဏောၚ်ဂှ်ရ ညံၚ်အကာဲအရာဏံ ဟွံဂွံထပ်ဒှ်ကၠုၚ်ဂှ် သီုညးဖအိုတ် ဒးရုန်ဂ္စါန်တတ်ၜက်အာဏောၚ်ဂှ် သ္ဂးရ။
ကိုဝ်ဇြေန်ယဝ် သ္ပလဝ် CDM နူဒပ်တိုက် ကဆံၚ်ဗိုလ်ဇၞော်ဂှ်တှ်ေ လ္ပာ်ဂကောံဇြဟတ်ပၠန်ဂတးတံ မကမ်လွဟ်လက်နက် နွံကၠုၚ်ဓမ္မတာကီုလေဝ် ဂကောံရပ်လွဟ်သီုဖအိုတ် ကောံကလောံကၠောံဍညးသ္ကအ် ဟွံမွဲဒၟံၚ်ပုဟ်ဂှ် သ္ၚဳဂၠိပ်လဝ်ရ။
“အခိၚ်လၟုဟ်ဂှ်လေဝ် လ္ပာ်ပၠန်ဂတးတံ ဇြဟတ်ခိုဟ်ကၠုၚ်ယျ။ ဒၞါဲစုၚ် ဂကောံစုၚ်နွံဒၟံၚ်ရ။ မကမ်လွဟ်လက်နက်နွံကၠုၚ် ၜိုတ်ဓမ္မတာယျ။ ဆ္ဂး ဒၞါဲလ္ၚဵုတံဂှ်တှ်ေ အဟိန်ဗ္တိုက်ဂှ် ဒးကလေၚ်ကေတ်အာ နူဍေံတံဂှ်နွံ။ မကမ်လွဟ်လက်နက်ဟွံမွဲတုဲ ဟွံဗ္တိုက်ပုဟ်ဂးတုဲ ကၠောန်ဟွံဂွံပုဟ်။ အေ ဂှ်တှ်ေ ဒးပံၚ်တောဲကေတ်အဆက်ကဵု ဂကောံနွံတုဲတုဲတံဂှ်ဏောၚ်။ အဓိကဂှ်တှ်ေ ဒးနွံကဵု ပရေၚ်ပံၚ်တောဲကၠောံဍတံရ။ မုဟိုတ်ရောတှ်ေ အတိုၚ်ပိုယ်ဟီုလဝ်လၟုဟ်ရ အလုံဍုၚ်မွဲ ဘိုၚ်ဗ္တိုက်ဒၟံၚ်ကီုလေဝ် ERO အလုံဍုၚ်မွဲကီု၊ ဂကောံရပ်လွဟ်ဂမၠိုၚ်ကီုဂှ် ဆက်စၠောံညးသ္ကအ်၊ ပရေၚ်ပံၚ်တောဲညးသ္ကအ် ဟွံမွဲပုဟ်” သာ်ဝွံ သ္ဂးရ။
အတိုၚ်တၚ်နၚ် ဂကောံသုတေသနဗၠးၜး ISP-Myanmar ဂှ်မ္ဂး ကြဴနူဒပ်ပၞာန်သီအဝဵုတုဲ နကဵုဗ္ၜတ်အလုံဍုၚ်မွဲဂှ် ဂကောံရပ်လွဟ် ဟွံအောန်နူကဵု ၅၀၀ မံက်ကၠုၚ်လဝ်ရ။
ကရောံဂကောံဇြဟတ်ရပ်လွဟ်ပၠန်ဂတးက္ညၚ်တံဂှ် ဂကောံရပ်လွဟ်ကောန်ဍုၚ်အရၚ်ဝှ်ကြံၚ်ဂမၠိုၚ်လေဝ် သွက်ဂွံထပိုတ်ရိုဟ်ကၞက် သၞောတ်တၠအဝဵုပၞာန်ဂှ် လုပ်မံၚ်ပေါဲဗ္တိုက်ရ။
ဟိုတ်ဂှ်ရ အပ္ဍဲပၞာန်သီအဝဵုပွိုၚ်ပန်သၞာံဏံ လ္ပာ်ကံၚ်ဇြဳပၞာန် ဒးဗလးကၠုၚ်လဝ် ဍုၚ် စဵုကဵု ၉၅ ဍုၚ်တုဲ ဌာန်ဂအုပ်ပၞာန်ရးၜါ ဒးကျဗြမ်အာဂှ်လေဝ် ပြံၚ်လှာဲကၠုၚ်ဝၚ်ဒပ်ပၞာန် မွဲပ္ၚံက်ရ။
လ္ပာ်ဂကောံဇြဟတ်ပၠန်ဂတးဂမၠိုၚ် ထ္မံက်ကၠုၚ်လဝ် တိဍာ်ဗၠးၜးမဂၠိုၚ်ကီုလေဝ် ပရေၚ်ကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်ဝွံ ဒဵုကဵုတ္ၚဲဏံ ဟွံဒေါအ်ဒေၚ်အာမွဲသာ် ဆက်ဗ္တိုက်ဒၟံၚ်ရ။
ဟိုတ်နူအကာဲအရာဏံတုဲ အလဵုအသဳကြုက်ကဵုကၠုၚ်ဇြဟတ်ဓရိုဟ်တုဲ ဂကောံရပ်လွဟ်ကောန်ဍုၚ်အရၚ် ကလိဂွံလဝ်တိဍာ်ဗၠးၜးလ္ၚဵုတံ သွက်ဂွံသဳကၠဳပရေၚ်ၜိုဟ်လလမ်ဂှ် ဆဵုဂဗသဳကၠဳလဝ် ကုကံၚ်ဇြဳပၞာန်ကီုလေဝ် ဟွံအံၚ်ဇၞးလဝ်ရ။
မွဲလ္ပာ်ဂှ်ပၠန် ဒေသဟွံဗၠးၜးဏီတံမပါလုပ် ညံၚ်ဂွံဒှ်ဒေသ သၞောတ်တၠအဝဵုပၞာန်သ္အးဇ္ၚးဂှ် ဆက်လုပ်မံၚ်ပေါဲဗ္တိုက် ကုကံၚ်ဇြဳပၞာန်ကီုလေဝ် ထ္ပက်ကၠုၚ်ပၞာန် မွဲကရောံမွဲစွံ မွဲအခိၚ်ဓဝ်တံဂှ် ဟွံဂွံဆဵုကေတ်ရ။
စပ်ကဵုပရေၚ်ဏံတုဲ ကိုဝ်ဇြေန်ယဝ်ဂှ်တှ်ေ ညံၚ်ဒပ်ပၞာန်ဂွံသရိုဟ်စှ်ေအာဂှ် ဒးနွံကဵုသၞောတ်ကၠောံဍ သၟဝ်မွဲအသံ အလုံဍုၚ်မွဲ နူကဵုမုက်ပၞာန်ၜိုတ်နွံတံဂှ် ဘိုၚ်ဗ္တိုက်အာမာန်တံဂှ်ဏောၚ်ဂှ် ထံက်ထ္ၜးလဝ်ရ။
“ ဗီုပြၚ်ကဵုအမိၚ် ကုဂကောံရပ်လွဟ်ကောန်ဍုၚ်အရၚ်ဂမၠိုၚ်မပါလုပ် ဒပ်ပၠန်ဂတးဒေသတံ ဒပ်စဵုဒၞါတံဂွံဂှ် ဟွံမွဲတုဲ လအ်ကၠုၚ်ဒၟံၚ်ပွိုၚ်ပန်သၞာံရ။ ဍာံဍာံဂှ်တှ်ေ ဒပ်ပၞာန်ဂှ် ဗီုဍေံကဵုဍေံ သရိုဟ်ဒၟံၚ်ရဏောၚ်။ ပိုယ်တံရ သုၚ်စောဲဟွံလေပ်။ ဗ္တိုက်ပၞာန် ရပ်လွဟ်ယျဟီုတှ်ေ ဒးအာနကဵုမွဲအသံမွဲအမိၚ်ရဏောၚ်” သာ်ဝွံ သ္ဂးရ။
သ္ကိုပ်ဝန်ဇၞော် NUG ဂှ်တှ်ေ ပၠန်ဂတး အခိၚ်လအ်ကၠုၚ်ဗက် တၚ်ကော်ဆဴတံလေဝ် ဂၠိုၚ်ကၠုၚ်လေပ်တုဲ တၠအဝဵုပၞာန်ဝွံ ဇၟာပ်အခိၚ် သ္ဂောံဍဵုဍိုက်မံၚ်ညးဍုၚ်ကွာန်တံဂှ် ဒှ်ညးမဂၠါဲဒၟံၚ်ဂၠံၚ်ဍာန် သ္ဂောံပါ်ထ္ကးဆီရောၚ် ဟီုရ။
သ္အာၚ်နူဂှ်ပၠန် ဂွံဂွံအရီုဍုၚ်သ္အာၚ်တံဂှ် ပ္တိတ်ကၠုၚ်ဒၟံၚ်ဇြဟတ် နဲကဲစုၚ်ဇဳကီုလေဝ် ဟိုတ်ဒှ်တၠအဝဵုပၞာန်ဂမၠိုၚ်ဂှ်ရ နကဵုဂကောံဇြဟတ်ပၠန်ဂတးတံ နွံပၟိက် ဒးစွံသတိဒးမၚ်ကျောဝ်ဏောၚ်တုဲ သွက်ဂွံဒစးဒုၚ်ပလေဝ်ပလေတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−NUG