ဝါယှေန်တာန်၊ မေ ၁
ပ္ဍဲဂိတုဨပရဴ ၂၉ တေံ ဒပ်အမေရိကာန်ကဵု ဒပ်ဗျိတိၚ်တံ ပံၚ်တောဲတုဲ ဒဒှ်ရကၠောန်လဝ်ပရေၚ်ပြုပြေၚ်ပၞာန် ပ္ဍဲယဳမေန်ဂှ် ဂွံတီကေတ် အတိုၚ်ဌာနဝန်ဇၞော်ကာစဵုဒၞါဗျိတိၚ်ရ။
စွံပွန်ဗ္တိုက်လဝ် ကုဂကောံဟူတဳ မကၠောန်ပ္တိတ်ဒၟံၚ်လွဟ်လက်နက် ညံၚ်ရဴဒရုၚ် မရပ်စပ် ပ္ဍဲအရာဗ္တိုက်က္ၜၚ်ဖ္ဍိုက်ဗၞိက်တံဂှ်ရောၚ် ဌာနဝန်ဇၞော်ကာစဵုဒၞါဗျိတိၚ် ဟီုရ။
သွက်ဂွံသၠုၚ်ပ္တိုန်အသိၚ် ပရေၚ်ဗ္တိုက်ပ္ဍဲယဳမေန်ဂှ် သမ္မတအမေရိကာန် ဒဝ်နေဝ်ထြာမ် စၞောန်ကၠုၚ်လဝ် ပ္ဍဲဂိတုတုဲကၠုၚ်တေံရ။
လုကဴဗ္တိုက်ဒၟံၚ်က္ၜၚ်ဖ္ဍိုက်ဗၞိက် မတတ်ကၠောံအာ ၜဳဗ္ကေတ်ဂှ် ဟွံဒေါအ်မ္ဂး ဗ္တိုက်အာဂကောံဟူတဳ မဒှ်ဂကောံအဳရာန်ထံက်ပၚ်လဝ်ဂှ်ဏောၚ်ဂှ် သမ္မတထြာမ် ဟီုလဝ်ရ။
ဗျိတိၚ်ကေုာံအမေရိကာန်တံဝွံ ကၠာတေံလေဝ် ကေၚ်ကၠောန်လဝ်ပရေၚ်ပၞာန်ပံၚ်တောဲ ပ္ဍဲဍုၚ်ယဳမေန်ရ။
ပ္ဍဲကဵုတၚ်လလောၚ်တြး ဌာနဝန်ဇၞော်ကာစဵုဒၞါဗျိတိၚ်ဂှ် ထ္မံက်ထ္ၜးလဝ် ဒဒှ်ရဗ္တိုက်လဝ် စမြိုၚ်ဂကောံဟူတဳတံ မရပ်စပ်ဒၟံၚ် သွက်ဂွံကၠောန်ပ္တိတ်ဒရုၚ် မစကာဒၟံၚ် ပ္ဍဲအရာဗ္တိုက်က္ၜၚ်ပ္ဍဲၜဳဗ္ကေတ်ဂှ်တုဲ စမြိုၚ်ဝွံ ခြာဒၟံၚ်ကဵုဍုၚ်ဇၞော် သာနာ ၂၄ ကဳလောမဳတာတုဲ စပ်ကဵုပရေၚ်ဇီုကပိုက်ချိုတ်ဂှ်တုဲ ထ္မံက်ထ္ၜးလဝ် ဗွဲလစှ်ေ ဂှ် ဟွံမွဲရ။
ကောန်အရာပ်ပ္ဍဲဒေသဏံ ညံၚ်ဂွံဒးဘဲဇီုကပိုက် အောန်အိုတ်ဂှ် ဗ္တိုက်လဝ် အခိၚ်ဗ္တံရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
လ္ပာ်ဒပ်ပၞာန်အမေရိကာန်ဂှ်တှ်ေ စပ်ကဵုပရိုၚ်ဏံတုဲ မုဟွံဂွံဟီုဏီရ။
ဌာန်ဒတန်ထိၚ်ဒဝ် ညးဆုဲပြံၚ်မံၚ်တန်တဴအာဖရိက နွံပ္ဍဲဍုၚ်ယဳမေန်ဂှ် ဒးဒုၚ်ဗ္တိုက်လဝ်တုဲ မၞိဟ် ၆၈ တၠ ချိုတ်အာလဝ်ရောၚ် ဌာန်ပရိုၚ် ဂကောံဟူတဳ မထိၚ်ဒဝ်ဂှ် ထ္မံက်ထ္ၜးလဝ်ရ။
သၞာဲဒဴအမေရိကာန် ဟွံမိက်ထ္မံက်ယၟုမွဲတၠဂှ်တှ်ေ ဒဒှ်ရဟီုဂးဒၟံၚ်ညးသ္ကအ် ကောန်အရာပ်ဇီုကပိုက်ဒးအာ နွံဒၟံၚ်ရောၚ်ဂှ် သ္ပဒးသတိတုဲ ဒဒှ်ရလ္ၚတ်စၟဳတ်ဒၟံၚ်ဂှ် ဟီုကၠုၚ်လဝ်ရ။
လောန်ကၠုၚ်ပွိုၚ်စှ်သၞာံတေံ ဂကောံဟူတဳဏံ ထိၚ်ဒက်လဝ် ဍုၚ်ယဳမေန် ဒေသဗွဲမဂၠိုၚ်ရ။
က္ၜၚ်အေဿရေ ကေုာံ က္ၜၚ်မတတ်ကၠောံအာ ၜဳဗ္ကေတ်တံဂှ် ဂကောံဟူတဳ စွံကၠုၚ်ပွန် ဗ္တိုက်ကၠုၚ်ဒၟံၚ် နူကဵုသၞာံ ၂၀၂၃ ဂိတုနဝ်ဝေမ်ဗာတေံရ။
နဒဒှ်ဒတူလိုၚ် ကရောံကောန်ဍုၚ်ပါလက်သတိုၚ် နွံပ္ဍဲဂါဇြာဂှ်တုဲ ဗ္တိုက်ကၠုၚ်လဝ်သာ်ဏံရောၚ် ဂကောံဟူတဳ ဟီုလဝ်ရ။
Ref: Reuters