ထဝါဲ၊ ဖေဖဝ်ဝါရဳ ၂၁
ရးတၞၚ်သဳ အပ္ဍဲခရိုၚ်ထဝါဲ ပ္ဍဲကဵုဍုၚ်ထဝါဲကဵု ပွိုၚ်ဍုၚ်ဍာ်ဗုဂှ် ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် လ္ပာ်ကွာန်ဆက်ဒၟံၚ်တံဂှ်တုဲ ညးဒေသနူကဵုပိကွာန် ဒးဂြိပ်ပါဲဒလေတ်ဒၟံၚ် အလုံကွာန်မွဲရောၚ် ဂွံတီကေတ် ဇရေၚ်ဒပ်ပၠန်ဂတး ဖျေံသ္ဇိုၚ်ဒေသတံရ။
ဒပ်ကံၚ်ဇြဳပၞာန် ဇြဟတ်ပွဳပွူ ၂၀၀ ပါဂှ်ဝွံ စနူဂိတုဖေဖဝ်ဝါရဳ ၁၇ တုဲကၠုၚ်တေံတုဲ လုပ်စိုပ်ထ္ပက်ကၠုၚ်လဝ်ကရောၚ်ပၞာန် ပ္ဍဲကဵုကွာန် နွံသ္ကုတ်ဗၟံက်ဍုၚ်ထဝါဲဂှ်ရ။
ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်လုပ်စိုပ်ကၠုၚ်သၟးဟွံက သီုကဵုပန်ပှော်ဒၟံၚ်လွဟ်ဇၞော်ကြာန်န်တုဲ ညးဒေသနူကဵုကွာန်ပိကွာန် ကွာန် (ရေဝိုင်း၊ ကင်းကုန်း၊ ခေါင်တိုင်ပြင်) တံ အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန်ဂကောံပၠန်ဂတး ဖျေံသ္ဇိုၚ်ဒေသတံရ။
သ္အာၚ်နူဂှ်ပၠန် ကွာန်နွံမွဲဒမြိပ်ဂၠံၚ်ထ္ပက်ကရောၚ်ပၞာန် မပ္တံကဵုကွာန်(ပဒိုင်းချောင်း၊ ရဲတိုင်၊ ပခပ်အင်း) ညးဒေသနူကဵုကွာန်တံဏံဂှ်လေဝ် ဒးဒစးဒုၚ်ပါဲဒလေတ်ဒၟံၚ် လ္ပာ်ဒဵုလ္ပာ်ဂြိုပ်တံ နွံဒၟံၚ်ရ။
ကရောၚ်ပၞာန်ဏံဝွံ နူဇိုၚ်သဝ်တ္ၚဲ နူဏေံတေံရ စိုပ်ဒၟံၚ် ကွာန်(ကင်းကုန်း) တုဲ မွဲဒမြိပ်ဂၠံၚ်ထ္ပက်ကရောၚ်ပၞာန်ဂှ်လေဝ် ကဵုဂကောံဇြဟတ်ပၠန်ဂတးတံဂှ် ဗ္တိုက်ထောံမံၚ်မခတိုဟ် နကဵုဒရုၚ် နွံဒၟံၚ်ရောၚ် သ္ဂးရ။
ကွာန်ထ္ပက်ဒၟံၚ်ကရောၚ်ပၞာန်တံဝွံ ဒှ်ကွာန်နွံအကြာဂၠံၚ် ဂၠံၚ်ဇၞော်ပျဳထံၚ်သု စၟတ် ၈ ကဵု ဂၠံၚ်ထဝါဲ−ထဳခဳတံဂှ်တုဲ သၞာံတုဲကၠုၚ် ဂိတုဒဳဇြေမ်ဗာတေံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်တံဏံဂှ် စံၚ်ပလီုလဝ် ဒဒန်ဆက်လဝ်အကြာန်ကွာန်မွဲတၞုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ