ရေဝ်၊ ဖေဖဝ်ဝါရဳ ၂၁
ဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ် တွဵုရးဍုၚ်မန် ၜါဒပ် ဒးဒုၚ်ဗ္တိုက်လဝ်တုဲ ပရေၚ်ဇီုကပိုက်ချိုတ် ဂၠိုၚ်မာန်ရောၚ် ဂကောံပၠန်ဂတးဂမၠိုၚ် လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဖေဖဝ်ဝါရဳ ၁၉ အခိၚ်နူဂယး ၜိုတ် ၉ နာဍဳဝိုက် ဂကောံလကိုဟ်ဍုၚ်ရေဝ် လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် နကဵုဇြဟတ် ၇၀ ပြၚ် ပ္ဍဲကဵုကၠအ်သတ်မွဲ နွံဗ္ဒါဲကွာန်ကုန်ဒဵုဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် ပွိုၚ်မွဲနာဍဳပြၚ်တုဲ လၟိဟ်ကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်အာတံဂှ် စၟဳတ်ဒၟံၚ်ဖိုဟ်ရောၚ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ဒးဂိအာဂှ်ရ ဗ္ဒါဲပွဳပွူကွာန်ကုန်ဒဵုဂှ် ပေါဲဗ္တိုက်ဂမၠိုၚ် သ္ကာတ်မြဟ်ကၠုၚ်မာန်ရောၚ် ကဵုလဝ်သတိရ။
လအာတုပ်သာ်ဂှ်ကီု ပ္ဍဲဂိတုဖေဖဝ်ဝါရဳ ၁၇ တေံဂှ်လေဝ် အာစိုပ်ဗ္တိုက်လဝ်ကဵုဒရုၚ် ကုရုၚ်တမ်ဒပ် ခလရ စၟတ် ၁၀၆ ဖျေံသ္ဇိုၚ်ကွာန်တၟအ်ကၞေၚ် ပွိုၚ်ဍုၚ်ရေဝ်ဂှ် ဗော်ဍုၚ်မန်တၟိ AD လလောၚ်ပ္တိတ်လဝ်ပရိုၚ်ရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ပိတၠချိုတ်အာတုဲ ပါလုပ်သီုကဵုဒုသ္ကိုပ်တမ်ဒပ်မွဲတၠတုဲ ပန်တၠ ဒဒှ်ရဇီုကပိုက်ကလိဂွံလဝ်ဝပ်ဂှ် ဂၠိုက်ဂၠါဲဂွံတီကေတ်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ရ။
ပရိုၚ်−သြၚ်လောန်တိုၚ်(မ်)
ဗီု−လကိုဟ်ဍုၚ်ရေဝ်