ကျာ်မြဟ်၊ ဖေဖဝ်ဝါ၇ဳ ၂၁
တွဵုရးဍုၚ်မန် ပွိုၚ်ဍုၚ်ကျာ်မြဟ် ပ္ဍဲကဵုကွာန်ဂြိုပ်ဗပုၚ် ဟိုတ်နူမာၚ်ဗ္တိုဟ်ထ္ကးအာလဝ် ပ္ဍဲကၠအ်ထၜိုတ်မွဲဂှ်တုဲ ကောန်ဂြောဝ်ဂတာမွဲတၠ ချိုတ်တုဲ ပန်တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဖေဖဝ်ဝါရဳ ၁၉ အခိၚ်လဒေါဝ်တ္ၚဲ ၜိုတ် ၁၂ နာဍဳ ကောန်ကလောန်ခွါတ်ထၜိုတ်မွဲတၠ ကပှ်ကေတ်နၚ်မာၚ်တိုပ်တိၜါမ လ္တူဂၠံၚ်တုဲ ၜုၚ်ထ္ကးစမ်ရံၚ်မာၚ်မွဲမ ကရောံဂြောဝ်ဂတာညးဂှ် ပရေၚ်ဗ္တိုဟ်ထ္ကး က္တဵုဒှ်အာလဝ်ရ။
ဟိုတ်နူမာၚ်ဗ္တိုဟ်ထ္ကးဂှ်တုဲ မၞိဟ်တြုံၜုၚ်ရံၚ်မာၚ်ဂှ်ဝွံ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ ကောန်ၚာ်သၟတ်နွံဒၟံၚ်တုပ်ပ်မွဲတၠ၊ မၞိဟ်တြုံၜါတၠ ကေုာံ မၞိဟ်ဗြဴမွဲတၠ ကလိဂွံလဝ်ဝပ်ရ။
မာၚ်ဏံဝွံ ဒှ်ဂကူမာၚ်ခတိုဟ်ကွဳစက် နူကဵုဒပ်ပၞာန်ဗၟာတမ်ဒပ်လၟေၚ်(၁၂) တအ် ပါန်စွံလေဝ်ဂှ်တုဲ တမ်ဒပ်ခမရ ၂၀၈ ဖျေံသ္ဇိုၚ်ကျာ်မြဟ် ပါမ်လဝ်ဒှ်မာန်ရောၚ် ဒပ်ပၞာန်ဗၠးၜးဍုၚ်မန် MLA လလောၚ်ပ္တိတ်လဝ်ပရိုၚ် ပ္ဍဲဂိတုဖေဖဝ်ဝါရဳ ၁၉ တေံရ။
နကဵုညးဍုၚ်ကွာန်ဂမၠိုၚ် ကပေါတ်ပၞာန်သှ်ေသၟေဟ်ဒၟံၚ်ဂမၠိုၚ်၊ အရာမဆက်စပ်ကဵုပၞာန်တံဂှ် လ္ပရပ် လ္ပစမ်တက်ဝေၚ်တုဲ အာတ်အရီုဗၚ် ဇရေၚ်ဂကောံပၠန်ဂတးမတံတုဲ သ္ဂောံၚးတးကဵုဂှ် ကဵုပရိုၚ်မာန်ရောၚ် ကဵုလဝ်သမ္တီရ။
တုဲကၠုၚ် ပ္ဍဲဂိတုဂျာန္နဝါရဳ ၉ တေံဂှ်လေဝ် ပ္ဍဲကဵုပွိုၚ်ဍုၚ်ကျာ်မြဟ် ဂၠံၚ်လုပ်ကွာန် (မရမ်းကုန်း) ဟိုတ်နူမာၚ်တိုပ်တိဗ္တိုဟ်ထ္ကးတုဲ မၞိဟ်တြုံမွဲတၠ ချိုတ်တုဲ မၞိဟ်ဗြဴမွဲတၠ ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−Social Media