တၞၚ်သဳ၊ ဖေဖဝ်ဝါရဳ ၂၂
ရးတၞၚ်သဳ ပ္ဍဲပွိုၚ်ဍုၚ်တၞၚ်သဳကဵု ပွိုၚ်ဍုၚ်ဍာ်ဗုဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်တံဂှ်တုဲ ညးဗြဴမွဲတၠ ချိုတ်တုဲ တြဴတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံကဵု ဂကောံဒပ်ပၠန်ဂတးတံရ။
တုဲကၠုၚ် ပ္ဍဲဂိတုဖေဖဝ်ဝါရဳ ၂၀ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် နူကဵုသၞေဟ်ကၚ်ကံၚ်ဇြဳပၞာန် ဖျေံလဝ်ဒပ် ပ္ဍဲကုန်ကျာ်ဒတဴဍာ်ဗု နွံပွိုၚ်ဍုၚ်ဍာ်ဗုဂှ် ပေါဲဗ္တိုက်ဟွံမွဲမွဲသာ် ပန်ပှော်နၚ်လဝ် လွဟ်ဇၞော် ပ္ဍဲကွာန် (ကျခတ္တပၚ်အၚ်း) ဟွံအောန်နူကဵုပန်ဝါရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ဒဝ်ခေန်ဝေန် အာယုက် ၅၀ သၞာံ ဒၟံၚ်ကွာန် (ကျခတ္တပၚ်အၚ်း) ဝွံ ဒးအာကဝေက်လွဟ်ဇၞော် ပ္ဍဲက္ဍိုပ်၊ ပ္ဍဲဒဳတံဂှ်တုဲ အဃောမပလံၚ်နၚ် ရုၚ်ဂဥုဲဂှ် ဒးထောံအာလဝ်ရောၚ် သ္ဂးရ။
လအာတုပ်သာ်ဂှ်ကီု ပ္ဍဲဂိတုဖေဖဝ်ဝါရဳ ၁၉ တေံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ဗာန်လမတ်ကဵု ကွာန်ပျေန်ဝန် ပွိုၚ်ဍုၚ်တၞၚ်သဳဂှ် ဟိုတ်နူပန်ခ္ဍိုၚ်ဒၟံၚ် လွဟ်ဇၞော်၊ လွဟ်ဍောတ် ကြာန်န်တုဲ ကောန်ၚာ်သၟတ်ၜါတၠ မပါလုပ် ညးဒေသတြဴတၠ ဇီုကပိုက်ကလိဂွံလဝ်ဝပ်ရ။
ပ္ဍဲပွိုၚ်ဍုၚ်တၞၚ်သဳဂှ် အကြာဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ဂှ် ဟိုတ်နူပေါဲဗ္တိုက်ၜါလ္ပာ်တုဲ ညးဒေသ ဗၞတ် ၁၀၀၀ နူကဵုကွာန်ပျေန်ဝန်၊ ဗာန်လမတ်၊ အရှေ့မော်တုန်း၊ ထုံနွယ် တံ ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ