မာန္တလေဝ်၊ ဖေဖဝ်ဝါရဳ ၂၂
ကောန်ထံၚ်ပရေၚ်ဍုၚ်ကွာန်မွဲတၠ ဒးဒၟံၚ်ထံၚ် ပ္ဍဲထံၚ်အိုဝ်ဗိုဝ် ရးမာန္တလေဝ် နကဵုၝောံပိုဒ်သၞောဝ်ပကီုပရာပ်ဂှ် ဟွံဂွံပရေၚ်မၚ်မွဲရံၚ်စံၚ်ပရေၚ်ထတ်ယုက်တံဂှ်တုဲ ဒးပြဟ်လလုဲအာလဝ်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ရ။
ဒဝ်သာန်ယဳ အာယုက်မၞုံ ၆၅ သၞာံ မဒှ်ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံလဝ်ဒဏ်ထံၚ် ၂၂ သၞာံ နကဵုသၞောဝ်ဗ္တိုက်သ္အးပွပကီုပရာပ် ပ္ဍဲထံၚ်အိုဝ်ဗိုဝ်တုဲ ညးဝွံ နကဵုယဲဆီၜေတ်၊ ယဲပဿဴဍာတ်၊ ယဲကောန်တၟအ်၊ ယဲဂြိုဟ်တံဂှ် ဒးပြဟ်လလုဲအာလဝ် ပ္ဍဲဂိတုဖေဖဝ်ဝါရဳ ၁၀ တေံရ။
ဒဝ်သာန်ယဳဝွံ တုဲကၠုၚ်သၞာံ ၂၀၂၁ ဂိတုဨပရဴတေံ နကဵုဟိုတ်ပၞုက်လဝ်သၟတ်ပိတၠ မဖံက်ခတိုဟ်လဝ်ဗုမ် ပ္ဍဲဗ္ဒိုပ်ဗၠာဲသၟိၚ် လၟေၚ် ၁၀ ပွိုၚ်ဍုၚ်ဆာန်မျတာသဳဂှ်တုဲ ဒးဒုၚ်ရပ်လဝ်ရ။
ကြဴနူဂှ်တုဲ ဒးဒုၚ်စောဲလဝ်ဂဗုတ် နကဵုသၞောဝ်ဗ္တိုက်သ္အးပွပကီုပရာပ် ၝောံပိုဒ် ၅၂ (က) ၊ ၅၀ (ည) တံဂှ်တုဲ ပ္ဍဲသၞာံ ၂၀၂၂ ဂိတုဖေဖဝ်ဝါရဳဂှ် ဒးဒုၚ်ဖျေံစၟတ်လဝ်ဒဏ်ထံၚ် ၂၂ သၞာံတုဲ ဒးဒၟံၚ်ထံၚ် ပ္ဍဲထံၚ်အိုဝ်ဗိုဝ်ရ။
ကိုဝ်တိုက်ထောန်ဥူ ကမ္မတဳက္ဍိုက်ပ် PPNM ဂှ်တှ်ေ သၞာံ ၂၀၂၅ ဏံဝွံ ဒှ်သၞာံဒးဆေၚ်ဒၟံၚ်မုက်ကဵု ပရေၚ်ဂဥုဲဇဗဟွံရုမ်ဂပ် အပ္ဍဲကဵုထံၚ်ဂှ် ဂၠိုၚ်နူကဵုသၞာံ ၂၀၂၄ တုဲကၠုၚ်တေံဏောၚ်တုဲ သွက်ညးတၠယဲ AIDS/HIV ကဵု ယဲတဳဗဳ မၞုံဒၟံၚ်အပ္ဍဲထံၚ်တံဂှ်လေဝ် ဂဥုဲဇဗပိုတ်အိုတ်ကၠုၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကဵုထံၚ်စာတ်တံဂှ် ဟွံဂွံကၠုၚ် ပရေၚ်မၚ်မွဲရံၚ်စံၚ်ပရေၚ်ထတ်ယုက်တံ ဗွဲမရုမ်ဂပ်ဂှ်ရ ညံၚ်ကောန်ထံၚ်ဂမၠိုၚ် ထပ်တုဲဟွံဂွံဒးပြဟ်လလုဲဂှ် သွက်ဂွံရေၚ်တၠုၚ်ကဵု ပရေၚ်မၚ်မွဲရံၚ်စံၚ်ပရေၚ်ထတ်ယုက်အပ္ဍဲထံၚ် ဍိုက်က်ပေၚ်ၚ်ဂှ်ကီု၊ သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန်တံ ဗွဲမပြဟ်ဂှ် PPNM အာတ်မိက်လဝ်ရ။
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ ပ္ဍဲကဵုထံၚ်စာတ်ကံၚ်ဇြဳပၞာန်တံဂှ် ဒၟါနူတံဟိုတ်ပရောပရာနာနာသာ်တုဲ ကောန်ထံၚ်ပရေၚ်ဍုၚ်ကွာန် မ္ဒးပြဟ်လလုဲအာတံဂှ် ၁၀၃ တၠ နွံတုဲ ပ္ဍဲကဵုဏံ ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက်တံ ဗွဲမရုမ်ဂပ်ဂှ်တုဲ ညးဒးထောံအာ နွံလဝ် ၆၃ တၠ ဂှ် AAPP လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−PPNM