ကမမံၚ်၊ ဖေဖဝ်ဝါရဳ ၂၂
ဟိုတ်နူပရိုၚ် ဒပ်ပၠန်ဂတးတံ လုပ်စိုပ်ဗ္တိုက် ဍုၚ်ကမမံၚ် တွဵုရးကရေၚ်ဂှ်ဏောၚ်ဂှ်တုဲ ဒပ်ကံၚ်ဇြဳပၞာန်ဝွံ ညံၚ်ဍုၚ်ဏံဟွံဂွံစှ်ေအာဂှ် သၠုၚ်ပ္တိုန်အသိၚ် ပလေဝ်ဒၟံၚ်ပၞာန်ဒုၚ်ရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော်သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပၠန်ဂတး သၟဝ်ပၠတရဴ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက် ဍုၚ်ကမမံၚ် ဗ္ဒိုပ်ဗျူဟာပၞာန်နွံမွဲဂှ်ဏောၚ် ဟိုတ်နူပရိုၚ်တိတ်ဒၟံၚ်သာ်ဏံဂှ်တုဲ ဒပ်ကံၚ်ဇြဳပၞာန်ဝွံ ညံၚ်ဟွံဂွံဒးဒုၚ်ဗ္တိုက်သီ ဍုၚ်ကမမံၚ်ဂှ် စနူဂိတုဖေဖဝ်ဝါရဳ ၁၇ တုဲ ဗပေၚ်ကၠုၚ်ဇြဟတ်ဒပ် ဍုၚ်ကမမံၚ်တုဲ ပလေဝ်ဒၟံၚ်ပၞာန်ဒုၚ်ရ။
အခိၚ်လၟုဟ်ဂှ်လေဝ် ဇြဟတ်ဒပ်ကံၚ်ဇြဳပၞာန် ၜိုတ် ၇၀ ပြၚ် နွံဒၟံၚ်လ္ပာ်ဂၠံၚ် မျာၚ်ကျဳၚူ−မေဝ်တဝဝ်ဂှ် နူမျာၚ်ကျဳၚူဏံမွဲကဆံၚ် တတ်ကၠောံကၠုၚ် ၜဳသၚ်လောန်တုဲ ဗပေၚ်ကၠုၚ်ဇြဟတ်ဒပ် ပ္ဍဲဍုၚ်ကမမံၚ်ဂှ် ညးမၞုံအခေါၚ်ဟီုဂး ဒပ်မဟာ ၅ ခရိုၚ်ဘာပန် သ္ကိုပ်ဗိုလ်ဇၞော်သဝ်ကလာဒိုဝ် သ္ဂးရ။
ပ္ဍဲဍုၚ်ကမမံၚ်ဂှ် ပေါဲဗ္တိုက်ၜါလ္ပာ်တံ ဟွံဂွံစက္တဵုဒှ်ဏီကီုလေဝ် ညးဍုၚ်ကွာန်ဒေသ မံၚ်ဒၟံၚ် ပ္ဍဲဍုၚ်ကမမံၚ်ကဵု ပ္ဍဲကွာန်ဗ္ဒါဲဗ္ဒါဲတံဂှ်ဝွံ ဂွိၚ်ကၠုၚ်ကဵု ပေါဲဗ္တိုက်ဒှ်ကၠုၚ်ဂှ်ကီု၊ သီုကဵုပရေၚ်ဗ္တိုက်ပၞာန်ကျာ ကေုာံ လွဟ်ဇၞော် နူဒပ်ကံၚ်ဇြဳပၞာန်တံဂှ်တုဲ ဂြိပ်တိတ်ကၠုၚ်ဒၟံၚ် လ္ပာ်မျာၚ်ကျဳၚူ နကဵုလၟိဟ်ဗွဲမဂၠိုၚ်ဂၠေၚ်ရ။
ဍုၚ်ကမမံၚ်ဝွံ နွံဒၟံၚ်ဗွဲဒိုဟ်သၠုၚ်ကျာ ခရိုၚ်ဘာပန် KNU တုဲ မ္ၚးမူကဵုဗျူဟာပၞာန်ကမမံၚ် မဒှ်ဗျူဟာပၞာန်ဒပ်ကံၚ်ဇြဳပၞာန် လ္တူဂၠံၚ်ဇၞော် ကမမံၚ်−ဘာပန်ဂှ်ကဵု ဒပ်ကံၚ်ဇြဳပၞာန် တဝ်စၞေဟ်ဗ္တိုက်ဒၟံၚ် ပ္ဍဲဌာန်ဂအုပ်တမ်ဒပ် BGF ၁၀၁၃ ပ္ဍဲဒေသကတိုၚ်တိတံဂှ် ကုဗျူဟာပၞာန်ဘာပန်ဂှ်လေဝ် ဒပ်မဟာ ၅ သ္ဂောံဆက်သီ သှ်ေဒၟံၚ်ဏီရ။
ဂကောံပၠန်ဂတးမဟာမိတ် သၟဝ်ပၠတရဴဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ ၅ ဂှ်ဝွံ စနူကၞောတ်သၞာံ ၂၀၂၄ တုဲကၠုၚ်တေံတုဲ ဗ္တိုက်သီကၠုၚ်ဒၟံၚ် ဗ္ဒိုပ်ဒပ်ကံၚ်ဇြဳပၞာန် နွံပ္ဍဲခရိုၚ်ဘာပန် မွဲတုဲမွဲတုဲ မ္ၚးနူကဵုတိဍာ်ဒပ်မဟာ ၁ ပွိုၚ်ဍုၚ်ၜဳကလေၚ်၊ ဗ္ဒါဲကွာန်နာတ်ကျဳဂှ် စိုပ်ကၠုၚ်ဒၟံၚ် ဒဵုကဵုလ္တူဍုၚ်ကမမံၚ် မဒှ်တိဍာ်ကြပ်ဒၟံၚ်ကဵု ဒပ်မဟာ ၁ ကဵု ဒပ်မဟာ ၇ ဂှ်ရ။
ဒေသမျာၚ်ကျဳၚူ နွံဗွဲဒိုဟ်ဗၟံက် ဍုၚ်ကမမံၚ်ဂှ်ဝွံ ဒှ်တိဍာ်ဒပ်မဟာ ၇ ခရိုၚ်ဘာအၚ် KNU တုဲ ဗွဲဒိုဟ်ပလိုတ် ကဵု ဗွဲဒိုဟ်သၠုၚ်ကျာဂှ် ဒှ်တိဍာ်ဒပ်မဟာ ၁ ခရိုၚ်သဓီုတုဲ၊ လ္တူဍုၚ်ဂှ်ကဵု သၟဝ်ကျာဍုၚ်ဂှ်ဝွံ ပါလုပ်ပ္ဍဲဒပ်မဟာ ၅ တုဲ ဍုၚ်ကမမံၚ်ဝွံ နူကဵုဍုၚ်ဇၞော်တွဵုရးကရေၚ် ဍုၚ်ဘာအၚ်ဂှ် ခြာဒၟံၚ် ဗၞတ် ၅၀ မိုၚ်ရ။
ပရိုၚ်−သြၚ်လောန်တိုၚ်(မ်)
ဗီု − Social Media