မတ်မလီု၊ ဖေဖဝ်ဝါရဳ ၂၂
စပ်ကဵုဒေါအ်ဒေၚ်ကၠုၚ် အထံက်အပၚ်ဍုၚ်အမေရိကာန် မကဵုဒၟံၚ်သွက်ဍုၚ်ဗၟာဂှ်တုဲ ကြုက် ညာတ်ကၠုၚ် နဒဒှ်အခေါၚ်အရာ ညံၚ်ဂွံဇၞော်ပၟဝ်သြဇာတုဲ ရပ်စပ်ကၠုၚ်မာန်ဟာဟီုဂှ် လညာတ်ဟွံတုပ်သၟဟ်ဂမၠိုၚ် နွံဒၟံၚ်ရ။
သွက်ဂွံကလေၚ်သ္ၚဳဂၠိပ် ခရိတ်အရပ်စပ် မထံက်ပၚ်ကဵုဒၟံၚ် သွက်ဍုၚ်သ္အာၚ်တံဂှ် သမ္မတအမေရိကာန် ဒဝ်နေဝ်ထြာမ် ကဵုလဝ်အမိၚ် သ္ဂောံဒေါအ်ဇူအစဳဇန်ဏံ ပွိုၚ် ၉၀ တ္ၚဲရောၚ် ပ္ဍဲဂိတုဂျာန္နဝါရဳ ၂၄ တေံ ဌာနဝန်ဇၞော်ကာဍုၚ်သ္အာၚ် လလောၚ်ပ္တိတ်လဝ်ရ။
ကြဴနူဂှ်တုဲ ပ္ဍဲဂိတုဖေဖဝ်ဝါရဳ သတ္တာဟဒုတိယဂှ် ဒဝ်နေဝ်ထြာမ် ဒေါအ်ကၠေံ အစဳဇန်အမေရိကာန် ပရေၚ်ဖောအ်ဗြေဝ်ဍုၚ်သ္အာၚ် USAID ဂှ်တုဲ သွာၚ်ကလိဂွံဒၟံၚ်အထံက်အပၚ် သွက်ဍုၚ်ဗမာတံဂှ်လေဝ် ဒေါအ်ဇူအာလဝ် တုပ်ပ်ကီုရ။
ပ္ဍဲကဵုဏံဂှ် သွက်ပွိုၚ်ပိသၞာံဂတဏံ အစဳဇန်စပ်ကဵုအခေါၚ်အရာမၞိဟ် (၇) မကဵုအာသွက်ဍုၚ်ဗၟာ ၚုဟ်မးမၞုံ ၈ ပြကောဋိကိုဋ်ဒဝ်ဠာ၊ အစဳဇန်သၠုၚ်ပ္တိုန်ဒဳမဝ်ကရေဇြဳ ၉ သွက်အစဳဇန်ဏံဂှ် ၃၀ ပြကောဋိကိုဋ်ဒဝ်ဠာ ကေုာံ သွက်ကိုန်စဳမာန်ပရေၚ်ဖောအ်ဗြေဝ်မဳဒဳယျာတံဂှ် ဒဝ်ဠာ မွဲပြကောဋိကိုဋ် ပါလုပ်ရ။
အကာဲအရာက္တဵုဒှ်ဒၟံၚ်သာ်ဏံဂှ် ဍုၚ်ကြုက်ဂှ်တှ်ေ နူကၠာတေံရ သွက်ဂွံလုပ်စိုပ် ဒၞါဲမဳဒဳယျာဗၠးၜးဍုၚ်ဗၟာတံဂှ် ပ္တိတ်ကၠုၚ်ဒၟံၚ်ဇြဟတ်ဂှ်ရ ကေတ်ကၠုၚ်အခေါၚ်ခိုဟ်လ္တူဏံမာန်ရောၚ် ဥူတိုဝ်ဇြဝ်လာတ် သ္ကိုပ်အုပ်ဓုပ် ကံၚ်ဇြဳမဳဒဳယျာပရိုၚ်ဍုၚ်ဗၟာ IPCM ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခိၚ်ဂွံဒၟံၚ်လာၚ်ဇြေန် နူ(မြန်မာ့အသံ) တေံ ချာန်နေဝ်ပိုယ်တံ DVB Mizzima တံဂှ် အခိၚ်သီအဝဵုဂှ် ကလေၚ်သီဏာလဝ်ရ။ ကလေၚ်ကဵုထောံညးဂှ်ရောဟီုတှ်ေ မွဲဂှ်တှ်ေ ချာန်နေဝ်ထ္ၜးရုပ်ဒမျိုၚ် မဟာ၊ မွဲပၠန်ဂှ်တှ်ေ ကဵုထောံ Lucky 7 ချာန်နေဝ်ကြုက် မွဲလှ်ေဟွံကေၚ်မိၚ်ပုဟ်။ နကဵုကြုက်ဂှ်တှ်ေ ဗီုညးတံလုပ်စိုပ်ပလာပ်ပထုဲဒၟံၚ် ပ္ဍဲပရေၚ်ပၞာန်၊ ပရေၚ်ပိုန်ဒြပ်၊ ပရေၚ်ဍုၚ်ကွာန်တံဂှ်ကီု ဂွံပ္တန်ပ္တူသြဇာညးတံဂှ် လ္ပာ်သွာၚ်မဳဒဳယျာဂှ်လေဝ် လုပ်ကၠုၚ်ဗွဲစၟတ်ဏောၚ် မိက်ဂွံဟီုဏာရ” သာ်ဝွံ သ္ဂးရ။
ဟိုတ်နူအမိၚ် ဒဝ်နေဝ်ထြာမ်တုဲ သြန်ဗွဝ် သွက်ဍုၚ်ဗၟာ သွက်ပရဝ်ဂျက် ၃၄ ဂှ် ဒေါအ်ဇူလဝ်တုဲ သွက်အခေါၚ်အရာမၞိဟ်၊ ပရေၚ်ဒဳမဝ်ကရေဇြဳ ကေုာံ သွက်အရီုဗၚ်ပရေၚ်ဗ္စာရဏာမၞိဟ်တံဂှ် ၂၂ ပြကောဋိကိုဋ် ပါလုပ်ရ။
သ္အာၚ်နူဂှ်ပၠန် သွက်ပရေၚ်တဵုလွဳဂှ် ၃၆ ပြကောဋိကိုဋ်၊ သွက်ပရေၚ်ထတ်ယုက်ဂှ် ၂၂ ပြကောဋိကိုဋ်ဒဝ်ဠာ ကေုာံ သွက်ပရေၚ်ပညာဂှ် ၃၀ ပြကောဋိကိုဋ်ဒဝ်ဠာ အရာတံဏံလေဝ် ပါလုပ်ဒၟံၚ် ပ္ဍဲပရဝ်ဂျက်သြန်ဗွဝ် ဒးဒုၚ်ဒေါအ်ဇူလဝ်ဂှ်ကီုရ။
အပ္ဍဲကာလအလဵုအသဳအမေရိကာန် ဒေါအ်ဇူလဝ် အရီုဗၚ်ဂမၠိုၚ်ဂှ် ပ္ဍဲကဵုဗ္ဒိုပ်ညးဒဒိုက်ပယျဵုတံဂှ်တှ်ေ ဇီုကပိုက်ကၠုၚ်ကဵု သွက်ပရေၚ်ထတ်ယုက်၊ သွက်ပရေၚ်ဗ္စာရဏာမၞိဟ်တံ နွံဒၟံၚ်ရောၚ် NUG ဟီုပ္တိတ်လဝ်ရ။
သွက်ဏံဂှ် နကဵုအလဵုအသဳညဳသၟဟ်ဂကူ NUG ပံၚ်ကၠေံ ဌာနပရေၚ်ဗ္စာရဏာမၞိဟ်ကဵု ဌာနပရေၚ်ထတ်ယုက်တံဂှ်တုဲ ညံၚ်သ္ဂောံဂွံအထံက်အပၚ်တၞဟ်သ္အာၚ်ဂှ် ဂၠါဲအာဂၠံၚ်ဏောၚ် သ္ဂးရ။
ဒဵုအခိၚ်လၟုဟ် သွက်အရီုဗၚ်ဍုၚ်သ္အာၚ် မဒေါအ်ဇူလဝ်ဂှ် ဂွံကလေၚ်ကဵုအာ သြန်ဗွဝ်တံဏံ နွံ၊ ဟွံမွဲဂှ်လေဝ် လ္ပာ်အလဵုအသဳအမေရိကာန် ဟီုပ္တိတ်ကၠုၚ်လဝ် သောၚ်ၚ်ကၠးကၠးဂှ် ဟွံမွဲဏီရ။
စနူအခိၚ်သီအဝဵုတုဲ ဒဵုတ္ၚဲဏံ ပ္ဍဲဍုၚ်ဗၟာ အခေါၚ်အရာမၞိဟ်၊ အခေါၚ်အရာဒဳမဝ်ကရေဇြဳ မဆုတ်ယောၚ်စှ်ေကၠုၚ်ဒၟံၚ်ဂှ် ယဝ်ဟွံကလေၚ်ဂွံအထံက်အပၚ်အမေရိကာန်မ္ဂး သွာၚ်ဇဳ ကြေပ်ဂြတ်ကၠုၚ်မာန်ရ။
သွက်ဒၞါဲအထံက်အပၚ် တၠဒါန်ဟွံမွဲဒၟံၚ်ဏံဂှ် ဍုၚ်ကြုက် ထ္ၜးဟိုတ်ကဵုပရေၚ်ဓလိုက်တမ်ရိုဟ်တံဂှ်တုဲ မလုပ်အကြာပ္ညဳပ္ညပ်ကဵုဒၟံၚ် ပရေၚ်ဍုၚ်ကွာန်၊ ပရေၚ်ပၞာန် ပ္ဍဲကဵုပရေၚ်ဍုၚ်ဗၟာတံဂှ် လုပ်စိုပ်ကၠုၚ်ဒၞါဲဏံမာန်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ်တှ်ေ နကဵုဍုၚ်ကြုက် စပ်ကဵုပရေၚ်ဍုၚ်ဗၟာတုဲ သ္ဇက်ဂွံကဵုအာ အခေါၚ်အရာသာ်ဏံ ဟွံမွဲပုဟ်ဂှ် သ္ၚဳဂၠိပ်လဝ်ရ။
“နကဵုဍုၚ်ကြုက်ဂှ်တှ်ေ စပ်ကဵုဍုၚ်ဗၟာတုဲ ဂွံကဵုကၠုၚ်အခေါၚ်အရာသာ်ဏံဂှ် ကြပ်ဒှ်ဟွံမာန်ပုဟ်။ မူဟိုတ်ရောတှ်ေ လၟေၚ်ကမၠောန်အခေါၚ်အရာမၞိဟ် နူကဵုကုလသမဂ္ဂ မစၞောန်ပျးသ္ပလဝ်စၟတ်သမ္တီဂှ် ဍုၚ်ကြုက် ဟွံသ္ပလဝ်စၟတ်သမ္တီပုဟ်။ အခေါၚ်အရာမၞိဟ်မွဲမွဲဟီုဂှ် ဍေံတံ (ကြုက်) ရှ်ေသှ်ေအဲပရဲကၠုၚ်ဒၟံၚ် ဟွံသေၚ်ပုဟ်” သာ်ဝွံ သ္ဂးရ။
ဍုၚ်ဒဳမဝ်ကရေဇြဳဂမၠိုၚ်ဝွံ ကဵုအရီုဗၚ် နကဵုလညာတ် ဇၟာပ်မၞိဟ် သ္ဒးကလိဂွံအခေါၚ်အရာမၞိဟ်ပေၚ်ၚ်ဂှ်တုဲ သွက်ဂွံသၠုၚ်ပ္တိုန်ကဵု ပ္ဍဲကမၠောန်ပရေၚ်ပညာ၊ ပရေၚ်မၞိဟ်၊ ပရေၚ်ပိုန်ဒြပ် ကုဍုၚ်မကျာတ်ဝါတ်တံဂှ် ခၞံဗဒှ်ကဵုလဝ်ရောၚ် ညးထံက်ထ္ၜးရ။
မွဲလ္ပာ်ဂှ်ပၠန် စပ်ကဵုဒဝ်နေဝ်ထြာမ် ကလေၚ်သ္ၚဳဂၠိပ် အထံက်အပၚ်အရီုဗၚ် ကဵုဒၟံၚ်ဍုၚ်သ္အာၚ်တံ အပ္ဍဲပွိုၚ် ၉၀ တ္ၚဲဂှ်တုဲ ညံၚ်ဟွံဂွံထပိုတ်ထောံဂှ် ရေၚ်တၠုၚ်အာဏောၚ် ဝန်ဇၞော်ကာဍုၚ်သ္အာၚ် NUG ဒဝ်ဇြေန်မာအံၚ် ဟီုလဝ်ရ။
ပရေၚ်ဍုၚ်ဗၟာ ညံၚ်ဂွံဆက်နွံအာ ပ္ဍဲမူဝါဒကာဍုၚ်သ္အာၚ်အလဵုအသဳအမေရိကာန် နူကဵုကဆံၚ်ဒၞါဲမ္ဒးကဵုက္ဍိုပ်ဂှ် ဆဵုဂဗကဵု ညးတာလျိုၚ်ဍုၚ်အမေရိကာန် နူသီုဗော်ၜါလ္ပာ်ဂှ်တုဲ စန်ဒက်အာဏောၚ်ဂှ် ဟီုလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၉ တေံရ။
ပရိုၚ်−သြၚ်လောန်တိုၚ်(မ်)
ဗီု−Social Media