သဓီု၊ ဖေဖဝ်ဝါရဳ ၂၃
ညးပါဲဒဴဘဲပၞာန်ဗ္ဒါဲၜါဠက် နူကဵုတိဍာ်ထိၚ်ဒဝ် ခရိုၚ်သဓီု ဗော်သွးကောန်ဂကူကရေၚ် KNU နူကဵုပွိုၚ်ဍုၚ်ကျာ်ထဝ်၊ ၜဳကလေၚ် ကေုာံ ပွိုၚ်ဍုၚ်ဘာအၚ်တံဂှ်ဝွံ နွံပၟိက်ဒၟံၚ်ကဵု အရီုဗၚ်ကာတၟေၚ် ပပ္တံနူကဵုဂဥုဲဇဗ သီုကဵုဇွောံမစၞစသ္ဇိုၚ်တံဂှ်ရောၚ် ဂွံတီကေတ် ဇရေၚ်ခရိုၚ်သဓီု KNU ရ။
စနူဂိတုဂျာန္နဝါရဳတုဲကၠုၚ်တေံတုဲ မ္ၚးနူကဵုပေါဲဗ္တိုက်ၜါလ္ပာ် မက္တဵုဒှ်ဒၟံၚ် ပ္ဍဲပိပွိုၚ်ဍုၚ်ဏံဂှ် ဟိုတ်နူဒပ်ကံၚ်ဇြဳပၞာန် ပန်ဗ္တိုက်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဒေသ နူ ၅၀ ကွာန်ပြၚ် လၟိဟ်နွံ ဗ္ဒါဲၜါဠက် ဒးပါဲဒၟံၚ်ဘဲပၞာန်ရ။
ညးပါဲဒဴဘဲပၞာန်ဂမၠိုၚ်ဝွံ တ္ၚဲဒးပါဲဘဲပၞာန် ဂၠိၚ်သ္ၚောဲကၠုၚ်ဗက် စနူကဵုဇွောံမစၞစသ္ဇိုၚ်၊ ဂဥုဲဇဗ၊ ကၟဳဒဒၚ်၊ ဂၠိက်ယာတ်တံဒှ်တမ် အခက်အခုဲနွံကၠုၚ်ဂှ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပြဟ်ဟ်ဏံ ဂကောံခရိုၚ်သဓီု KNU ထံက်ပၚ်ရီုဗၚ်ကဵုလဝ် ကုညးဍုၚ်ကွာန်ပါဲဘဲပၞာန်တံကီုလေဝ် အရာမနွံပၟိက်တံ နွံဒၟံၚ်ဏီတုဲ ဍာ်ဇမၠိၚ် ဒးဂဗဒၟံၚ်ကဵု ဇွောံမစၞစပိုတ်အိုတ်တံမာန်ရောၚ် သ္ဂးရ။
ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ မွဲလ္ပာ်ဂှ်တှ်ေ ဟိုတ်နူပရေၚ်ဗ္တိုက်ပၞာန်ကျာ ကေုာံ လွဟ်ဇၞော် နူကဵုဒပ်ကံၚ်ဇြဳပၞာန်တံဂှ်တုဲ ပရေၚ်ဒှ်ဓဝိၚ်တံ နွံဒၟံၚ်တုဲ ညးပါဲဘဲပၞာန်ဂမၠိုၚ် ဟွံဂံၚ်စဴဌာန်ဒၟံၚ်ဏီရ။
အတိုၚ်လိက်ဒုၚ်ဏဳရေၚ် ဂကောံရုၚ်ပ္ညဳပ္ညပ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA ဂှ်မ္ဂး အပ္ဍဲပၞာန်သီအဝဵုပွိုၚ်ပန်သၞာံဏံ ပ္ဍဲဍုၚ်ဗၟာ သာနွံပၟိက်ကၠုၚ်ကဵု အရီုဗၚ်ပရေၚ်ဗ္စာရဏာမၞိဟ်တံတုဲ လၟိဟ်မၞိဟ်ထောံလသာဌာန်ဒၟံၚ်အပ္ဍဲဍုၚ်ဂှ် သၠုၚ်တိုန်ကၠုၚ် စဵုကဵု ၃ ဒဿမ ၅ ပြကောဋိကိုဋ်ရ။
ပရိုၚ်−သြၚ်လောန်တိုၚ်(မ်)
ဗီု−CJ