ဗြဝတဳ၊ ဖေဖဝ်ဝါရဳ ၂၇
နကဵုအလဵုအသဳသေံ ညံၚ်ဂွံသၠုၚ်ပ္တိုန်အသိၚ် လၟေၚ်ကမၠောန်သ္ဂောံပ္တိတ်လိက်ဝါရာန်ရပ် ကုက္ဍိုပ်သ္ကိုပ်ဒပ်မၚ်ပယျဵု BGF ပိတၠဂှ် ပ္ဍဲဂိတုဖေဖဝ်ဝါရဳ ၂၅ တေံ Justice For Myanmar ဖ္တိုက်ဖ္အောဝ်လဝ် နူကဵုတၚ်လလောၚ်ပ္တိတ်ရ။
သ္ပဟိုတ်ကဵုပရေၚ်သွံရာန်မၞိဟ်တုဲ သွက်ဂွံပ္တိတ်ဝါရာန်ရပ် ကုက္ဍိုပ်သ္ကိုပ် BGF သ္ကိုပ်ဗိုလ်ဇၞော် သဝ်ချေတ်တူ၊ ဒုသ္ကိုပ်ဗိုလ်ဇၞော် သဝ်မုတ်သုန်၊ ကေုာံ သ္ကိုပ်ဗိုလ် သေဝ်တေန်ဝေန်တံမာန်ဂှ် ဌာနဂၠိုက်ဂၠါဲစၟဳတ်ဗွဲတၟေၚ် အလဵုအသဳသေံ DIS ကၠောန်သ္ပလဝ် ပရေၚ်ဂၠိုက်ဂၠါဲစၟဳတ်ရ။
ပ္တိတ်လဝ်လိက်ဝါရာန်ရပ် ကုညးတံဂှ်ဝွံ ပ္ဍဲအရာသောၚ်ကလး အမှုရာဇဝတ် က္ဍိုပ်သ္ကိုပ် BGF တံ ကလိလောန်ဒၟံၚ်တံဂှ် ဒှ်ကၠုၚ်လဂါံဇိုၚ်ပၟိက်ဇၞော်မွဲဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သွက်ဂွံဗ္တိုက်ဖလှေက်ကၠေံ ကမၠောန်ဂိုန်ရာဇဝတ်ကၠောံပယျဵုကၠောံဍုၚ်တံ ဗွဲမပြဟ်ဂှ် ဇြဟတ်ဓရိုဟ် နူအပ္ဍဲဍုၚ်ကီု နူဍုၚ်သ္အာၚ်တံကီုဂှ် သၠုၚ်တိုန်ကၠုၚ်ဒၟံၚ်ယျတုဲ ပရေၚ်မအာတ်ပ္တိုန်လဝ်လိက်ဝါရာန်ရပ်တံဂှ်လေဝ် မ္ဒးဗက်ကၠောန်အာကီုဏောၚ်ဂှ် Justice For Myanmar သ္ဂးရ။
ဍုၚ်သေံဝွံ ပ္ဍဲကဵုဒေသပယျဵုဍုၚ်ဗၟာ ဒၞါဲဒတန်ကၠအ်ကမၠောန်လီဠာန်သြန်လပှ်ကျာတံ နွံဒၟံၚ်ဂှ် ခြာဟွံလအ်ဏံ ထပိုတ်ကၠုၚ်လဝ် ပၟတ်ဓာတ်လလဳ၊ ကၠေၚ်စက် ကေုာံ အေန်တာနိတ်တံရ။
ကောန်ကလောန်ဂၠိုၚ်ကဵုကၠံ နွံဒၟံၚ်ပ္ဍဲဒၞါဲတံဏံဂှ် လှဲပြံၚ်ကဵုလဝ် ဇရေၚ်ဍုၚ်သေံကီုလေဝ် ဂွံပလီုကၠေံကမၠောန်ဏံ စဵုကဵုအိုတ်အးမာန်ဂှ် ဆက်ကဵုဒၟံၚ်ဇြဟတ်ဓရိုဟ်ဖိုဟ်ရောၚ် ဟီုရ။
အတိုၚ်လိက်ဒုၚ်စဳရေၚ် Justice For Myanmar ပ္ဍဲသၞာံ ၂၀၂၄ ဂှ်မ္ဂး နကဵုက္ဍိုပ်သ္ကိုပ် BGF တံကဵု ကောန်ဂြောဝ်ဂတာညးတအ်ဂမၠိုၚ် နူကဵုပရေၚ်ထိၚ်လဝ်တိဍာ်၊ ပရေၚ်ပိုၚ်ပြဳ ပ္ဍဲကမၠောန်တိသ္ၚိကၠအ်၊ အကံက်အခေါန်၊ ပရေၚ်ဂီုကၠီု၊ ကမၠောန်ဓလုက်၊ ပရေၚ်သွံရာန်မၞိဟ် ကေုာံ နူကဵုပရေၚ်သွံတြးဗၞိက်မၞိဟ်အရပ်စပ်တံဂှ်မွဲကဆံၚ် ကလိဂွံဒၟံၚ်ဒတုဲကၟဝ် နူကဵုကမၠောန်ရာဇဝတ်ကၠောံဍုၚ်ကၠောံပယျဵုတံဂှ်ဏောၚ် ထ္မံက်ပ္တိတ်လဝ်ရ။
က္ဍိုပ်သ္ကိုပ် BGF တံဂှ်တှ်ေ ကိုန်စဳမာန်ပရေၚ်ဓလိုက်တမ်ရိုဟ် မရေၚ်တၠုၚ်ကၠုၚ်လဝ် ပ္ဍဲဒေသပယျဵုတံဂှ်ဝွံ ဒှ်သွက်ပရေၚ်ဒေသဂွံဖောအ်ဗြေဝ်ရတုဲ ဟွံဆက်စပ်ကဵုကမၠောန်လီဠာန်သြန်လ္တူလပှ်ကျာတံဂှ်မွဲသာ် ညးတံဝွံ ၜိုတ်ဒှ်ဒၟံၚ်တၠတိ လိၚ်စတိသၟးရဏောၚ်ဂှ် တုဲကၠုၚ်မွဲသတ္တာဟပြၚ်တေံ ဟီုပ္တိတ်ကၠုၚ်လဝ်ရ။
ပရေၚ်စောဲစပ်ဂဗုတ်စပ်ကဵုအမှုရာဇဝတ် လ္တူမၞိဟ်ပူဂဵု၊ လ္တူကုမ္ပဏဳသေံ မရီုဗၚ်ကဵုဇြဟတ် ကုဂြောဝ်ဂတာညးတံ၊ ကုညးမကၠောန်ပရေၚ်ပိုန်ဒြပ်မွဲစွံတံ၊ ကုသ္ကိုပ်ဒပ် နူဒပ်ပၞာန်ဗၟာ၊ ကုကမၠောန်ရာဇဝတ်တံဂှ်တုဲ မဂွံဒၟံၚ်ဒတုဲကၟဝ်တံဂှ် နကဵုသၟိၚ်တၠအဝဵုသေံတံ ထေက်ကဵုဒးသၠဲပ္တိုန်ဂှ် Justice For Myanmar သ္ဂးရ။
ဒပ်ပၞာန်ဗၟာလေဝ် ဒှ်ညးမရီုဗၚ်ကဵုဒၟံၚ်ဇြဟတ် ကုကမၠောန်လီဠာန်သြန်လ္တူလပှ်ကျာတံကဵု ပရေၚ်သွံရာန်မၞိဟ် အပ္ဍဲဒေသတံ အဓိကတုဲ လွဳစွံလဝ် ကမၠောန်ရာဇဝတ်ဇၞော်ဇၞော်တံဏံကဵု ဒပ်မၚ်ပယျဵုကရေၚ် BGF တံဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဒှ်သာ်ဂှ်ရ နကဵုသၟိၚ်တၠအဝဵုသေံတံဂမၠိုၚ် ကုဒပ်ပၞာန်ဗၟာ မဒှ်တမ်ရိုဟ်ပရေၚ်သွံရာန်မၞိဟ် ကမၠောန်လီဠာန်သြန်သာ်ဗာတံဏံဂှ်လေဝ် မ္ဒးပသောၚ်ၚးတးဏောၚ်ဂှ် Justice For Myanmar ဖ္တိုက်ဖ္အောဝ်လဝ်ရ။
နကဵုဍုၚ်သေံ မ္ၚးနူရေၚ်တၠုၚ်ကဵုဒၟံၚ် ညံၚ်ဂကောံပၞာန်ဗၟာ ဂွံလုပ်ကဵုသၞောဝ်ဂှ်သၟးဟွံက လုကဴဆက်ကဵုဒၟံၚ်သြန်ဘဏ္ဍာ နူပွမရာန်ကေတ်ဒၟံၚ်သၟုဟ်ဓာတ်သဘာဝတံဂှ်မ္ဂး ပရေၚ်သွံရာန်မၞိဟ် ကေုာံ ပရေၚ်လီဠာန်သြန်လ္တူလပှ်ကျာတံ ဆက်နွံဒၟံၚ်ဏောၚ်ဂှ် ကဵုလဝ်သတိ ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ