ယှိုဲကုက္ကိုဝ်၊ ဖေဖဝ်ဝါရဳ ၂၇
လ္ပာ်ဍုၚ်သေံ ထပိုတ်လဝ်ကၠေၚ်စက် ကဵု ပၟတ် ပ္ဍဲဍုၚ်ယှိုဲကုက္ကိုဝ်၊ ဍုၚ်ဗြဝတဳ လ္ပာ်ဍုၚ်ဗၟာတံဂှ်ကီုလေဝ် ပ္ဍဲဍုၚ်ယှိုဲကုက္ကိုဝ် ဒၞါဲကမၠောန်ကျာဖျတံနွံဂှ် သုၚ်စောဲကၠေၚ်စက်ရာန်နၚ် နူဘာအၚ်တံဂှ်တုဲ ညံၚ်ကမၠောန်ဂမၠိုၚ် ဂွံဆက်ဂေတ်ဂြိပ်ဂှ် ကၠောန်ၜိုတ်ဒၟံၚ်ရောၚ် တမ်ရိုဟ်ပရိုၚ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စွံပွန်ကဵု ကမၠောန်ရာဇဝတ် ကေုာံ ကမၠောန်လီဠာန်သြန်လ္တူလပှ်ကျာ ကမၠောန်ကျာဖျတံဂှ်တုဲ ကၠေၚ်စက်ကဵု ပၟတ်ဓာတ်လလဳ နူအလဵုအသဳသေံ သွံတြးကဵုဒၟံၚ် လ္ပာ်ဍုၚ်ဗၟာ ဍုၚ်ဗြဝတဳ ယှိုဲကုက္ကိုဝ်ဂှ် ပ္ဍဲဂိတုဖေဖဝ်ဝါရဳမံက်တေံ စထပိုတ်လဝ်ရ။
အလဵုအသဳသေံ ဟိုတ်နူထပိုတ်လဝ်ကၠေၚ်စက်တံဂှ်တုဲ ညးဍုၚ်ကွာန်ဒေသဍုၚ်ဗြဝတဳ မဒှ်ဒၟံၚ်ဒဒိုက်ကုကၠေၚ်စက်တံဂှ်ဝွံ ဂွံဂွံကၠေၚ်စက်ဂှ် အာစိုပ်လ္ပာ်ဍုၚ်မာဲချံက် ဍုၚ်သေံတုဲ ပၠံၚ်ရာန်ကေတ်ဒၟံၚ်တံ နွံတုဲ ပ္ဍဲကဵုက္ဍိုပ်ဒဒန်ပရေၚ်ဆာန်ကၟိန် လၟေၚ် ၁ ဍုၚ်ဗြဝတဳဂှ် ယာန်ကွဳစက်ဂမၠိုၚ် ဆိုအ်ဗအာကၠုၚ်ဟွံဂွံ ဒှ်ဒၟံၚ်ကြပ်အရိုဟ်ဒဒှ်တ္ၚဲရ။
ပ္ဍဲဍုၚ်ယှိုဲကုက္ကိုဝ်ဂှ်တှ်ေ စနူအလဵုအသဳသေံ ထပိုတ်လဝ်ပၟတ်ကဵုကၠေၚ်စက် ပ္ဍဲဂိတုဖေဖဝ်ဝါရဳမံက်တေံဂှ်တုဲ ပၟတ်ပိုတ်ကီု၊ ကၠေၚ်စက်ပိုတ်တံကီုဂှ် က္တဵုဒှ်လဝ်တုဲ ကမၠောန်ဂမၠိုၚ် ဒးဒေါအ်ဇူကၠုၚ်လဝ်တုဲ ဗွဲကြဴဏံ ဂွံဂွံကၠေၚ်စက်ဂှ် ဒပ်မၚ်ပယျဵုကရေၚ် BGF ဒးကေတ်နၚ်ဒၟံၚ် ပ္ဍဲဍုၚ်ယှိုဲကုက္ကိုဝ် နကဵုနဲကဲနာနာသာ်ရ။
နူကဵုဍုၚ်ဘာအၚ်မွဲကဆံၚ် ကောန်ဒပ် BGF တအ် ဖ္ဍိုက်နၚ်စေဝ်ကၠေၚ်စက်နကဵုကွဳစက် လ္ပာ်ပ္ဍဲဍုၚ်ယှိုဲကုက္ကိုဝ်တုဲ ကၠေၚ်စက်ရာန်ဂွံနၚ်တံဂှ် ကလေၚ်သွံတြးဒၟံၚ် ကုညးဍုၚ်ကွာန်လ္တူဍုၚ်တံကဵု ကမၠောန်ကြုက်တံရ။
ပ္ဍဲဍုၚ်ယှိုဲကုက္ကိုဝ်ဂှ် ကမၠောန်ဝေၚ်ၛၚ်လံၚ်သြန်၊ ကမၠောန်ကာသဳနဝ် ကမၠောန်ကေတဳဗဳ၊ ကမၠောန်ဟဝ်တေဝ်၊ ကမၠောန်ဆေၚ်စသုၚ်၊ ဆေၚ်ဖုၚ်၊ ကမၠောန်သိုၚ်ခၞံတံဝွံ ဒးသ္ပပဓာန်ဒၟံၚ်ကဵု ကၠေၚ်စက်ကောန်ဒပ် BGF တံ မရာန်ဂွံနၚ်နူကဵုဘာအၚ်တံဂှ်ရောၚ် ညးဒေသမွဲတၠ သ္ဂးရ။
ကြဴနူဂိတုဖေဖဝ်ဝါရဳ ၅ ဍုၚ်သေံ စထပိုတ်ကၠုၚ်လဝ် ကၠေၚ်စက် ကေုာံ ပၟတ်ဓာတ်လလဳတုဲဂှ် ပ္ဍဲဍုၚ်ယှိုဲကုက္ကိုဝ် က္တဵုဒှ်ဒၟံၚ် စဵုကဵုကၠေၚ်စက်ပိုတ်ကီုလေဝ် ကြပ်ပေၚ်ကၠုၚ်မွဲဂိတု ပ္ဍဲဂိတုဖေဖဝ်ဝါရဳ ၂၆ ဏံဂှ် ကလေၚ်ရာန်ကၠုၚ်ကၠေၚ်စက်တံဂွံမံၚ်ယျဂှ် ညးဒေသတံ သ္ဂးရ။
ပ္ဍဲကဵုဒၞါဲလုပ်တိတ် ပွိုၚ်ဍုၚ်ဘာအၚ်ဂှ် တာဒၞါကၟာတ်လဒဵုလဝ် ညးဍုၚ်ကွာန်တံ နူကဵုဖ္ဍိုက်ဏာနၚ်ကၠေၚ်စက်တံကီုလေဝ် ဒပ်မၚ်ပယျဵု BGF တံ ဖ္ဍိုက်ပ္တိုန်ကၠုၚ်ကၠေၚ်စက် ဗွဲမဂၠိုၚ်ဂၠေၚ်ဂှ်တှ်ေ လ္ပာ်ကံၚ်ဇြဳပၞာန် ရပ်ဒက်ကေတ်အရေဝ်တံ ဟွံမွဲပုဟ်ဂှ် ညးဒေသတံ သ္ဂးအိုတ်ရ။
ဒပ် BGF တံဝွံ လုပ်စိုပ်စၟဳတ်လဝ် ကမၠောန်နွံဒၟံၚ်ပ္ဍဲဍုၚ်ယှိုဲကုက္ကိုဝ် ဒၞါဲဒေသညးတံထိၚ်ဒက်လဝ်ဂှ် ရပ်ဂွံလဝ် ကောန်ဍုၚ်သ္အာၚ်ဂမၠိုၚ် ပါလုပ်သီုကဵုဂကူကောန်ဍုၚ်ကြုက် စိုပ်ဒၟံၚ်ဟွံဗဗွဲကဵုသၞောဝ် မဒးဒုၚ်သွံရာန်လဝ်မၞိဟ် မဒးဒုၚ်ပျဲပျာံဒၟံၚ်တံဂှ်တုဲ ကလေၚ်လှဲပြံၚ်ကဵုဒၟံၚ် ဇရေၚ်သၟိၚ်တၠအဝဵုသေံတံရ။
အတိုၚ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် ပ္ဍဲဂိတုဖေဖဝ်ဝါရဳ ၂၆ ဂှ်မ္ဂး ပ္ဍဲဍုၚ်ဗြဝတဳ ယှိုဲကုက္ကိုဝ်ဂှ်ကဵု ပ္ဍဲတိဍာ် KK Park တံဂှ် ရပ်ဂွံလဝ် ကောန်ဍုၚ်သ္အာၚ် ၁၆၈ တၠ မကၠတ်လုပ်စိုတ်ကၠုၚ်တံဂှ်တုဲ အပ္ဍဲပွိုၚ်ကြပ်မွဲဂိတုဂှ် စၟဳတ်ထ္မံက်ပ္တိတ်ဂွံလဝ် ကောန်ဍုၚ်သ္အာၚ် ၂၅၃၈ တၠတုဲ ကလေၚ်လှဲပြံၚ်ကဵုလဝ် ဇရေၚ်ဍုၚ်သေံ ၆၇၃ တၠရောၚ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ