မတ်မလီု၊ ဖေဖဝ်ဝါရဳ ၂၇
ပရေၚ်တဵုလွဳၜဲ မဒှ်သတ်ရာသဳမုဟ်ကျာ ပ္ဍဲတွဵုရးဍုၚ်မန်တံဝွံ ဟိုတ်နူရာသဳဥတုဖံက်ပၠန်တုဲ ဒမြိပ်ၜဲတိတ် စှ်ေကၠုၚ်ဒၟံၚ်တီတီဂှ် ညးမကၠောန်ၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ခံက်ၜဲတံဏံဝွံ ရာသဳဥတုဖံက်ပၠန် ဒၟါနူဒးလတိုပ်လမၠာၚ်တုဲ သတ်ပ္ကဴဍေံလီုအိုတ်တုဲ ဒမြိပ်ၜဲတိတ်လေဝ် စှ်ေအာတီတီရ။
ခံက်ၜဲတံဏံ ဟွံဂွံသတ်မွဲသာ် လီုအာသာ်ဏံဂှ်ကီု၊ ဒမြိပ်တိတ်ဍေံလေဝ် စှ်ေကၠုၚ် နူသၞာံတုဲကၠုၚ်တံဂှ်တုဲ ဂွံကလေၚ်ဂွံခရိတ်တဵုလွဳရဂှ် အခက်အခုဲနွံဒၟံၚ်ရောၚ် ညးတဵုလွဳၜဲဂမၠိုၚ် သ္ဂးအိုတ်ရ။
ညးမကၠောန်ၜဲမွဲတၠဂှ်တှ်ေ ဟိုတ်နူရာသဳဥတုဖံက်ပၠန်တုဲ ဒမြိပ်ၜဲတိတ်ဂှ် စှ်ေကၠုၚ် ၜိုတ် ၃၀ တၟံကၠံမာန်ရောၚ် ဟီုရ။
“သၞာံဏံ ၜဲတံဏံ လီုအာပြဟ်ဟ်ပြေဟ်ဟ်ရ။ ၜဲဂှ်တှ်ေ နသဘာဝဍေံမ္ဂး သတ်ဒၟံၚ်ပိတဲ။ သတ်ပထမ၊ သတ်လဒေါဝ်၊ သတ်လက္ကရဴ။ သၞာံဏံဂှ် အိုတ်အာ ၜိုတ်သတ်ပထမကဵု သတ်လဒေါဝ်ဂှ်သၟး။ သတ်လက္ကရဴဏံဂှ် မၞိဟ်ဂွံဟွံမွဲအှ်ေ။ တၞံၜဲတံဏံ ချိုတ်ပြဟ်တုဲတှ်ေလေဝ်။ ဒမြိပ်တိတ်ဍေံဂှ် စှ်ေအာ ၜိုတ် ၂၅ တၟံကၠံ ဟွံသေၚ်မ္ဂး ၜိုတ် ၃၀ တၟံကၠံဏောၚ်ဂှ် ထေၚ်ကေတ်ရ” သာ်ဝွံ ဟီုရ။
သ္အာၚ်နူဂှ်ပၠန် ပ္ဍဲရာသဳၜဲတိတ်ဏံဂှ် ၜိုန်ဂွံဒၟံၚ်ၚုဟ်အတိုၚ်သၞာံတုဲတေံကီုလေဝ် ၜဲတိတ်ဂၠိုၚ်ကၠုၚ်မ္ဂး ၚုဟ်ဍေံစှ်ေကၠုၚ်ဂှ် ညးမကၠောန်ၜဲဂမၠိုၚ် ဂွိၚ်ဒၟံၚ်အိုတ်ရ။
ညးကၠောန်ၜဲမွဲတၠပၠန်ဂှ်လေဝ် ဟိုတ်နူရာသဳဥတုတုဲ တၞံၜဲချိုတ်ဂၠိုၚ်တုဲ ၚုဟ်ခရိတ်ကၠောန်ပ္တိတ်ကီု ၚုဟ်ကပေါတ်တမ်တံကီုဂှ် အိုတ်လဝ်တၟာဂလိုၚ်တုဲ ကျဗြံမာန်ဂှ် ဟီုရ။
“တၞံၜဲတံဂှ်တှ်ေ အရိုဟ်တွဵုမ္ဂး ဟွံစှ်ေအာပုဟ်။ သၞာံဏံ စှ်ေအာပြဟ်ပြေဟ်။ ဒှ်အာအရံၚ်သာ်မိတ်အိုတ်။ မွဲတၞံတုဲမွဲတၞံ ချိုတ်ဒၟံၚ်။ ရံၚ်ပရေံကွေံကွေံ။ ချိုတ်ဂှ် ဟွံအောန်ပုဟ်။ သၞာံတုဲတေံဂှ်တှ်ေ ၚုဟ်ဂစတ်ဂဥုဲ၊ ၚုဟ်ဂဥုဲ၊ ၚုဟ်ဝါဲတံဂှ် အိုတ်သက်သာဒၟံၚ်ဏောၚ်။ သၞာံဏံဂှ် ပိုယ်တံ ဒးဂစတ်ကၠုၚ်ဒၟံၚ်ဂဥုဲ အဆက်က်ရ။ ကၠာတေံမ္ဂး မုမွဲမှ ဟွံဒးဂစတ်ပုဟ်။ အခက်အခုဲၜဲတိတ်တံကီု ၚုဟ်ကောန်ကမၠောန်တံဂှ်ကီုဂှ် ညးတဵုလွဳဂမၠိုၚ် ဒှ်ဒၟံၚ်ဒဒိုက်ရ” သာ်ဝွံ သ္ဂးရ။
ဂွံရတ်သီၜဲ လၟုဟ်ဂှ် ဒးလိၚ်စက်မ္ဂး ဟိုတ်နူအခက်ခုဲကၠေၚ်ဒဳဇြေဝ် ကၠေၚ်စက်တံဂှ်တုဲ လိၚ်ကေတ်ဗီုကၠာတေံဟွံဂွံတုဲ ဒၞါဲလိၚ်ကောန်ကလောန်စိုန်သ္ကီုတံဂှ်လေဝ် ကဵုကၠုၚ်ဒၟံၚ် မွဲတ္ၚဲ ၁၆၀၀၀ ဒ္ကေဝ် ဂၠိုၚ်နူကၠာတေံကီုလေဝ် ကော်ဟွံဂွံဒှ်ဒၟံၚ်ရောၚ် ညးဆက်ဟီုရ။
ဟိုတ်နူအခက်အခုဲသာ်ဏံတုဲ အပ္ဍဲတ္ၚဲမစၟတ်လဝ်ဂှ် ယဝ်ရတ်သီၜဲဟွံမာန်မ္ဂး အရာမဒးလီုလာ်ဆောံလေၚ်တံ ဂၠိုၚ်ကၠုၚ်မာန်တုဲ သီုကဵုဍာ်ဒကေဝ် ဂွံပလံၚ်ပ္တိုန်ဍုၚ်သ္အာၚ်တံဂှ်လေဝ် စှ်ေကၠုၚ်မာန်တုဲ ဒတုဲကၟဝ်ပရဲပရာဍေံဂှ်စွံလဝ်ကၠာ ခရိတ်တဵုလွဳရဂှ် ဖေက်ဟွံဂွံဂှ် ညးတဵုလွဳဂမၠိုၚ် ဒှ်ဒၟံၚ်ဓဝိၚ်အိုတ်ရောၚ် ဟီုရ။
ပ္ဍဲတွဵုရးဍုၚ်မန်ဏံဂှ်တှ်ေ တဵုလွဳဒၟံၚ်ၜဲဇၞော်၊ ၜဲသ္ၚေက်၊ ၜဲသဝ်ယျာ ကေုာံ ၜဲယှိုဲဝါတံ ဗွဲအဓိကတုဲ တိဨကတဵုလွဳဂှ်တှ်ေ မွဲကိုဋ်ထပှ်ဠက်ဨကပြၚ် နွံတုဲ ၜဲနာနာဂှ် လၟေၚ်သၞာံ တိတ်ဒၟံၚ် ပွဳပွူၜါဠက်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု− CJ