ဘာပန်၊ သေပ်တေမ်ဗာ (၃၀)
အပ္ဍဲတိဍာ်ထိၚ်ဒဝ် ဒပ်မဟာ(၅) ခရိုၚ်ဘာပန်၊ ဗော်သွးကောန်ဂကူကရေၚ် (KNU) ဂှ် တုဲကၠုၚ် နူဂိတုသေပ်တေမ်ဗာ (၂၆) စဵုကဵု (၂၈) အပ္ဍဲပွိုၚ် (၃) တ္ၚဲဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ပေါဲဗ္တိုက်ၜါလ္ပာ် ဟွံအောန်နူကဵု (၆) ဝါရောၚ် ဒပ်မဟာ (၅) KNU လလောၚ်ပ္တိတ်လဝ်ရ။
တုဲကၠုၚ် ဂိတုသေပ်တေမ်ဗာ (၂၆) တေံ ဒပ်ပံၚ်ကောံ KNLA တံ ကၠတ်ဗ္တိုက်လဝ် ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အကြာကွာန် ကလာလဝ်ကလိုဝ် ကေုာံ ကွာန်ဖဝ်ထဳယဲ သ္ကုတ်ဂၠံၚ်ဘာပန်−ကမမံၚ်ဂှ်ကဵု ဒေသကျာ်ခေဝ်ထာ ကဝ်ထေဝ် ခရိုၚ်ဘာပန် ၜါလ္တုန်တုဲ အပ္ဍဲပွဗ္တိုက်ဂှ်ဂှ် လ္ပာ်ကံၚ်ဇြဳပၞာန် (၅) တၠ ချိုတ်တုဲ (၃) တၠ ဂွံလဝ်ဝပ်ရ။
သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ (၂၇) ဂှ်လေဝ် အပ္ဍဲပွိုၚ်ဍုၚ်လူတဝ် ခရိုၚ်ဘာပန်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ပေါဲဗ္တိုက် ၜါဝါတုဲ အပ္ဍဲပေါဲဗ္တိုက်ဂှ်ဂှ် လ္ပာ်ဒပ်ကံၚ်ဇြဳပၞာန် (၁) တၠ ချိုတ်အာလဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၂၈) တေံလေဝ် ဒပ်မဟာ (၅) KNLA လုပ်စိုပ်ကၠတ်ဗ္တိုက် ဗ္ဒိုပ်ခဝ်ပုက် (ခေါပုတ်) မၞုံအပ္ဍဲပွိုၚ်ဍုၚ်ဗူတဝ်ဂှ်တုဲ အပ္ဍဲပရေၚ်ဗ္တိုက်ဂှ် ကောန်ဒပ်ကံၚ်ဇြဳပၞာန် (၂) တၠ ထပ်ချိုတ်အာလဝ်ပၠန်ရ။
ပ္ဍဲပေါဲဗ္တိုက် အပ္ဍဲပွိုၚ်ပိတ္ၚဲ နူခရိုၚ်ဘာပန်ဂှ် ကောန်ဒပ်ကံၚ်ဇြဳပၞာန် (၈) တၠ ချိုတ်အာလဝ်တုဲ လ္ပာ်ဒပ်မဟာ (၅) KNLA ပွမဇီုကပိုက်ဒး မွဲမွဲသာ် ဟွံမွဲပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
မွဲအဆက်ဓဝ် ကောန်ဒပ် နူစၟတ်တမ်ဒပ် ဒပ်မၚ်ပယျဵု BGF (၁၀၁၄) သၟဝ်တဲကံၚ်ဇြဳပၞာန်တံ ဒဒှ်ရဟွံကဵုအခေါၚ် ညးဍုၚ်ကွာန်ဒေသတံ အာကၠုၚ် ကုဂၠံၚ်ဍာ်၊ ဂၠံၚ်တိုက် သီုၜါလ္ပာ် အကြာဘာပန်−ကတိုၚ်တိ မၞုံသ္ကုတ်ဂၠံၚ် ကမမံၚ်−ဘာပန်ဂှ် ပ္တိတ်လဝ်အမိၚ်တုဲ ယဝ်ရဆဵုဒးမၞိဟ်အာကၠုၚ်တံဂှ်မ္ဂး ကွဳစက်ကာ၊ ကွဳလိုန်ဓာတ် ကေုာံ ဂၠုၚ်စက်တံဂှ် ရပ်ပလီုပလာ်ထောံရောၚ် ဘပဠလဝ်ရ။
အပ္ဍဲခရိုၚ်ဘာပန်ဂှ် ကောန်ဒပ်မၚ်ပယျဵု BGF ကေုာံ ဒပ်ကံၚ်ဇြဳပၞာန်တံ အရိုဟ်ဒဒှ်တ္ၚဲ ကလိလောန်ဒၟံၚ် ပွမဝးပ္ကဝ်အခေါၚ်အရာမၞိဟ်တံဂှ်ရ လ္ပာ် KNLA နဒဒှ်စဵုဒၞါညးဍုၚ်ကွာန်ဒေသတံတုဲ ဒးက္တဵုဒှ်ဒၟံၚ် ပေါဲဗ္တိုက် ကဵုကံၚ်ဇြဳပၞာန်ရောၚ် ဒဒှ်ရသၞာဲဒဴမဆေၚ်စပ်ကဵု လ္ပာ်ပၞာန်အပ္ဍဲဒေသမွဲတၠ ဟီုဂးလဝ်ဂှ် ဒပ်မဟာ (၅) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)