လ္ဂုၚ်၊ သေပ်တေမ်ဗာ (၃၀)
သွက်ရုပ်ဒမျိုၚ်၊ သွက်ဇာတ် အပ္ဍဲဍုၚ်၊ မ္ၚးဍုၚ် မဗလးပ္တိတ်ဒၟံၚ် ပ္ဍဲလာၚ်ဗလးရုပ်ရမျာၚ်တံဂှ် ဒးကေတ်အခေါၚ်စၟဳစၟတ်ဒါန်ထပိုတ် (သေန်သာ) ဗဳဒဳယောတံရောၚ် ဒုဝန်ဇၞော် ဥူယျေဝ်တေအ် နူဌာနဝန်ဇၞော် လလောၚ်ပရိုၚ် ကံၚ်ဇြဳပၞာန် ဟီုဂးလဝ်ကဵု ကမ္ပဏဳရုပ်ရမျာၚ်တံရ။
ပ္ဍဲအခိၚ်ဆဵုဂဗပ္ညဳပ္ညပ် ကိစ္စသေန်သာ ကုညးတာလျိုၚ် ကမ္ပဏဳဗလးရုပ်ရမျာၚ် မကၠောန်ဗဒှ်လဝ် ပ္ဍဲဂိတုသေပ်တေမ်ဗာ (၂၇) တုဲကၠုၚ်တေံဂှ် လ္ပာ်ကံၚ်ဇြဳပၞာန် ဟီုဂးလဝ် ဗီုဏံရ။
ဒုဝန်ဇၞော် ကံၚ်ဇြဳပၞာန် ဥူယျေဝ်တေအ်ဂှ် သတ်ဇာတ် ကေုာံ အရေဝ်ဟီု မပါလုပ်ဒၟံၚ် ပ္ဍဲဇာတ်တံဂှ်ဝွံ ရံၚ်ကဵုအကာဲရာလၟုဟ်မ္ဂး အရာဟွံဂပ်ဝ်ကဵုထ္ၜးတံ ပါလုပ်ဒၟံၚ်တုဲ ဒးပ္တိုန်အခေါၚ်သေန်သာရောၚ်ဂှ် ဟီုရ။
ပွမကၠောန်သ္ပကၠုၚ် လာၚ်စက်ဗလးရုပ်ရမျာၚ်တံ သာ်ဏံဂှ်ဝွံ မိက်ဂွံထ္ၜးအဝဵုအာဏာတုဲ ကၠောန်လဝ်ရောၚ်ဂှ် တၠကမၠောန်အနုသုခုမ ဝှ်ကြံၚ်မွဲတၠ သ္ဂးရ။
အခိၚ်လၟုဟ်ဂှ် မၞိဟ်ဗဵုဇာတ်ဗၟာတံ အောန်ဒၟံၚ်တုဲ သီုကဵုစိုတ်ဟွံလုပ်စကၠုၚ်ဂှ်ရ ကုဇာတ်ဗဳဒဳယောဍုၚ်မ္ၚး စုတ်လဝ်မလိက်တံဂှ် ကဵုပ္တိုန်သေန်သာ ဇရေၚ်ဍေံတံဂှ်ဝွံ ကံၚ်ဇြဳပၞာန် ထ္ၜးအဝဵုအာဏာရောၚ်တုဲ ပြဝဍေံတံဝွံ ၜိုန်ရဒှ်ဒၟံၚ် သ္ဇက်ဒးဂရိုၚ်ကီုလေဝ် ဒှ်ဒၟံၚ်ဗီုပြၚ် ဟွံသ္ပဂရုကဵု မၞိဟ်လဵုမွဲပုဟ်ဂှ် ညးဟီုရ။
ဗွဲကြဴဒပ်ပၞာန်သီအဝဵု ကၟိန်ဍုၚ်ဗၟာတုဲဂှ် ပြဝကံၚ်ဇြဳပၞာန်တံဝွံ ကၠောန်သ္ပဒၟံၚ်ပြဝ ဒဒှ်မကလေၚ်အာဒၟံၚ် ခေတ်(မဆလ) တေံရောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်မွဲတၠလေဝ် သ္ဂးရ။
ကၠာတေံ သတ်ဇာတ် အပ္ဍဲဍုၚ်၊ မ္ၚးဍုၚ်တံကဵု သတ်ဇာတ်ဍုၚ်သ္အာၚ်တံဂှ် ထပ်ကလေၚ်ထ္ၜး နရမျာၚ်ဟီုအရေဝ်ဗၟာတုဲ ဟွံပ္တိုန်ကဵု ဂကောံသေန်သာတံမွဲသာ် ထ္ၜးပျးကၠုၚ်ဒၟံၚ် ညးသ္ကအ်အိုတ်ရ။
ကြဴနူကံၚ်ဇြဳပၞာန်သီအဝဵုတုဲဂှ် ကၠောန်သ္ပပ္ဍဵုပ္ဍိုက်ကၠုၚ် ကုကဏ္ဍနာနာတံတုဲ ဒးဒုၚ်ကၟာတ်သီအခေါၚ်တြးပ္တိတ်လိက်ပတ်တံ၊ ဒးဒုၚ်ကၟာတ်လာၚ်ဇြေန် ပရိုၚ်မဳဒဳယျာတံ ကေုာံ ပတေၚ်ဓရတ်လဝ် သေန်သာတံဂှ် ကၠောန်ဒၟံၚ်အဆက်က်ရ။
ပရိုၚ်−သြၚ်လောန်တိုၚ်(မ်)