ကျာ်ပိ၊ မာတ် ၉
ကြဴနူ DKBA လလောၚ်ပ္တိတ်လဝ်အမိၚ် ကောန်ဍုၚ်ကြုက်ပ္ဍဲဍုၚ်ကျာ်ပိ တွဵုရးကရေၚ် ပယျဵုသေံ−ဗၟာတံ သွက်ဂွံတိတ်စ္ဍးအာတုဲဂှ် ကောန်ဍုၚ်ကြုက်ဂမၠိုၚ်ဝွံ ပြံၚ်ဆုဲတိတ်အာ လ္ပာ်မ္ၚးဍုၚ်တုဲ လ္ၚဵုတံဂှ်လေဝ် ဆက်နွံဒၟံၚ် ပ္ဍဲကဵုဍုၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် မထိၚ်ဒက်လဝ် ဍုၚ်ကျာ်ပိဂှ် ဂိတုဖေဖဝ်ဝါရဳ စၟတ်တ္ၚဲ ၂၈ စွံလက္ကရဴအိုတ်တုဲ ဂကူကြုက်တံ သွက်ဂွံတိတ်အာနူဍုၚ်ဂှ် ပ္ဍဲဂိတုဖေဖဝ်ဝါရဳ ၉ တုဲကၠုၚ်တေံ ထ္ပက်စၟတ်တ္ၚဲ လလောၚ်ပ္တိတ်လဝ်အမိၚ်ရ။
ကြဴနူဂှ်တုဲ ကောန်ဍုၚ်ကြုက်ဂမၠိုၚ်ဝွံ အာကၠုၚ်ဒၟံၚ် ဗီုကၠာတေံ ဟွံမွဲရတုဲ ဆုဲပြံၚ်အာလဝ် လ္ပာ်ဍာ်လဂေါဝ် (ချောၚ်းဆုံသဘာဝ) နူကဵုသ္ကိုပ်ဗိုလ်ဇၞော်သဝ်အေဝါန် မဒှ်သ္ကိုပ်နဲဗျူဟာ စၟတ် ၂ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် မပိုၚ်ပြဳလဝ်ဂှ်ကဵု လ္ပာ်ကၠအ်ထၜိုတ် နွံမ္ၚးဍုၚ်တံဂှ်ရ။
အတိုၚ်ဂလာန် ညးဒေသတံဂှ်မ္ဂး ပ္ဍဲကဵုကၠအ်ထၜိုတ် သမၠဲဍေံမၞုံမွဲဨကပြၚ် နွံဗ္ဒါဲကွာန်စောဝ်ဇမၠု နူကဵုဍုၚ်ကျာ်ပိ ခြာဒၟံၚ်ဗၞတ် ၄ မိုၚ်ဂှ်လေဝ် သွက်ကောန်ဍုၚ်ကြုက်တံ ဂွံမံၚ်ဂးတုဲ သိုၚ်ခၞံပ္တိုန်စမြိုၚ်တၟိတၟိ ဗွဲမဂၠိုၚ်တုဲ ဂွံရပ်စပ်အေန်တာနိတ်ဂွံဂှ် လ္တူကၟဳစိၚ်တံလေဝ် စုတ်လဝ်စက် Starlink Mini ဗွဲမဂၠိုၚ်ဂၠေၚ်ရ။
လအာတုပ်သာ်ဂှ်ကီု ဍာ်လဂေါဝ် (ချောၚ်းဆုံသဘာဝ) သမၠဲဍေံမၞုံဗၞတ် ၄၀ ဨက နွံလ္တူဂၠံၚ်ကွဳစက် ကျာ်ပိ−လှာဒကှ် ခြာကဵုဍုၚ်ကျာ်ပိ ဗၞတ် ၁၀ မိုၚ်ဂှ် သ္ကိုပ်ဗိုလ်ဇၞော်သဝ်အေဝါန် ချုက်လဝ်လိက်ကသုက် လိၚ်ကဵုလဝ်ကောန်ဍုၚ်ကြုက်တံ ပွိုၚ်ပိသၞာံရောၚ် သ္ဂးရ။
ကၠာတေံ ပ္ဍဲကဵုဍာ်လဂေါဝ်(ချောၚ်းဆုံသဘာဝ) ဏံဂှ် ကၟုဲအာတရဴတံ ကၠုၚ်စိုပ်ဂေတ်ဝေၚ် နွံဒၟံၚ်တုဲ အခိၚ်လၟုဟ် ပပ္တံနူကဵုဂိတုဖေဖဝ်ဝါရဳ သတ္တာဟတတိယဂှ်တုဲ ကၟာတ်လဒဵုလဝ် အခေါၚ်ကၟုဲထဳဂမၠိုၚ်ကၠုၚ်စိုပ်ဂေတ်ဝေၚ်ဂှ်တုဲ ထပ်သိုၚ်ခၞံဒၟံၚ် စမြိုၚ်တၟိတံဂှ်တုဲ ပ္ဍဲကဵုပါၚ်ဂၠံၚ်လုပ်ဍာ်လဂေါဝ်ဂှ်လေဝ် ကောန်ပၞာန် DKBA တံ ကေတ်ကဵုလဝ်ဂီုကၠီုရောၚ် ဂွံတီကေတ်ရ။
မွဲလ္ပာ်ဂှ်ပၠန် သ္ကိုပ်ဗိုလ်ဇၞော်သဝ်အေဝါန်ဂှ် ကောန်ဍုၚ်ကြုက်တံ သ္ဂောံတိတ်အာနူအပ္ဍဲဍုၚ်ဂှ် ပ္တိတ်လဝ်အမိၚ်ကီုလေဝ် လ္တူဍုၚ်ကျာ်ပိ ပ္ဍဲသ္ၚိလ္ၚဵုတံဂှ်တှ်ေ ကောန်ဂကူကြုက်တံ ကၟာတ်တြၚ်သ္ၚိတုဲ ဆက်မံၚ်ဒၟံၚ်နွံဂှ် ညးဒေသတံ ဟီုရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၆ တေံဂှ်လေဝ် ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် လှဲပြံၚ်ကဵုလဝ် ကောန်ကလောန်နူကဵုဂိုန်ကျာဖျ နူရုၚ်ကာသဳနဝ် MS 349922 မကၠောန်ဒၟံၚ်ကမၠောန်ကျာဖျ ၈၆ တၠ လ္ပာ်ဍုၚ်ယှိုဲကုက္ကိုဝ်ဂှ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ