ကအ်သံၚ်၊ မာတ် ၉
ရးတၞၚ်သဳ ပ္ဍဲပွိုၚ်ဍုၚ်ကအ်သံၚ်ဂှ် သၟတ်ဒးဒုၚ်ပကောံပလဝ်ကောန်ပၞာန် နူကဵုကံၚ်ဇြဳပၞာန်တံ ၜါတၠ ဂြိပ်တိတ်ဗၠးကၠုၚ်တုဲ လုပ်စိုပ်စ္ၜုဲစ္ၜော်ကၠုၚ် လ္ပာ်ဒပ်စဵုဒၞါညးဍုၚ်ကွာန်တံဂှ် ဂွံတီကေတ် ဇရေၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဗိက်ရ။
သၟတ်ဒးဒုၚ်ပကောံပလဝ်ကောန်ပၞာန် ကုကံၚ်ဇြဳပၞာန်တံဂှ်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ ၃ အခိၚ်ဗ္တံဂှ် ဂြိပ်တိတ်ကၠုၚ်လဝ်တုဲ ပ္ဍဲကဵုဏံ သၟတ်တြုံၜါတၠဝွံ ပ္ဍဲဂိတုမာတ် ၆ တေံ လုပ်စိုပ်စ္ၜုဲစ္ၜော်ကၠုၚ် လ္ပာ်ဂကောံဒပ်စဵုဒၞါညးဍုၚ်ကွာန်တံရ။
သၟတ်ဍုၚ်ဗၟာၜါတၠ ဒးလဝ်အချုက် ပ္ဍဲဍုၚ်သေံ ဍုၚ်ရနံၚ်တုဲ မဒးဒုၚ်ပလံၚ်ဖျဴနၚ် လ္ပာ်ဍုၚ်ကအ်သံၚ် ဍုၚ်ဗၟာဂှ် ကောန်ဒပ်ကံၚ်ဇြဳပၞာန်တံ ရပ်ဒက်လဝ် သွက်တန်ဗ္တောန်ကွတ်ပၞာန် လၟေၚ် ၉ တုဲ ပလံၚ်ဗစိုပ်လဝ် ဇရေၚ်ဗ္ဒိုပ်ဒပ် ခလရ ၄၃၁ ပွိုၚ်ဍုၚ်ကအ်သံၚ်ရ။
ကြဴနူဂှ်တုဲ ပ္ဍဲဗ္ဒိုပ်ဒပ် ခလရ ၄၃၁ ပွိုၚ်ဍုၚ်ကအ်သံၚ်ဂှ် ဒးမံၚ်လဝ်ပွိုၚ်မွဲသတ္တာဟပြၚ်တုဲ နူဏံမွဲကဆံၚ် ထပ်ပလံၚ်ဏာလဝ် ဍုၚ်ဗိက် နကဵုဂၠုၚ်စက်တုဲ ပြံၚ်ဆုဲဏာလဝ် ဇရေၚ်ဘာပရေၚ်ပညာယှိုဲဒူရ။
စိုပ်ဂွံ ဘာပရေၚ်ပညာယှိုဲဒူတုဲ ဂွံၜိုတ်ၜါတ္ၚဲ တုဲကၠုၚ်ပ္ဍဲဂိတုဖေဖဝ်ဝါရဳ ၃ အခိၚ်ဗ္တံ ၜိုတ် ၁ နာဍဳဂှ် ဂြိပ်ဗၠးကၠုၚ်လဝ်ရောၚ် သ္ဂးရ။
အခိၚ်စဂြိပ်တိတ်ကၠုၚ်ဂှ် လၟိဟ်အပံၚ် ၁၆ တၠ နွံတုဲ တ္ၚဲယးဂတဂှ် ရပ်ဂွံ ၄ တၠ၊ ၁၂ တၠ ဗၠးကၠုၚ်တုဲ ပ္ဍဲကဵုဏံ ကိုဝ်တနာၚ်ထိုဲကဵု ကိုဝ်နာၚ်ဝေန်ထောန်တံၜါတၠ လုပ်စိုပ်စ္ၜုဲစ္ၜော်ကၠုၚ် ဇရေၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်ဗိက်ရ။
တုဲကၠုၚ်ပ္ဍဲဂိတုဖေဖဝ်ဝါရဳတေံဂှ်လေဝ် သ္ကိုပ်ဗိုလ်ကံၚ်ဇြဳပၞာန်မွဲတၠ မပါလုပ် ကောန်ဒပ်ကံၚ်ဇြဳပၞာန် ကေုာံ ဗၠာဲသၟိၚ် ၆၄ တၠ လုပ်စိုပ်ကၠုၚ်လ္ပာ်ညးဍုၚ်ကွာန်တံဂှ် ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ပကဖဗိက်