ကရာချဳ၊ သေပ်တေမ်ဗာ (၃၀)
ပ္ဍဲဍုၚ်ကရာချဳ ဍုၚ်သၞေဟ် သ္ကုတ်သၠုၚ်ကျာပါကေဿတာန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၈) ဂှ် ဟိုတ်နူပရေၚ်ပန်ပှော် သၟာသေနာတ် မပပၞမၞိဟ်ယဲ ဆေၚ်စပ်ကဵုၚက်ဂှ်တုဲ ကောန်ဍုၚ်ပါကေဿတာန် ဂကူကြုက်မွဲတၠ ချိုတ်အာလဝ်တုဲ သၟာသေနာတ်ဝွံ ဂြိပ်တိတ်အာလဝ် နူကဵုဒၞါဲဒှ်ပရောဂှ်ရောၚ် ဒပ်ဗၠာဲသၟိၚ်တံ ဟီုရ။
ပ္ဍဲပရေၚ်ဗ္တိုက် မက္တဵုဒှ်လဝ် ပ္ဍဲအရာပ်သာဒါ လ္တူဍုၚ်ဂှ် ဆောဖွက်ဂကူကြုက်မွဲတောဲ မစိုပ်ဒၟံၚ် အပ္ဍဲဗ္ဒမ်ဂဥုဲ ဒဒှ်ရကလိဂွံအာလဝ် ဘဲဝပ်ဇီုကပိုက်ဂှ် ဒပ်ဗၠာဲသၟိၚ်တံ ဟီုဂးလဝ်ရ။
သ္ကိုပ်သၞာဲဒဴဗၠာဲသၟိၚ် ကရာချဳဂှ် “အတိုၚ်မဂၠိုက်ဂၠါဲစၟဳစၟတ်ဂွံ ကိုပ်ကၠာဏံဂှ်မ္ဂး ပါ်တၞဟ်ခြာ ကုဗ္ဒမ်ဂဥုဲဏံတုဲ စွံလဝ်ပွန်ရ” သာ်ဝွံ ဟီုဂးလဝ်တုဲ ပရူပရာဂဗုတ်ဏံဝွံ ဒှ်လၟေၚ်ဒဒှ် စွံပွန်ဂစိုတ်ရောၚ်ဂှ်လေဝ် သ္ၚဳဂၠိပ်လဝ်ရ။
ပ္ဍဲပရေၚ်ဗ္တိုက်ဏံဂှ် သၟာသေနာတ်မွဲတၠဟေၚ် ပါလုပ်လဝ်တုဲ ညးတာလျိုၚ်တံ ဒဒှ်ရကၠောန်သ္ပ ဂၠိုက်ဂၠါဲစၟဳစၟတ်ဒၟံၚ်ဂှ်လေဝ် ဟီုဂးလဝ်ရ။
နကဵုတၚ်ရန်တၟံသာ်လဵုတုဲ ကၠောန်သ္ပလဝ် ပွဗ္တိုက်ဏံဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီကီုလေဝ် ကၠာတေံ ဒပ်ပၞာန်ဗၠးၜး Baluch ဝါဒဳပရေၚ်ပါ်တိတ်တံ ပ္ဍဲကဵုဍုၚ်ဇၞော်ဂှ် ကေုာံ ဒၞါဲတၞဟ်ဟ် မၞုံပ္ဍဲပါကေဿတာန်တံဂှ် ကေၚ်ကၠောန်သ္ပဗ္တိုက်ကၠုၚ် ဂကူကြုက်တံ မၞုံကၠုၚ်လဝ်ရ။
ပ္ဍဲပါကေဿတာန်ဂှ် ဂကူကြုက် ဂၠိုၚ်ကဵုလ္ၚီ တန်တဴကၠောန်စဒၟံၚ်ကမၠောန်အိုတ်တုဲ ဗွဲမဂၠိုၚ်ဂှ် ပ္ဍဲကဵုကိုန်အစဳဇန် စမြိုၚ်သ္ဇိုၚ် ဗေကျေန် မၞုံကဵုၚုဟ်မး ဂၠိုၚ်ကဵုဗဳလျာန်ဒဝ်ဠာတံဂှ်လေဝ် ကၠောန်ၜိုတ်ဒၟံၚ်အိုတ်ရ။
ဗေကျေန်ဝွံ ဟွံကဵုညးဒေသတံမွဲသာ် ရပ်စပ်စကာဒၟံၚ် သယံဇာတဒေသတံရောၚ် ပတှ်ေစှ်ေစိုတ်တုဲ ဗော်ပရေၚ်ပါ်တိတ် BLA ဝွံ ဒစဵုဒစးကၠုၚ်ဒၟံၚ် ပရေၚ်ဓလိုက်တမ်ရိုဟ်ကြုက် အပ္ဍဲကၟိန်ဍုၚ်ဂှ် မဒှ်ရ။
အပ္ဍဲဂိတုဨပရဴဂှ် အပ္ဍဲအရှာံဘာတက္ကသိုလ်ကရာချဳဂှ် ကွဳစက်ဝှေန်မွဲဖ္ဍိုက် ဗ္တိုဟ်အာလဝ်တုဲ ကောန်ဍုၚ်ကြုက်ပိတၠ ကဵု ညးဒဳကွဳစက်ပါကေဿတာန်မွဲတၠ ဒးချိုတ်အာလဝ်ရ၊ သွက်ဂွံဗ္တိုက် ဂကူကြုက်တံဂှ် သုၚ်စောဲကၠုၚ် ညးဗြဴသၟာဒုၚ်ချိုတ် ဖံက်ထ္ကးဗုမ်တံတုဲ လက္ကရဴဏံ ညံၚ်ဂွိုအ်ကၠောန်သ္ပသာ်ဏံဂှ် စၞောန်ပ္ညုၚ်လဝ်ရောၚ် BLA ဟီုဂးလဝ်ရ။
ကၟိန်ဍုၚ်ကြုက်ဂှ် ဟီုဗျိဗ္ဒေက်ဖျဝ်လဝ် ပရေၚ်ဗ္တိုက်ဏံတုဲ သွက်ဂွံသၠုၚ်ပ္တိုန်ကဵု ပရေၚ်ဂီုကၠီု သွက်ကောန်ဍုၚ်ပါကေဿတာန် ဂကူကြုက်တံဂှ် အာတ်မိက်လဝ်ရ။
ဝန်ဇၞော်ကာအပ္ဍဲဍုၚ် ပါကေဿတာန်ဂှ်လေဝ် ဟီုဗျိလဝ် စပ်ကဵုပရေၚ်ပန်ပှော်ဏံဂှ်တုဲ “လၟေၚ်ဒဒှ် သာ်ဏံဝွံ သ္ဇက်ဂွံအေၚ်ဒုၚ်မာန်ဟွံမွဲ” ရဴဝွံ လလောၚ်တြးလဝ်တုဲ သွက်ဂွံရပ်ဒက် မၞီဟ်မဗ္တိုက်တံ ဗွဲမပြဟ်မာန်ဂှ်လေဝ် ကဵုလဝ်အမိၚ် ကုဒပ်ဗၠာဲသၟိၚ်တံဂှ် ဂွံတီကေတ်ရ။
Ref: CNA