လိုၚ်ဗၠဲ၊ မာတ် ၉
ပပ္တံနူဂိတုမာတ် သတ္တာဟဒုတိယတုဲ အကြာဒပ်ပံၚ်ကောံပၠန်ဂတး KNLA ကဵု ဒပ်ကံၚ်ဇြဳပၞာန်တံ က္တဵုဒှ်လဝ်ပေါဲဗ္တိုက် ပ္ဍဲကဵုတွဵုရးကရေၚ် ပွိုၚ်ဍုၚ်လိုၚ်ဗၠဲ မွဲဒမြိပ်ကွာန်ကလေဖိုဝ်ကလိုဝ် ပယျဵုသေံ−ဗၟာဂှ် ဂွံတီကေတ် ဇရေၚ်တမ်ရိုဟ်ပရိုၚ်ပယျဵုတံရ။
ပပ္တံနူကၞောတ်ဂိတုဖေဖဝ်ဝါရဳတုဲကၠုၚ်တေံဂှ်တုဲ ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA တံ စဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်ဒပ်ပူလူတူ နွံပ္ဍဲကွာန်ကလေဖိုဝ်ကလိုဝ်ဂှ်တုဲ ပေါဲဗ္တိုက်ၜါလ္ပာ်ဝွံ ဆက်သ္ကာတ်မြဟ်ဒၟံၚ် ဒဵုကဵုဂိတုမာတ် ၈ တေံရ။
ဒပ်ပံၚ်ကောံပၠန်ဂတး KNLA ဝွံ ထောံလဝ်မခတိုဟ်ဗ္တိုက်လဝ် လ္တူဒပ်ကံၚ်ဇြဳပၞာန်တံ နကဵုဒရုၚ်တုဲ ဒပ်ကံၚ်ဇြဳပၞာန်လေဝ် ကၠုၚ်စိုပ်ပန်ပှော်လဝ် နကဵုပၞာန်ကျာတုဲ ဟိုတ်နူပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ဂှ်ရ ဒပ်ပၞာန်သေံတံ ကေတ်ဒၞါဲမၚ်ရံၚ်ဒၟံၚ်ပယျဵုတုဲ ဂလိုၚ်ပ္တိုန်လဝ်ဂီုကၠီုရောၚ် သ္ဂးရ။
ဟိုတ်နူပရေၚ်ပၞာန် က္တဵုဒှ်လဝ်ဗွဲမသ္ကာတ်မြဟ် ပ္ဍဲကဵုပွဳပွူ ဗ္ဒါဲကွာန်ကလေဖိုဝ်ကလိုဝ် ပယျဵုသေံ−ဗၟာ ပွိုၚ်ဍုၚ်လိုၚ်ဗၠဲဂှ်တုဲ ညးဍုၚ်ကွာန်ဒေသၜိုတ် ၅၀၀ နူကဵုကွာန်ကလေဖိုဝ်ကလိုဝ် မပါလုပ် ဟွံအောန်နူပိကွာန်ဂှ်ဝွံ ဒးဂြိပ်ဒဴပါဲဒလေတ်ဒၟံၚ် လ္ပာ်ဍုၚ်သေံ ခရိုၚ်တက် ပွိုၚ်ဍုၚ်ထာတ်သံက်ယာန်ရ။
ညးဍုၚ်ကွာန်ပါဲဘဲပၞာန် မ္ဒးဂြိပ်ဒဴပါဲဒလေတ်ကၠုၚ် ၜိုတ် ၅၀၀ ဂှ် ဒပ်ဂီုကၠီုသေံတံ မၚ်မွဲကဵုလဝ်တုဲ ရေၚ်တၠုၚ်ပအပ်ကဵုလဝ် အရီုဗၚ်ပရေၚ်ဗ္စာရဏာမၞိဟ်တံရောၚ် သၞာဲဒဴဒပ်ပၞာန်သေံမွဲတၠ ဟီုပ္တိတ်လဝ်ရ။
ပ္ဍဲတိဍာ်ဒပ်မဟာ ၇ ဂှ် တုဲကၠုၚ်သၞာံ ၂၀၂၄ နူဂိတုနဝ်ဝေမ်ဗာတေံရ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA KNDO တံဂှ် ပရေၚ်ပၞာန်ၜါလ္ပာ်ကြံၚ်မ္ၚိုဟ်လဝ်တုဲ KNU ကလေၚ်သီဂွံလဝ် ဌာန်ဂအုပ်ဗဟဵုတြေံ မာနေဝ်ပဠဝ်ဂှ်တုဲ ဒပ်ကံၚ်ဇြဳပၞာန်လေဝ် ကၠုၚ်စိုပ်ထောံလဝ်မခတိုဟ် ကုဌာန်ဂအုပ်ဗဟဵု KNU အပ္ဍဲတိဍာ်ဒပ်မဟာ ၇ နွံရ။
ဟိုတ်နူပရေၚ်ဒပ်ကံၚ်ဇြဳပၞာန် ထောံကၠုၚ်မခတိုဟ် ပ္ဍဲဌာန်ဂအုပ်ဗဟဵု KNU ဂှ်တုဲ ကောန်အရာပ်လ္ၚဵု ဇီုကပိုက်ကလိဂွံအာဝပ်တံ နွံတုဲ ပ္ဍဲသၞာံ ၂၀၂၅ မံက်တေံဂှ် ဒပ်ပံၚ်ကောံ KNLA တံ ကြတ်ဗ္တိုက်လဝ် ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲတိဍာ်ဒပ်မဟာ ၇ ဂှ်တုဲ ဒပ်ကံၚ်ဇြဳပၞာန် ဒးဂိအာလဝ်ရ။
ဟိုတ်နူအကာဲအရာပရေၚ်ပၞာန် မက္တဵုဒှ်ဒၟံၚ်ပြဟ်ဟ်ဏံ ပ္ဍဲကဵုပယျဵုသေံ ပွိုၚ်ဍုၚ်လိုၚ်ဗၠဲဂှ်တုဲ ညးဍုၚ်ကွာန်ပါဲဘဲပၞာန်ဂမၠိုၚ်ဝွံ စဴဌာန်ဒၟံၚ်ဟွံမာန်ဏီတုဲ ဒပ်ကံၚ်ဇြဳပၞာန် ဟိုတ်နူကၠုၚ်စိုပ်ထောံဏာလဝ်မခတိုဟ်ဂှ်ရ ညးဒေသဂမၠိုၚ်ဝွံ ဖေက်လကိုတ်တုဲ ဒးအောပ်မာမံၚ်ဒၟံၚ် ပ္ဍဲကတိုၚ်ပါဲဗုမ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU