တၞၚ်သဳ၊ မာတ် ၂၃
ရးတၞၚ်သဳ ပွိုၚ်ဍုၚ်တၞၚ်သဳ ပ္ဍဲကဵုကွာန်ချံၚ်လမုဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်ကဵုလွဟ်ဇၞော်တုဲ ညးဍုၚ်ကွာန်ပါဲဘဲပၞာန်ၜါတၠ ချိုတ်တုဲ ပိတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ပကဖ ခရိုၚ်ဗိက်ရ။
နူဏေံတေံ ပ္ဍဲဂိတုမာတ် ၂၁ အခိၚ်လဒေါဝ်တ္ၚဲ ၜိုတ် ၂ နာဍဳဂှ် ဒပ်ကံၚ်ဇြဳပၞာန် ပန်နၚ်လဝ်လွဟ်ဇၞော် လ္ပာ်ကွာန်ချံၚ်လမု ဟွံအောန်နူပိမရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်တုဲ (ကိုသောင်းပု) ကဵု (မမီးမဲ့) မဒှ်ညးဍုၚ်ကွာန်ပါဲဘဲပၞာန် မစဴကၠုၚ်ကေတ်ဇွောံမ ပ္ဍဲကွာန်ဂှ် ဒးဇီုကပိုက်ချိုတ်အာတုဲ မၞိဟ်တြုံပိတၠ ဇီုကပိုက်ကလိဂွံလဝ်ဝပ်ရ။
ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲကီုလေဝ် ဗ္တိုက်ကၠုၚ်ဒၟံၚ်ကဵုလွဟ်ဇၞော်၊ ကဵုဒရုၚ်တံ ဂၠိုၚ်ကၠုၚ်တုဲ နကဵုညးဍုၚ်ကွာန်ဂမၠိုၚ် သွက်ဂွံစွံသတိဗွဲတၟေၚ်အိုတ်ဂှ် ညးဒုၚ်တာလျိုၚ် ဂကောံစဵုဒၞါညးဍုၚ်ကွာန် ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဂကောံကွာန်(သိန်းခွန်) ဗ္ဒါဲကွာန်(သိန်းခွန်၊ ချောင်းလမု) တံဂှ် ပေါဲဗ္တိုက်ဒှ်ဒၟံၚ် လအ်ကၠုၚ်ကဵုဂိတုဂှ်ရ ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခက်အခုဲဇွောံမစၞစတံ နွံကၠုၚ်တုဲ အကြာပေါဲဗ္တိုက်ဒှ်ဒၟံၚ်ဂှ် ဂွံဂွံဇွောံမ ပံင်လမျီုတုဲ ဒးစဴကေတ်ပ္ဍဲသ္ၚိ၊ ဒးအာဂၠါဲဒၟံၚ်အကြာဂြိုပ်တံရ။
သၞာံတုဲကၠုၚ် ပ္ဍဲဂိတုဒဳဇြေမ်ဗာ ၁၈ တေံ ပ္ဍဲကဵုပွဳပွူဗ္ဒါဲကွာန် (ထုံမခါ၊ ရေဖြူ၊ သိန်းခွန်၊ ချောင်းနှစ်ပေါက်) တံဂှ် ပေါဲဗ္တိုက် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတုဲ ညးဒေသ ၃၀၀၀ ပြၚ်ဝွံ ဒးပါဲမံၚ်ဘဲပၞာန် ပိဂိတုပြၚ်ကၠုၚ်ယျဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ