နေဗျဳဒဝ်၊ မာန် ၂၃
ဂွံရပ်စပ် ဇြဟတ်ဓာတ်၊ ဍာ် ကေုာံ ဖကောဝ်ဂကူဂွံဆဵုကေတ်အောန် တံမာန်ဂှ်ဝွံ သွက်ပရေၚ်ညိၚ်ဝတ်အဓာန်ဇမၠိၚ်ဂှ် ပၟိက်ဇၞော်တဴဗွဲမလောန်တုဲ ဒးဓလိုက်လဝ်တမ်ရိုဟ် ပ္ဍဲကဵုကဏ္ဍဇြဟတ်ဓာတ်ကလေၚ်ဗပေၚ်ကေတ်ဂွံတံ၊ ကဏ္ဍနျူကလဳယျာ ကေုာံ ကဏ္ဍဇြဟတ်ဓာတ်တၞဟ်ဟ်တံဂှ်ဏောၚ်ဂှ် က္ဍိုပ်သ္ကိုပ်ပၞာန် ဟီုရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုကၠုၚ်လဝ် ပ္ဍဲပေါဲသဳကၠဳသ္ၚဳဂၠိပ် အခေါၚ်အရာ ကေုာံ တၚ်ကော်ဆဴ ဍုၚ်ဗၟာမ္ဒးဂဗအာ ကြဴနူသၞာံ ၂၀၂၅ မကၠောန်ဗဒှ်လဝ် ပ္ဍဲဍုၚ်နေဗျဳဒဝ် ပ္ဍဲဂိတုမာတ် ၂၁ တေံရ။
ဒၟါနူပထဝဳပရေၚ်ဍုၚ်ကွာန်တုဲ သွက်အန္တရာယ် ပရေၚ်ပိုတ်ဒကုတ် မက္တဵုဒှ်ကၠုၚ်မာန်တံဂှ် နဒဒှ်ဒစးဒုၚ်ရေၚ်တၠုၚ်လဝ်တုဲ ညံၚ်ဂွံဖျေံစိုတ် ကုပရေၚ်ဂီုကၠီုဇွောံမစၞစ ကေုာံ ဖကောဝ်ဂကူဂွံဆဵုကေတ်အောန်တံဂှ် ဒးကောပ်ကာဲထိၚ်ဒဝ်ဏောၚ် သ္ဂးရ။
ပ္ဍဲအရာသၠဲပ္တိုန်ဆက်ဆောံအာ ကုညးကၠောန်ကမၠောန်မွဲစွံတံဂှ်တှ်ေ နွံပၟိက်ဒးဖျေံစၟတ် ကိုန်စဳဇန် မဖောအ်ဗြေဝ်တောတက်လၟိုန်ဂှ်ဏောၚ်တုဲ ပ္ဍဲကဵုသွာၚ်ပရေၚ်ပိုန်ဒြပ်၊ သွာၚ်ပရေၚ်ဂီုကၠီု ကေုာံ သွာၚ်နဲကွတ်ပညာ ပ္ဍဲကဵုသွာၚ်ဟွံတုပ်သၟဟ်နာနာတံဂှ် ဒးသၠဲပ္တိုန်အာပရေၚ်ဆက်ဆောံတံဏောၚ်ဂှ် က္ဍိုပ်သ္ကိုပ်ပၞာန် ဟီုရ။
အပ္ဍဲလၟေၚ်တရဴအာစိုပ်လဝ်ရုယှာ တုဲကၠုၚ်တေံ ပ္ဍဲဂိတုမာတ် ၄ ဂှ် ကံၚ်ဇြဳပၞာန် ကေုာံ အလဵုအသဳရုယှာတံ ထ္ပက်လဝ်စၟတ်တဲ လိက်ကသုက်တုပ်စိုတ် ၁၀ သာ် စပ်ကဵုသ္ဂောံပံၚ်တောဲအာအကြာၜါဍုၚ် ပ္ဍဲကဵုကဏ္ဍနာနာ ပါလုပ်သီုကဵုပရေၚ်သိုၚ်ခၞံရုၚ်စက်ကဵုဇြဟတ်ဓာတ်နျူကလဳယျာ အဇာဍောတ် ပ္ဍဲဍုၚ်ဗၟာရ။
လ္ပာ်မွဲဂှ်ပၠန် လ္တူပရေၚ်ဒုၚ်ဂိုၚ်ကေတ် ကွေတ်ဝါဒဟွံတုပ်သၟဟ်၊ ပရေၚ်ဂကူဟွံတုပ်သၟဟ်၊ သၞောတ်ပရေၚ်ဍုၚ်ကွာန်မတၞဟ်ခြာတံဂှ် ဖ္တိုက်ဖ္အောဝ်ခ္ဍဟ်ခ္ဍာဲ ဇၞော်တိုန်ဍာ်တုဲ ညံၚ်ပဋိပက္ခရပ်လွဟ်အပ္ဍဲဍုၚ် ဂွံဇၞော်ကၠုၚ်ဂှ် ရေၚ်တၠုၚ်လဝ်အိုတ်ရောၚ် က္ဍိုပ်သ္ကိုပ်ပၞာန် စောဲစပ်လဝ်ရ။
အလဵုအသဳအဆက်က် ပ္တိတ်ဇြဟတ်ဒက်ပ္တန်ကၠုၚ်လဝ် ပရေၚ်ၜိုဟ်လလမ်အပ္ဍဲဍုၚ်ကီုလေဝ် လ္တူနူကဵုအကာဲအရာအပ္ဍဲဍုၚ်ဂှ် ဟိုတ်နူဍုၚ်သ္အာၚ်တံ လုပ်စိုပ်ပလာပ်ပထုဲတုဲ ပဋိပက္ခရပ်လွဟ်ဝွံ နွံဒၟံၚ်ဒဵုလၟုဟ်တုဲ ကၟိန်ဍုၚ်ဝွံ ပ္ဍဲပရေၚ်ဖောအ်ဗြေဝ်တောတက်တံဂှ် မ္ဒးလဇုဲလဇအာလဝ်ရောၚ် ပ္တိုန်လဝ်ဒုဟ်ရ။
ပပ္တံနူအခိၚ်ဒပ်ပၞာန် သ္ပပဓာန်ကဵုလွဟ်တုဲ မသီကၠေံအဝဵုကၟိန်ဍုၚ် ပ္ဍဲသၞာံ ၂၀၂၁ ဂိတုဖေဖဝ်ဝါရဳဂှ်တုဲ ဒဵုကဵုတ္ၚဲဏံ ပရေၚ်လီုလာ်ဆုတ်ယောၚ် မက္တဵုဒှ်ဒၟံၚ် အလုံဍုၚ်မွဲ ပ္ဍဲကဵုကဏ္ဍနာနာဂှ်ဝွံ ဒှ်ဟိုတ်နူပရေၚ်သီအဝဵုဏောၚ်ဂှ် ညးဍုၚ်ကွာန်ဂမၠိုၚ် ဒုၚ်လဝ်တဲရ။
က္ဍိုပ်သ္ကိုပ်ပၞာန်ဂှ်တှ်ေ သ္ပကၠေံမၛ္ဇဟ် တံဟိုတ်ပရောပရာ ပြဒ္ဒညာတံဏံဂှ်တုဲ ယဝ်ဓဝ်ညဳသာဟွံမွဲမ္ဂး သၞောတ်ပရေၚ်ပိုန်ဒြပ်လဵုမွဲမှ အံၚ်ဇၞးအာဟွံသေၚ်၊ သၞောတ်ပရေၚ်ဍုၚ်ကွာန်လဵုမွဲမှလေဝ် အာက္ဍိုပ်ခိုၚ်ၚ်ဗိုန်န်မာန်ဟွံသေၚ် သာ်ဝွံ ဟီုကၠုၚ်လဝ်ဏီရ။
နကဵုညးတံ ပ္တိတ်ဒၟံၚ်ဇြဟတ် ညံၚ်ဂွံဆက်ဂါံကွာ်အာ သၞောတ်ဒဳမဝ်ကရေဇြဳဗော်ဇဳ မကိတ်ညဳကဵုအကာဲအရာကၟိန်ဍုၚ်တုဲ မဒှ်သၞောတ်ညးဍုၚ်ကွာန်တံ နွံပၟိက်ဂှ်တုဲ သွက်ဆန္ဒကောန်ဍုၚ်အရၚ်တံဂှ်လေဝ် အရာမဒးကၠောန်သ္ပကဵုထေက်တံဂှ် ရေၚ်တၠုၚ်ကဵုအာ ဗွဲမဗဗွဲကဵုသၞောဝ်ဥပဒေဏောၚ် သ္ဂးရ။
သ္အာၚ်နူဂှ်ပၠန် ဍုၚ်ဗၟာဝွံ နွံဒၟံၚ် အကြာဍုၚ်ဇြဟတ်ဇၞော်ၜါဍုၚ် မတၞဟ်ခြာဒၟံၚ်တံဂှ်တုဲ ဒ္ဂေတ်ဗက်ဒၟံၚ် မူဝါဒကာဍုၚ်သ္အာၚ် မဗၠးၜး မဟွံဗက်လ္ပာ်တံဂှ်တုဲ တၚ်ကော်ဆဴနွံဒၟံၚ်တံဂှ်လေဝ် တတ်ထ္ပာ်အာ နကဵုနဲကဲနာနာဏောၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု− MOI