ဘာအၚ်၊ ဨပရဴ ၂
အလုံဍုၚ်မွဲ အခိၚ်ဒၞါဲဒေသ ၆ ဒၞါဲ ဒးဒၟံၚ်ဘဲဒဏ်တိချဳ ဇၞော်ကဵုဇြဟတ်ဂှ် ပ္ဍဲတွဵုရးကရေၚ် လ္တူဍုၚ်ဘာအၚ်ဂှ် ဂကောံကံၚ်ဇြဳပၞာန်တွဵုရး သွက်ဂွံကၠောန်သ္ပသ္ဘၚ်အတးဂးတုဲ သ္ဘၚ်အတးသြၚ်ဗ္တဳကီု၊ ပ္ဍဲကဵုဇိုၚ်ၜဳတံဂှ်လေဝ် ဆက်သိုၚ်ခၞံဒၟံၚ် ကၞာထးအတးတံဂှ်ရောၚ် ဂွံတီကေတ် ဇရေၚ်ညးဒေသတံရ။
လ္တူဍုၚ်ဘာအၚ်ဂှ် ဂကောံကံၚ်ဇြဳပၞာန်တွဵုရးကရေၚ် ကၠောန်ဗဒှ်အာ သ္ဘၚ်အတး လ္တူသြၚ်ဗ္တဳ ဗ္ဒါဲဖျာဗ္တံဇိုၚ်ၜဳ ပွိုၚ်မွဲဂိတုဏောၚ်တုဲ သီုကဵုကၠောန်ဗဒှ်အာ သ္ဘၚ်အတးသၚ်္ကြာန်တွာ်တုဲ ပ္ဍဲကဵုဂၠံၚ်ဇိုၚ်ၜဳတံဂှ် ဗ္စဖျုၚ်အာစတုဒဳသာ ကေုာံ သီုကၞာထးဝေၚ်ဍာ်တအ်ဂှ်ဏောၚ်ဂှ် သ္ဂးရ။
ဂကောံကံၚ်ဇြဳပၞာန်တွဵုရးဂှ်တှ်ေ သွက်သ္ဘၚ်အတးသြၚ်ဗ္တဳဂှ် စနူဂိတုမာတ်မံက်တုဲကၠုၚ်တေံတုဲ ပသောၚ်ၚးတးမံၚ် ပရၚ်ဗ္တဳ နကဵုစက်ယန်တံဂှ်တုဲ ဒၞါဲတံဏံဂှ် သိုင်စုတ်လဝ် သီုကောန်တာဲဂွံပြေလၟောၚ်၊ ဒၞါဲဝေၚ်ဍာ်၊ ဆေင်ဖျာတအ်ရ။
သ္အာၚ်နူဂှ်ပၠန် ပ္ဍဲဂၠံၚ်ဇိုၚ်ၜဳဂှ် စသိုၚ်ခၞံဒၟံၚ်ကၞာထးဗဟဵုတုဲ စကၠောန်ဒၟံၚ် ကၞာထးဌာနမဆေၚ်စပ်လ္ၚဵုတံဂှ်လေဝ် ဂွံဆဵုကေတ်တုဲ သွက်သ္ဘၚ်အတးဂှ် ဂကောံအုပ်ဓုပ်အရာပ်တအ် ကံက်ဒၟံၚ်လှုဲ အကြာအရာပ် မွဲသ္ၚိ ၅၀၀၀ ဒ္ကေဝ်ဂှ် ညးဒေသဘာအၚ်မွဲတၠ သ္ဂးရ။
ကၟိန်ဍုၚ်ဗၟာ သ္ကုတ်လ္တူ ပ္ဍဲနေဗျဳဒဝ် မာန္တလေဝ် သက်ကိုၚ်တေံ ဒးဂဗဒၟံၚ်ကဵု ဘဲအန္တရာယ်သဘာဝ ဇၞော်ကဵုဇြဟတ်တုဲ အခိၚ်မၞိဟ်ဂၠိုၚ်ကဵုလ္ၚီ ဒးချိုတ်ဒၟံၚ်ဂှ် စပ်ကဵုဂကောံကံၚ်ဇြဳပၞာန်တွဵုရးကရေၚ် ဆက်ကၠောန်ဗဒှ်အာသ္ဘၚ်အတး မိပ်ပ်ဏောၚ်ဂှ်တုဲ ပရေၚ်ပါ်ပါဲဒၟံၚ်တအ်လေဝ် နွံရ။
ညးဒေသတအ်ဂှ်တှ်ေ အခိၚ်ဒးမံၚ်ဘဲဒဏ်တိချဳသာ်ဏံဂှ် ဟွံကၠောန်သ္ဘၚ်အတးမွဲသာ် အခိၚ်ကာလလၟုဟ် ပရေၚ်ဟံၚ်ပြာ်သွက်ညးဍုၚ်ကွာန် ဒးဘဲတိချဳတအ်ဂှ်ဟေၚ် ဒးကၠောန်ထေက်ဂှ် သ္ဂးအိုတ်ရ။
သ္အာၚ်နူဂှ်ပၠန် ပရေၚ်ဒှ်ဓဝိၚ် သွက်ညးသၟတ်အာမိပ်ဝေၚ် အခိၚ်ကာလအတးဏံ ဂကောံကံၚ်ဇြဳပၞာန်တအ် ရပ်ကော်ကဵုလုပ်ပၞာန်ဂှ်လေဝ် နွံဒၟံၚ်တုဲ လ္ၚဵုတအ်ဂှ်တှ်ေ အခိၚ်အတး အာဝေၚ်ဂေတ်ကြေဝ်ဏောၚ် ဟီုဂးမံၚ်သာ်ဏံလေဝ် နွံရ။
ပ္ဍဲကဵုသ္ဘၚ်အတးဘာအၚ် ကၠောန်ဗဒှ်လဝ် သၞာံတုဲတေံဂှ် မွဲဒမြိပ်ဂၠံၚ်ဇိုၚ်ၜဳဂှ်တှ်ေ ကၞာထးဌာနမဆေၚ်စပ်တအ်သၟးရနွံတုဲ သၚ်္ကြာန်တွာ်ကဵု ကၞာထးဗ္စဖျုၚ်ကၟုဲတံလေဝ် နွံတုဲ ညံၚ်ရဴအတးတုဲတုဲတေံ ဍေံဟွံမိပ်ရတုဲ ညးကၠုၚ်စိုပ်ဝေၚ်ဍာ်တံလေဝ် နွံလဝ် ၜိုတ်ဓမ္မတာဓဝ်ရ။
ပရိုၚ်-သြၚ်လောန်တိုၚ်(မ်)
ဗီု-CJ