မတ်မလီု၊ ဨပရဴ ၂
ဂကောံမန် မပၠန်ဂတးဒၟံၚ် သၞောတ်တၠအဝဵုပၞာန်တံဟွံပါလုပ်မွဲသာ် ကောံဓရီုပရေၚ်ဂကူမန် မကၠောန်ဗဒှ်အာ လ္တူဍုၚ်မတ်မလီု ဒၞါဲဒေသကံၚ်ဇြဳပၞာန်ထိၚ်ဒက်လဝ်ပေၚ်ၚ်ဂှ် ဒစဵုဒစးအာရောၚ် ဂကောံပၠန်ဂတးမန်ဂမၠိုၚ် လလောၚ်ပ္တိတ်လဝ်လစွံစိုတ်ရ။
နကဵုတၚ်ရန်တၟံ သွက်ဂွံသ္ပဒတန်သ္ၚဳဂၠိပ် မူဝါဒစပ်ကဵုကောန်ဂကူတံဂှ်တုဲ ဗော်ဍုၚ်မန်တၟိဗဟဵု သ္ကိုပ်သ္ကတုဲ သ္ဂောံကၠောန်ဗဒှ်အာ ကောံဓရီုပရေၚ်ဂကူမန် ၂၀၂၅ လ္တူဍုၚ်မတ်မလီု နွံဒၟံၚ်ရ။
ဟိုတ်ဒၟါနူဗော်ဍုၚ်မန်တၟိဗဟဵု မသဳကၠဳဒၟံၚ်ကဵု ကံၚ်ဇြဳပၞာန် သ္ကိုပ်သ္ကဂှ်ရ ဇြဟတ်ပရေၚ်ဍုၚ်ကွာန်မန်မၞုံအပ္ဍဲဍုၚ်ဂမၠိုၚ်၊ ဗော်ပရေၚ်ဍုၚ်ကွာန်မန်ဂမၠိုၚ်၊ ဂကောံမှာဇန်ဂမၠိုၚ်၊ ခမဳသၚ် ကေုာံ ဂကောံဗော်သွး ပူဂဵု မဘိက်ထေက်တံ တိုန်စိုပ်အာဏောၚ် မဒှ်ရ။
မေန်တာန်လွေန် ညးဒုၚ်တာလျိုၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်တှ်ေ ဒပ်ပၞာန်ဗၟာဝွံ ဒဒှ်မကၠောန်ဒၟံၚ် ညံၚ်ဇြဟတ်ပရေၚ်ဍုၚ်ကွာန်မန်တံ ဟွံဂွံဒှ်မွဲဂှ် ကောံဓရီုဏံ ကၠောန်ဏာကမၠောန် ကံၚ်ဇြဳပၞာန် မ္ဒးကၠောန်တံဂှ်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကောံဓရီုပရေၚ်ဂကူမန်ဟီုဂှ် ဒဒှ်မသ္ပစၞးပရေၚ်ဍုၚ်ကွာန်နာနာ ဒးပါလုပ်ဏောၚ်၊ ဒးဗၠးၜးဏောၚ်၊ ဒးရန်ကဵုညးဍုၚ်ကွာန်တံဏောၚ်။ ဆ္ဂး ကောံဓရီုဏံဂှ် ပရေၚ်သ္ပစၞးပရေၚ်ဍုၚ်ကွာန်ဂှ်လေဝ် ဟွံစုၚ်ဇဳ၊ သီုကဵုကၠောန်ဗဒှ်လ္တူဍုၚ်ကံၚ်ဇြဳပၞာန် ထိၚ်ဒက်ဂွံလဝ်ပေၚ်ၚ်တံဂှ်တုဲ မ္ၚးနူဟွံရန်ကဵုညးဍုၚ်ကွာန်မန်တံဂှ် ညံၚ်ဂုန်သိက္ခာပရေၚ်ဍုၚ်ကွာန်မန် ဂွံစှ်ေ၊ ညံၚ်ပရေၚ်ဍုၚ်ကွာန်မန် သာတုဲဂွံထုဲထံၚ်အာဂှ် ဒှ်ကောံဓရီု သ္ပဏာမွဲရောၚ် နကဵုအဲ မိက်ဂွံသ္ၚဳဂၠိပ်ရ” သာ်ဝွံ သ္ဂးရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ်လေဝ် ကၠောန်ဗဒှ်ကောံဓရီုပရေၚ်ဂကူမန် လ္တူဍုၚ်မတ်မလီုဂှ်ဝွံ ဟိုတ်နူညးစၞးနူသွာၚ်ဇဳ တိုန်စိုပ်ဟွံမာန်ဂှ်ရ သ္ပစၞးရမျာၚ်အလုံဂကူမန် မာန်ဟွံသေၚ်ပုဟ်ဂှ် ဟီုရ။
အကာဲအရာလၟုဟ်ဝွံ ဒှ်အခိၚ်ရုန်ဂ္စါန် လုပ်မံၚ်ပေါဲဗ္တိုက် သွက်အခေါၚ်ကံကုသိုလ်ဇကု ဇကုဖန်ဖက်ကေတ်မာန်ဂှ်တုဲ လညာတ်ပရေၚ်ဍုၚ်ကွာန်တံဂှ်လေဝ် ထ္ကးပြးဒၟံၚ်ဂှ်ရ နကဵုလညာတ်မွဲလ္ပာ်ဓဝ် ပ္တဝ်ဏာမံၚ်လၟေၚ်ပရေၚ်ကမၠောန်ဂကူ ပ္ဍဲကောံဓရီုပရေၚ်ဂကူဂှ် သာတုဲပရေၚ်ညဳသၟဟ်ဂကူ လီုလာ်အာမာန်ရောၚ် သ္ဂးရ။
ပ္ဍဲကောံဓရီုဏံဂှ် ရန်တၟံလဝ် သွက်ဂွံဒက်ပ္တန် ဓဝ်ညဳသာပရေၚ်ဂကူကီု၊ သွက်ဂွံသ္ၚဳဂၠိပ်သဳကၠဳ သၞောဝ်သ္ဇိုၚ်ဍုၚ်မန်ရာမည မကိတ်ညဳကဵု ကၟိန်ဍုၚ်ပံၚ်ကောံဖေဝ်ဒရာ ပါလုပ်သီုကဵု သ္ဇိုၚ်မူသၞောဝ်ဥပဒေ ဒက်ပတန်ကၟိန်ဍုၚ်ဖေဝ်ဒရာတံ မဒှ်ရ။
သ္ဇိုၚ်မူတံဏံ သၞောဝ်တံဏံဂှ် ဂွံပ္တိုန်ထ္ၜးပ္ဍဲကောံဓရီုဂှ် ဟွံသ္ပစၞးနူသွာၚ်ဇဳတုဲ သ္ဂောံကလေၚ်သ္ၚဳဂၠိပ်သဳကၠဳဂှ် ဒှ်ဟွံထေက်တုဲ သွက်ဂွံသ္ပဒတန် မူဝါဒစပ်ကဵုပရေၚ်ဂကူမန်ဂှ်လေဝ် ကၠောန်သ္ပဟွံထေက်ပုဟ်ဂှ် ဗော်ဍုၚ်မန်တၟိ AD ထံက်ထ္ၜးလဝ်ရ။
သ္အာၚ်နူဂှ်ပၠန် ဒုၚ်သ္ဇိုၚ်ကဵုအကာဲအရာအပ္ဍဲဍုၚ်ဇကုတံတုဲ နူကဵုကောံဓရီုပရေၚ်ဂကူမန်ဏံမွဲကဆံၚ် တၚ်သ္ဂုတ်သွာတ်ဂမၠိုၚ်ဝွံ ဒှ်အာပၞော်ယီု သွက်ကံၚ်ဇြဳပၞာန်မာန်ဂှ် ဒှ်ဓဝိၚ်ဇၞော်ကဵုဇြဟတ်ရောၚ် သ္ဂးရ။
ကောံဓရီုပရေၚ်ဂကူမန်ဝွံ ယဝ်အကာဲအရာကဵုမ္ဂး ဟွံသေၚ်သာ်ဂှ် ဖန်ဗဒှ်ကေတ် ညံၚ်ညးစၞးနူသွာၚ်ဇဳတံ ဂွံတိုန်စိုပ်မာန်မ္ဂးဟေၚ် ကၠောန်သ္ပထေက်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး လစွံစိုတ်ဂှ်ရ။
ဟိုတ်ဂှ်ရ ကောံဓရီုပရေၚ်ဂကူမန်ဝွံ ဒှ်ဒၞါဲ ညးစၞးကောန်ဂကူမန်ဗွိုၚ်ဇဳတအ်ကောံစိုပ်၊ သ္ၚဳဂၠိပ်သဳကၠဳ ဆေၚ်စပ်ကဵု ကိစ္စအလုံကောန်ဂကူမန်ကီု၊ သီုရန်ဖျေံတၚ်ရန်တၟံမနွံပၟိက် သွက်အနာဂတ် ကောန်ဂကူမန်တအ်ကီုတုဲ ဒှ်အရာပၟိက်ဇၞော် ပ္ဍဲအလုံကောန်ဂကူမန်ရ။
ဒပ်ပၞာန်ဗၠးၜးဍုၚ်မန် MLA ဂှ်တှ်ေ ညံၚ်အယုက်ကံၚ်ဇြဳပၞာန်ဂွံဂၠိၚ် ကောံဓရီုပရေၚ်ဂကူမန် နူကဵုကမ္မတဳသ္ကိုပ်သ္က ကၠောန်ဗဒှ်ကောံဓရီုဏံ မကၠောန်ဗဒှ်အာဂှ် ဒစဵုဒစးအာရောၚ် ကဵုသမ္တီလလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီု-NMSP