မတ်မလီု၊ ဨပရဴ ၂
အပ္ဍဲကၟိန်ဍုၚ် ဒးဘဲဒဏ်တိချဳတုဲ အခိၚ်မၞိဟ်ချိုတ်ကဵု ပရေၚ်လီုလာ်ဇီုကပိုက်တံ သၠုၚ်တိုန်ဒၟံၚ်ဂှ် ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန် ပကောံကၠုၚ်ဒၟံၚ်ကောန်ပၞာန် သွက်တန်ဗ္တောန်ကွတ်ပၞာန်လၟေၚ် ၁၂ ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဂကောံအုပ်ဓုပ်ကံၚ်ဇြဳပၞာန်တံဝွံ သွက်တန်ဗ္တောန်ကွတ်ပၞာန် လၟေၚ် ၁၂ ဂှ် သ္ဂောံလိၚ်စုတ်မၞိဟ်ဂးတုဲ အာတ်မိက်ဒၟံၚ်သြန် အကြာသ္ၚိတံ နွံတုဲ ရပ်ဒက်ဗွဲအဓမ္မတုဲ ပကောံကၠုၚ်ဒၟံၚ်ကောန်ပၞာန်တံရ။
ပ္ဍဲကဵုပေါဲဗ္တိုက် က္တဵုဒှ်ဒၟံၚ် အလုံဍုၚ်မွဲဂှ် ကံၚ်ဇြဳပၞာန် ကျဒၟံၚ်ပၞာန်ဂှ်ဝွံ ကြဴနူပၠောပ်ကၠေံလမျီု သၞောဝ်ယိုက်ဂၠေၚ်လျိုၚ်ပၞာန်တုဲဂှ် ပ္ဍဲတွဵုရးဍုၚ်မန်ဂှ် ပံက်ဒၟံၚ်တန်ဗ္တောန်ကွတ်ပၞာန် လၟေၚ်ဂိတုတုဲ တုဲကၠုၚ်ပ္ဍဲဂိတုမာတ် ၁၇ တေံဂှ်လေဝ် ပံက်ကၠုၚ်လဝ်တန်ဗ္တောန်ကွတ်ပၞာန် လၟေၚ် ၁၁ ရ။
သၟတ်ဒေသ ဟွံမိက်ထ္မံက်ယၟုမွဲတၠဂှ်တှ်ေ အခိၚ်ဒှ်ဒၟံၚ်ဘဲသဘာဝဏံ တံၚ်ဂြဲပၠောပ်ဏာသၟတ်တံ အပ္ဍဲပၞာန်အပ္ဍဲဍုၚ်ဂှ် ဟွံဒးစိုတ်လးလးတုဲ မ္ၚးနူကဵုကၠောန်ဒၟံၚ်စၟတ်သမ္တီတ္ၚဲအောန်စိုတ်ဒှ်လၞီ ကဆံၚ်ကၟိန်ဍုၚ်ဂှ် ညးဂၠးတံလေဝ် အခိၚ်ဒးကၠုၚ်ရီုဗၚ်ဒၟံၚ်ဂှ် မိက်ဂွံကဵုပါဲစွံထောံလဝ် ပရေၚ်ယိုက်ဂၠေၚ်လျိုၚ်ပၞာန်ဏံ မွဲလစုတ်ရောၚ်ဂှ် ဟီုလဝ် လညာတ်ညးရ။
“တမ်ရိုဟ်မၞိဟ် အပ္ဍဲကၟိန်ဍုၚ်ဏံ သၟတ်နွံပၟိက်ဒၟံၚ်ဍာံဍာံတံဂှ် မုဟွံသေၚ်မွဲသာ် အာပၠေၚ်ထောံပ္ဍဲပၞာန်အပ္ဍဲဍုၚ်ဂှ် ပိုယ်တံ ဟွံဒးဂၞပ်ပုဟ်။ အခိၚ်ဒးကၠောန်ဒၟံၚ် သီုစၟတ်သမ္တီတ္ၚဲအောန်စိုတ်ဒှ်လၞီ ကဆံၚ်ကၟိန်ဍုၚ် နူညးဂၠးတံလေဝ် ဒးကၠုၚ်ကၠောန်ကဵုဒၟံၚ် နကဵုဓဝ်ဗ္စာရဏာတံဂှ် မၞိဟ်ဇၞော်ဇၞော် အုပ်ဓုပ်ဒၟံၚ်ဍုၚ်ပိုယ်လၟုဟ်ဏံ ကၠိုဟ်ကေတ်တုဲ ကိစ္စဒးလုပ်ပၞာန်တံဏံဂှ် ဖာဲထောံမွဲလစုတ်တုဲ သွက်ဂွံဘိုၚ်ပူဗိုၚ်အာ ဘဲအန္တရာယ်သဘာဝဏံဂှ် စန်ဒက်ညးဍုၚ်ကွာန်တံညိဂှ် အဲမိက်ဂွံဖ္တိုက်ဖ္အောဝ်ရ“ သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူပရေၚ်ဒးလုပ်ပၞာန်တံဂှ်တုဲ သၟတ်ဗွဲမဂၠိုၚ် မံၚ်အပ္ဍဲဍုၚ်ဟွံမာန်ရတုဲ ဗီုကဵုကၠာတေံ ရေၚ်တၠုၚ်ကၠုၚ် ကုကမၠောန်ဒးဘဲသဘာဝတံ ဟွံမာန်ဂှ်လေဝ် ဒးကေတ်ခန်လ္ၚတ်ဏောၚ်တုဲ အခိၚ်ညးဍုၚ်ကွာန်တံ ဒှ်ဒၟံၚ်ဒဒိုက်ဂှ် ကိစ္စလုပ်ပၞာန်ဏံဂှ်တှ်ေ ဒှ်ဟွံထေက်ပုဟ်ဂှ် ညးဆက်ဟီုရ။
ညးဒေသဟွံမိက်ထ္မံက်ယၟုမွဲတၠဂှ်လေဝ် အခိၚ်ညးဍုၚ်ကွာန်တံ ဒးမံၚ်ဘဲဒဏ်တိချဳဂှ် ကံၚ်ဇြဳပၞာန် ပကောံဒၟံၚ်မၞိဟ် သွက်တန်ဗ္တောန်ကွတ်ပၞာန် လၟေၚ် ၁၂ ဂှ်ဝွံ ဒှ်အရာရပ်စပ်စကာဒၟံၚ် သွက်ဒတုဲဖဵုဍေံတံသၟးရဏောၚ်တုဲ ညးဍုၚ်ကွာန်ဂမၠိုၚ်ဝွံ ပါဲနူကဵုဘဲဒဏ်တိချဳဂှ် ဒးဖေက်ဒၟံၚ် သီုပရေၚ်ဒးလုပ်ပၞာန်တံဂှ်ရောၚ် ဟီုရ။
“ပကောံဒၟံၚ်မၞိဟ် သွက်တန်ဗ္တောန်ကွတ်ပၞာန် လၟေၚ် ၁၂ ဂှ်တှ်ေ ရပ်စပ်စကာဒၟံၚ်ညးဍုၚ်ကွာန်တံ သွက်ဒတုဲဖဵုဍေံတံရဏောၚ်။ တုဲတှ်ေ ပ္ဍဲအရာပ်ပိုယ်တံလၟုဟ်ဂှ်လေဝ် မၞိဟ်တြုံတှ်ေ ဟွံဂွံဆဵုကေတ်ဟဂှ်ရ။ မံၚ်မွဲဏှ စဴနူကလောန်တှ်ေ ရပ်တံၚ်ပဏာပဝ်တာ။ လုပ်စၟဳတ်စရၚ်ကၟုဲတုဲ ရပ်ဏာတံဂှ်ကီု၊ လၟုဟ်ဂှ်တှ်ေ ပ္ဍဲမာန္တလေဝ် တိချဳအာဇၞော်ကဵုဇြဟတ်တုဲ ကသဳတိဍောတ်တ်တံဂှ်လေဝ် ချဳဒၟံၚ်ကြပ်အရိုဟ်တ္ၚဲ။ လၟုဟ်ဂှ် ညးဍုၚ်ကွာန်တံဂှ်တှ်ေ ဒးဖေက်ဘဲတိချဳဂှ်ဟာ။ ဒးဖေက် ဒးလုပ်ပၞာန်ဂှ်ဟာ။ ဒှ်ဒၟံၚ်အကာဲအရာ ဒးဖေက်ဒၟံၚ်ဖအိုတ်” သာ်ဝွံ သ္ဂးရ။
မွဲလ္ပာ်ဂှ်ပၠန် ကောန်ဂကောံအုပ်ဓုပ်ကံၚ်ဇြဳပၞာန်တံဝွံ သွက်တန်ဗ္တောန်ကွတ်ပၞာန် လၟေၚ် ၁၂ ဂှ် ဂွံလိၚ်စုတ်မၞိဟ်ဂှ် ဗက်ကံက်ဒၟံၚ်သြန်တံကီု၊ ယဝ်လိၚ်ကေတ်ဟွံဂွံမ္ဂး ဒးကံက်မာဲဏောၚ်ဂးတုဲ ဒဒှ်ရဟီုဏာလဝ်ဂှ် ညးဒေသတံ ဟီုရ။
သ္အာၚ်နူဂှ်ပၠန် ပ္ဍဲကဵုဒေသ မပ္တိတ်လဝ်အမိၚ် ညးတြုံၜါတၠ ဍိုက်ကွဳလိုန်ဓာတ်ဟွံဂွံတံဂှ် ယဝ်ရမၞိဟ်တြုံၜါတၠ ဍိုက်ကၠုၚ်ကွဳလိုန်ဓာတ်တုပ်ပ်မ္ဂး ဒးဒုၚ်ပကောံပကၠေံကောန်ပၞာန်တုဲ သၟတ်တိတ်မ္ၚးအခိၚ်ဗ္တံတံဂှ်လေဝ် ရပ်ဒက်တုဲ ပလံၚ်ဗစိုပ်ဒၟံၚ်တန်ဗ္တောန်ကွတ်ပၞာန်တံ နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန်ဂှ် နူတန်ဗ္တောန်ကွတ်ပၞာန် လၟေၚ် ၁ စဵုကဵု လၟေၚ် ၁၁ ဂှ် ညးဒးဒုၚ်ပကောံပကောန်ပၞာန် နွံကၠုၚ် ၂၀၀၀ ပြၚ်တုဲ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram