ဝါယှေန်တာန်၊ ဨပရဴ ၂၀
ခြာဟွံလအ် ယဝ်ဟွံဂွံဆဵုကေတ် လက္ချန်မတောတက် ကၠးဖ္ဍးကၠုၚ်တံဂှ်ပုဟ်မ္ဂး အရာမပ္ညဳပ္ညပ်ကဵုဒၟံၚ် ညံၚ်သ္ဂောံဂွံတၚ်တုပ်စိုတ် ပရေၚ်ၜိုဟ်လလမ် ရုယှာ−ယူကရုၚ်ဂှ် သၠးအာဏောၚ်ဂှ် သမ္မတအမေရိကာန် ဒဝ်နေဝ်ထြာမ် ကေုာံ ဝန်ဇၞော်ကာဍုၚ်သ္အာၚ် မာကိုဝ် ရူဗဳယော ဟီုလဝ် ပ္ဍဲဂိတုဨပရဴ ၁၈ တေံရ။
နကဵုညးတံ ဒဒှ်ရမိက်ဂွံကၠောန် ညံၚ်ဂွံဂွံတၚ်တုပ်စိုတ်ဗွဲမပြဟ်ဂှ် သမ္မတထြာမ် ဟီုကၠုၚ် ကုအ္စာပရိုၚ်ဂမၠိုၚ်ရ။
ယဝ်ရ ပ္ဍဲၜါဍုၚ်ဏံ မွဲမွဲဍုၚ် ကၠောန်ကၠုၚ် ညံၚ်ဂွံခက်ခုဲမ္ဂး မၞးတအ်ဂှ် ပရအ်၊ မၞးတအ်ဂှ် မၞိဟ်ပရေံလောန်အာ ဟီုသာ်ဏံတုဲ အရာမလုပ်အကြာပ္ညဳပ္ညပ်ကဵုဒၟံၚ်တံဂှ် လှဲပြံၚ်အာဏောၚ်ဂှ် ထြာမ် ဟီုဗပေၚ်လဝ်ရ။
ရုယှာကေုာံယူကရုၚ် ခြာဟွံလအ် ဒးထ္ၜးပျး ဒဒှ်ရအကာဲအရာတောတက်ကၠုၚ်နွံဏောၚ်တုဲ ဟွံသေၚ်သာ်ဂှ်မ္ဂး နကဵုအမေရိကာန် ဆက်တုဲပ္ညဳပ္ညပ်ကဵုအာဟွံသေၚ်ရပုဟ်ဂှ် ဝန်ဇၞော်ကာဍုၚ်သ္အာၚ် ရူဗဳယော ဟီုလဝ်တုဲ ထြာမ် ဟီုကၠုၚ်လဝ် သာ်ဏံရ။
ကြဴနူဆဵုဂဗကဵု က္ဍိုပ်သ္ကိုပ်ယူရောပ်၊ ယူကရုၚ် ပ္ဍဲဍုၚ်ပါရဳတုဲဂှ် ဝန်ဇၞော် ရူဗဳယောဂှ်တှ်ေ နကဵုညးတံ ဂွံဂွံတၚ်တုပ်စိုတ်ဂှ် မၚ်အာလအ်အ်ဟွံမာန်ရတုဲ ခြာဟွံလအ် ဟွံသေၚ်မ္ဂး အပ္ဍဲမွဲၜါသတ္တာဟဂှ် ဒးထ္ၜးပျး ဒဒှ်ရအကာဲအရာတောတက်နွံဏောၚ်ဂှ် ဟီုရ။
ထြာမ်ဂှ်တှ်ေ ဒဵုအခိၚ်လဵု မိက်ဂွံမၚ်အာဟီုဂှ် ဟီုကၠုၚ်လဝ် ချိုတ်တ်ပၠိုတ်တ်ဂှ် ဟွံမွဲဏီရ။
ဒဳမဳထရဳ ပက်သကပ် ညးမၞုံအခေါၚ်ဟီုဂး နန်ကရေမ္မလေန်ဂှ်တှ်ေ စပ်ကဵုတၚ်တုပ်စိုတ်ပရေၚ်ၜိုဟ်လလမ်ဂှ်တုဲ ညံၚ်အကာဲအရာဂွံတောတက်တိုန်ညိညဂှ် ကၠောန်လဝ်ကီုလေဝ် ဂွံဂွံအဆက် ကုဝါယှေန်တာန်ဂှ် ခက်ခုဲဒၟံၚ်ရောၚ် ခၠေဝ်ပၠန်လဝ်ရ။
အပ္ဍဲအခိၚ်ကာလစန်ဒက်ပေါဲရုဲမာဲဂှ် ထြာမ် ကဵုကၠုၚ်လဝ်ကတိ ပေါဲပၞာန်ယူကရုၚ် ညံၚ်ဂွံတုဲဒှ်အာ အပ္ဍဲပွိုၚ် ၂၄ နာဍဳဂှ် ကၠောန်အာဏောၚ် မဒှ်ရ။
ဆ္ဂး ကြဴနူဂွံဒုၚ်ကေတ်တဲ ဒၞါဲကဆံၚ်ဌာနန္တရသမ္မတတုဲဂှ် ၜိုတ်ဂိတုဨပရဴ၊ မေတှ်ေ ဂွံအာတၚ်တုပ်စိုတ်မာန်ဏောၚ်ဂးတုဲ ထြာမ် ကလေၚ်ဟီုလဝ်ပၠန်ရ။
Ref: Reuters