ဝါယှေန်တာန်၊ ဨပရဴ ၂၂
အပ္ဍဲဂရုပလံၚ်လိက် Signal ပူဂဵု သမ္ဘာညး၊ ဒေံညး ကေုာံ ညးရေၚ်တၠုၚ်ဂဗုတ် ကေၚ်ကာပူဂဵု တံဒှ်တမ် ပါလုပ်မွဲဂှ် ဝန်ဇၞော်ကာစဵုဒၞါအမေရိကာန် ပိတ် ဟာတ်သိတ် ဒဒှ်ရပါ်ပရအ်လဝ် တၚ်နၚ်ပရိုၚ်အမေရိကာန် ဘိုအ်သ္ဂောံဗ္တိုက်အာယဳမေန်ဂှ် ဌာန်ပရိုၚ်နျူယျံက်တိုၚ်(မ်) ထ္မံက်ထ္ၜးလဝ် ပ္ဍဲဂိတုဨပရဴ ၂၀ တေံရ။
စပ်ကဵုတၚ်စောဲစပ် ဒဒှ်မဝန်ဇၞော်ဟာတ်သိတ် ပါ်ပရအ်ဒးတၚ်နၚ်ပရိုၚ်ပၞုက် ပရေၚ်ပၞာန် ကုညးအဝဵုဟွံမွဲတံ အလန်ဒုတိယဂှ်တုဲ ဂွံသ္ပဒတန် ဒှ်ဟွံမာန်ဏီပုဟ်ဂှ် ဌာန်ပရိုၚ်အေအေဖ်ပဳ ထ္မံက်ထ္ၜးလဝ်ရ။
ဝန်ဇၞော် ဟာတ်သိတ်၊ သၞာဲဒဴကဵုကသပ်ပရေၚ်ဂီုကၠီုကောန်ဂကူ မိုက်ဝတ် မပါလုပ် သၞာဲဒဴအမေရိကာန်ဂမၠိုၚ်ဝွံ ပ္ဍဲဂိတုမာတ် ၁၅ တေံ ပါ်ပရအ်ဒးအစဳဇန်ဗ္တိုက် ပ္ဍဲဂရုပလံၚ်လိက် Signal တုဲ ဂအုပ်အေဝ်ဒဳတာ မဂ္ဂဇြေန် The Atlantic ညးမပါလုပ် ပ္ဍဲဂရုဂှ် ထ္မံက်ထ္ၜးလဝ် ပ္ဍဲဂိတုတုဲကၠုၚ်တေံရ။
ဟိုတ်နူထ္မံက်ထ္ၜးကၠုၚ်သာ်ဂှ်တုဲ ရုသံၚ်အာလဝ်တုဲ အလဵုအသဳအမေရိကာန် သၟဝ်ပၠတရဴဒဝ်နေဝ်ထြာမ်ဝွံ ဒးဒုၚ်ပါ်ပါဲဒၟံၚ် နကဵုပရေၚ်ဗမံက်စပရိုၚ်ပၞုက် သီုဟွံပသတိ မဒှ်ရ။
နူကဵုဂအုပ်ညးစၟဳတ် ပေန်တဂေါန်လေဝ် ဂၠိုက်ဂၠါဲစၟဳတ်ဒၟံၚ် ပရေၚ်ပရိုၚ်ဏံ မံက်ပြးတိတ်အာဂှ်ဖိုဟ်ရ။
ဝန်ဇၞော် ဟာတ်သိတ်ဝွံ ထပ်တုဲ ပါ်ပရအ်ဒး တၚ်နၚ်ပရိုၚ်အမေရိကာန်ဗ္တိုက် ပ္ဍဲဂိတုမာတ် ၁၅ တေံဂှ်ပၠန်ဂှ် မဂ္ဂဇြေန် နျူယျံက်တိုၚ်(မ်) ထ္မံက်ထ္ၜးလဝ် ပ္ဍဲဂိတုဨပရဴ ၂၀ တေံရ။
ပ္ဍဲကဵုတၚ်နၚ်ပရိုၚ် ညးမပါ်ပရအ်လဝ်ဂှ် အခိၚ်က္ၜၚ်ကျာအမေရိကာန် ထောံဂြာတ်မခတိုဟ် ကုဂကောံဟူတဳဂှ်လေဝ် ပါလုပ်လဝ်ကီုရ။
ပ္ဍဲကဵုဂရုပလံၚ်လိက်ဂှ် ဟိုတ်နူစုတ်ဒးအ္စာပရိုၚ်မွဲတၠ၊ ဗမံက်စလဝ် တၚ်နၚ်ပရိုၚ်ပၞုက်တံဂှ်တုဲ ကေတ်လဝ်အရေဝ် မမိက်ကဵုမွဲမွဲဂှ် ဟွံမွဲဏီရ။
စပ်ကဵုလၟေၚ်ဒဒှ်တံဏံတုဲ သမ္မတထြာမ်လေဝ် သ္ၚိတ်ဒၟံၚ်ဖိုဟ်ရ။
Ref: AFP